MIZORAM SAWRKAR HI

A inhmuamhma chhoh dan kha, tiam theih apiang tiam leh thuthlung ziahpui theih apiang ziahpui aṭangin a inhampuar a, an Campaign tirh lamte khan tu tehchiamin an uksak lo. Mahse Congress hotupa luhlul chhuah zarzoin, Congress milian pahnih leh mithar eng emaw zatin MNF an zawm tak hnu khan INC ninna boruak nen beisei bakin a invawrh ta a ni.

Sikul ṭan hun sawn, Zu zawrh tihtawp, Vehicle lifetime Tax instal-ment a pek, All Mizoram (Maxi Cab /Taxi) permit pek let leh, ZDF-ho thupui decentralization of power tihhlawhtlin, Hindi teacher (1305) rawih chhunzawm, cheng nuai thum sem, Kawngpui chhawng, budget pawn lam aṭanga sum hailuh, Delhi purchaw reng lova intodelha vai buh ei tawh loh leh sawi kim sen loh tiam theih apiang tiam vek a, sawrkar theih dan zawng hrim hrim anga ngaih theiha inzuar an ni ber e.

Inthlan hi party leh party inbeihna tura duan a nih miau avangin, Congress inluling ninna leh ZPM la mumal lova hriatna avangtein, thlan tur dang awm chuang lo tih ang deuha vote rawn hlawh ta an ni ber mai.

An sawrkar ta, mahse Tui a harsa, Electrict bill ba a tam avangin NEEPCO lamin min vau reng a, Tribal Scholarship an pe zo thei lova, MR bill pending a tam a, Health care scheme a buai a, Sawrkar hnathawk hlawh lak a mumal thei lo va, Kum danga September thla vela chhuak ṭhin GPF statement peihfel theih a ni lo va, sawrkar hnathawk pensioner thlengin anmahni pawisa dah ngei pawh an la thei lo a ni.

Tlangval pakhatin, "A ṭhiante Bike hawhin nupui a ru a, a chhungte in (changkang takah) hruai haw in, a tukah bike an rawn laksak a, chumi hnuah vengmawng lama an in luahah thlan tla phungin a hawpui a, a pawi tur ang a pawi zo vek tawh si!" tih ang mai kan ni ta. 'Pa nih mai chu a har lo va, patling nih a har,' an tih ang deuh hian, tiam theih tinreng tiam chunga sawrkar mai chu a theih a nih hmel. Mahse sawrkar ṭha leh mipui rawngbawl thei sawrkar siam erawh thil dang daih a lo nih dawn hi maw le...

- Vanlalhuma Kawlni