Biakina ruang lak luh bansan a hun

Kohhran mi, pangngai ve fe fe te hian Politician te kan titi-ah kan demin ara chuk tui lovah kan chhuah a ni ber a. Kawng siam ṭha se, power-ah intodelh ila, zirna ṭha nei ila, eirukna tlem se, Health Care Scheme ṭha nei ila, kan ti a ni ber. Kan ramin mi state kan phak lohnaah hian a kaikuang chu politician an ni tehmeuh mai.

Kohhran hruaitute pawh hian kan ram chhiat leh ṭhatah hian mawh an phur ve nasa khawp mai. Midang siam ṭha tur chuan mahni inenfiah phawt a pawimawh, thil ṭul ni tawh lo, mahni leh mahni in chawimawina mai mai Bible-a ṭanchhan awm hlek lo (Numbers 19:11 en rawh) Biak Ina Upa leh Pastor thi te ruang lak luh hi an bansan hma chuan kan Puithiam te hi kan ngai thlarau mi lo kumkhua ang a, kohhran mi mipui insiam ṭhatna tur thu ṭha pui pui han sawi ṭhin mahse mi thinlungah a thawk na mawh hle reng ang.

Biak Ina ruang lak luh hi zawng a ṭul tawh lo hle a ni. A chhan sawi tam a ngai lo, Upa leh Pastor tel lovin rorel ila chuan kan bansanna a rei tawh ang. Presbyterian bik lo sawi ta ila, Synod-ah Upa leh Pastor deuh hlir Palai an ni a, engtikah mah an relthlu ngai lovang tih a lang reng mai. Mahni in dah sang tak, chapo tak, ropui bika inngai hlir Puithiam kan neih thup reng chuan kan ram leh kan Politics kalphung siamthat chu kan hlat ngawt ang. Kan Bible Genesis aṭanga Thupuan Bu 66 hi kan la hmang zel a nih si chuan Biak Ina ruang lakluh hi chu a dik thei mawlh lo. Lalpa Biakbuk tih bawlhhlawhna a ni.

Kan Puithiam te berin Biak In tihbawlhhlawh an chak tlat mai hi chu kohhran kal sualna lian tak a ni chiang ngawt mai. Pope a dictator lutuk e tia protest kha kan ni a, tunah chuan kohhran hrang hrang hruaitu Pastor hote hi mawihnai tak leh thiam takin an dictator ta hle mai. Upa ten Pastor bek tle an en a, Upate bek tle mipuiin kan en leh a, Bible hian engtinnge a tih, Lal Isuan engtinnge a sawi, amah Tirhkoh Paula’n engtinnge a zirtir, zawlnei ropui Isaia’n engtinnge a sawi kan chik peih tak tak lo. Kan awmdan mil tawk velin Bible thu hi kan pawt zam fo mai.

Inkhawmpui nikhua-ah te hian kan nihna tak han sawi dawn ila, a dengkhawng deuh chu a kohhran ṭawngkam lo kan intih sak leh hlauh si a, kohhran lian deuh dan bu en hian kohhran ṭawngkam chin leh chin lo thliarna a awm miah lo. Lal Isuan a tisa put lai niin thil dik lo, thilsual sawi lannaah hawih a hawm hran lo. Mi pakhatin 'ka pa mi vui tir zet rawh' a tih khan, "Mitthi chu mitthi-in lo vui mai rawh se," a ti hmiah. Biak In sumdawn nana hman pawh a awih lo, an dawhkan a namthlu hmiah mai a ni. Isaia bung 1 thu te hi chhiar teh u. ‘In inthawina zozai hi ka hne tawh, ran chawm thau te, inkhawmpui ropui tak te pawh hi ka hne tawh, thilpek mai mai te chu rawn la tawh suh u, tuar ka ning tawh' a ti phiar phiar mai a ni.

Khawmpui nikhua-a ei leh in kan inhlui te chu a tawk a fang chu a awm na meuh mai, a uchuak erawh chu a tamin a lang. Aizawl leh thing­tlanga kohhran mi rethei ve tete te hian Pathian ram zau nan an neih ang ang te an thawh­khawm a, chu kohhran pawisa chu a puipa leh palai ni phak chinin nasa taka ei leh ina intuituah nan ren bak sak lova kan lo hmang te hi chu a chhuanawm lem lo khawp mai.

Kan kohhran lian hote hian mahni in en letin in siamṭha sawk sawk sela, a bul ṭan nan Presbyterian leh Baptist kohhran te hian Biak Ina mitthi ruang lak luh hi han titawp phawt mai teh se. Chu chuan kan ram siamṭhat nan kori a tu hle ang. Kan Puithiam te-ah rinna kan nghah thar leh nan a ṭul a ni. Vanrama ṭangkaina nei miah lo leia ropuina ni si kohhran Upa-a ka tlin theih nan ka campaign nghal dawn em ni?

- R. Thangkanglova