Zirlaite vauchher Tribal Scholarship

Zirlaiten kan zirna mamawh leh kan senso phuhru turin scholarship kan dil a, hei hi Mizoram chiaha thleng a ni lo, khawvel ram chang­kangah pawh an dil ve, zirlaiten an zirna senso atana an hman duh hun takah an pe mai ṭhin, mah se Mizoram sawrkar hnuaia dilte chauh hi a ni a hmanna tura hman ngaihna awm hauh lo khawpa tlaia dawng ṭhin chu.

Zirlaite hian scho­larship hi an hmang dik lo tih hi thu sawi tam tak a ni, nia an hmang dik lo tih hi chal kawlh pen ang fawka chiang a ni. Eng tin nge an hman dik tehlul ang ni, kan zirlai kan zir zawh vek hnu, result chhuah kan lawm zawh hnu thla 2 a ral pawhin kan zirlaibu leh mamawh leina tur kan la dawng lo a nia, tu thiam loh nge, zirlai nge sawrkar?

World class edu­cation kan kalpui dan hi a dik meuh em? Sawrkar hian a hming mai ni loin, a tak hian zirlaite leh zirna hi vei sela hei ai hian hma kan sawn ang.

Aikal la a hrem ngam lova, hlawh a bat sak a, zirlaite chan ai leh zel a huna a pe thei lo hi chu a tha nat thlak a ni. A bikin thingtlang lam leh khawsak harsa zawk te tan a mangan thlak zual. Kum tir aṭangin Tribal Scholarship vauchherin zirna inah kan in ziak lut ve a, mahse kan mamawh zirna bungrua leina tura kan lo beisei scholarship chu nawr chhuah chawp ngai a ni kum tin ta mai. Lehkhabu leina nei lo zirlaite hi aikal zirtirtu hmang hian world class education pek min tum em ni?

A kum telin kan dawng tlai tual tual a, zirlaiten thlavang hauhtu rintlak a tlachham tual tual a, sawrkarin min a ngaih­thah tual tual bawk a, kum lo thar turah phei chuan tun ai hian a tlai leh lo ang tih a sawi theih loh. ICFAI zirlai pakhatin a zawhna MSB-in an chhannaah ni 10.7.2018 khan ICFAI University zir­laite scholarship turin MSB a la thlen loh thu leh Planning Board-ah a la tan thu an la sawi nia mawle! Zirnain hawn belh chauh hi em ni kan sawrkarin world class a lo tih chu ni ang?

Zirlai lehkhabu leina nei loten state leh district library kan pan khawm a, kan mamawh min phuhruk zo lo nasa mai si! Inrinni chhun a inhlawhna tur zawnga Zirtawp tlai aṭanga vir vir zirlai rilru vakvaite hian Inrinni hi tlem kan va ti em.

Kar laklawha in­hlawh reng turin zirna ngaihtuah a ngai bawk si, nu leh pate hnena mamawh chah ve ngawt turin kei nin hma­chhuan tur kan nei lo, kan nu leh pate hnen aṭanga thlamuanna, fuihna ṭawngkam leh ṭawngṭai sakna bak dawng ngai lote tan chuan, thlabi a pawisa hmuh chu thil theih loh a ni. Chu tih lai kara scholarship min hren sak reng mai hi chu bei a va dawng duh teh lul em.

Kan sawrkar hian a theih ang tawka ṭha-in zirna atan hna a thawk a, mah se kan thlen chinah hian lungawi a har a ni (nge sawrkar lakah kan beisei sang lutuk zawk). Hemi kawngah hian hei aia nasa hian han in sang mar leh deuh thei se, kan zirna hian hma kan sawn theih a rinawm. World class education dawng turin Mizo zirlaite chu kan inpeih sa reng a, sawrkar inpeih hun kan nghak mai zawk a ni.

- F Lalramhmuaka