ENG NGE DIK LO ṬHIN NI?

Tun hnaiah CSS Hindi Teacher ten sorkar an khinnaah thiam an chang a, CSS tawp hnua sorkarin pawisa neih loh chhuanlama a lak chhunzawm lohte chu Court chuan sorkar hnenah lak chhunzawm turin a ti a ni awm a. Sorkar berin pawisa ka nei lo a ti chunga court-in la chhunzawm tura a ti hi a mak ka lo ti deuh a. A guideline-ah hian central sorkar in a sponsored tawp hunah hna leh hlawh chungchang chu state sorkar kutah a awm ang a tih a ni awm a. Chutah chuan state sorkar berin a kuta awm chu 'ka ruai chhunzawm thei lo' a tih hi, a rawih chhunzawm theih miau loh chuan inruai chhunzawm lo turin thuneihna a nei tihna a ni mai lo em ni le? ka ti.

Hmanni lawkah RUSA scheme hnuaia zirtirtu lakte pawh an thawh hun a tawp a, RUSA hnathawkte chuan MPSC lak an nih avang hian permanent-a sorkar lak chhunzawm an beisei a ni awm a. Mahse, mi ṭhenkhat sawi danin scheme tawp hnua sorkarin a la chhunzawm ang tih hi a awm lo angin an sawi a, tak tak ni maw? Chuti chung chuan H&TE lamah absorption titur in file an kaltirte an tibawk a. Sorkardanahlakngeingeiturthuchuawm lo ta se, eng ngati nge absorption tur chuan file an kaltir le? Tin, lak zui tur pawh ni se, permanent post kher tur angin a inziak ang em? MPSC lak an nih avangin permanent post kher hi beisei tur em ni ang? MPSC hian contract te pawh an la a, sorkar hian lak chhunzawmna tur (ziak mumal tak lo awm ta se) hi a duh chuan part time pawhin dah se a sualna eng nge awm? Zirtirtu lakte contract ziahnaah phei chuan rawih chhunzawm loh turin an ziakte pawh an ti a, chuti chu lo ni se, absorption an beiseite chu dan kalh a ni thei ang em? Court-ah an kal a, thiam chang se la sorkar inthlahdah vang a ni thei ang em?

Heng zawng zawngah hian sorkar hian dan mumal tak a kalpui a ṭulzia a chiang reng mai. Scheme zawh hnu lama an awm dan tur pawh danin a ziah chuan an chanvo tur dik tak chu sorkar pawhin a pek ngam a ṭul a, a lo ni chiah lo a nih chuan dik leh fel taka a kalpui mai ṭhin hi a ṭha fo. Sorkar chu a nek huai huai, a khing ngam ngam an chak zel chuan midangin an thik ang a, sorkar ban tak tam tak hian an rawn ti ve sup sup ang a, sorkar tan pawh zawh loh nghawngkawl an bat ang tih a hlauhawm a ni. Mizoramah hian dan mumal taka kalpui lem lo hian hmelhriat leh chhungte tan hian dan kan pawt sawiin kan tikual nasa lutuk a, chuvangin sorkar hian dan hi a nihna takin hmangin dik takin kalpui thei se, kan buaina tam tak hi a kian ngei a rinawm a ni.

- John Aizawl