Mizo ṭhalaite–welkham 2 outside Mizoram...

Mizoram pawna hna ṭha chi tin thawk tura infuihna, hmalak tumnaah zawngin i han dik dak leh teh poh ang hmiang.

Upsc kal tlanga hna an lakte hi central sawrkar (union government hnuaia hna chi hrang hrang) gazetted group A leh B officers te anni tlangpui a, hna ṭha, hna pawimawh leh zahawma ngaih an ni reng a. Chu'ng zingah chuan all india services (ais) an tih bik heng ias, ips leh ifs (forest) ho cadre state neihote bakah a tawpa 'S' awm chi... Upsc combined examination kaltlanga ais rual an lakte ruala lak ve tho, heng ia&as, irs, irts, its... etc etc hi an awm leh nual a. Hengho hi central services officer an tihho deuh bik, cadre state nei lo, central sawrkar mi leh sa bik ngawih ngawihte niin on deputation in central sawrkar ministry / department hrang hrangah te leh state sawrkarah te pawh an thawk kual ve nasa mai. Henghote hi organised services an tihho chu an ni a.

Heng bakah hian central sawrkar hnuaiah hian hna ṭha tak tak, ministry leh department bik tana lak, specialized services an awm hrang leh a. Entirnan keini Ministry of Mines hian All India Geologist examination a nei hrang ve ngat a, hemia exam thei tur erawh chuan graduate zawng zawng ni lovin mahni line a MSc (Geology) chin kherte a ngai ta bik ṭhin. Chutiangin Indian Statistical Services (iss), ies (Indian engineering services) ang chi central services ṭha tak tak a la tam mai. Heng bakah hian department / office hrang hrang hian a khát mawi tawkin department mamawh dan azirin upsc kaltlangin group a & b officer a la reng bawk. Keini department pawh hian Assistant Controller of Mines emaw a sang lamah pawh lateral entry te siamin direct recruitment-in Regional Controller of Mines (Central sawrkara director puitling level, level 13 ang chi...) te pawh an la fo mai.

Tin, heng central sawrkar hnuaia group a & b posts upsc kaltlanga lak bakah hian non gazetted B leh C posts te pawh tam tham tak tak Staff Selection Commission (ssc) state/region hrang hranga centre te kaltlangin an la miah miah reng bawk. Entirnan ssc hnuaiah Income Tax Inspector group C hna i hmu a, departmental exams kaltlangin i tichho zel a, Assistant Commissioner of Income Tax i kai meuh chuan irs nihna an pe chho che a. Upsc hnuaia direct a irs tlinghote nen khan future promotion ah in dang ta lo. Chuvangin Jt. Commissioner / Addl. Secretary level thlenga han kai ve leh te pawh heng ssc kal tlanga hna hnuai deuh zawka zawmte zingah pawh sawi tur an awm ṭhin.

A bak zawng group D, central sawrkar hnathawkho hi chu an state emaw District Employment Exchange kaltlanga lak an nih avangin chumi state mi leh sa ni lo tan chuan beisei chi a ni vak lo.

Ti khian, central services kan tih mai, a zau thei ang bera huamtir hna chi hrang hrang chu kan hrethiam tawh mai ang a. Upsc/SSC hote hi an fair thawkhat hle a, purely on merit a hna hi hmuh a ni tlangpui a, political fitness a ngai lo tlangpui. Zawm tawh hnua kaisan chhoh kawngah erawh eden huan effect te chu a awm ve fo a ni awm e.

Heng central services hna chi hrang hrang kan sawi bakah hian central sawrkar hnuaia psu an tih, public sector undertakings tam lutuk tak mai, ministry leh department hrang hrang hnuaiah khan an ther leh fup bawk a. Pay & allowances te phei chu a sawrkar hna tak tak aia ṭha anni fur hlawm. Petroleum ministry hnuaia ongc, Oil, hpcl etc. te hi chu an hna hi mawm ṭha ve tak a ni. (Kum 1992-97 chhung khan ongc, Ahmedabad ah ka thawk ve zan tawh bawk, chutah ṭang chuan tuna ka thawhna/ka bansan leh chiah tak ibm, Indian Bureau of Mines, Ministry of Mines hi 1997 khan upsc kaltlangin ka zawm ve leh kha a ni a). Tun hma kha chuan psu hrang hrang te hian anmahni company / corporation duh angin hna an la mai a. Tunah chuan transparent lehzualin gate (Graduate Aptitude Test in Engineering) emaw chutiang chi common test a mark score hisapin hna hi an pe tlangpui. Psu Bank hote pawh hian chutiang common test te chu an nei chho ve tawh.

Heng central sawrkar hnuaia hna chi hrang hrang organised sector kan tih bakah hian hna ṭha leh ropui em em chu sipai hi a ni leh. Indian Army, Airforce leh Navy ah te Commissioned Officer leh Non Commissioned Officer hna tam mang kheng a awm zui. Chu lamah chuan Mizo ṭhalaite an harh mek bawk.

Mizoram pawnah hi chuan hna hi a lo va tam tak em. Heng sawrkar zem zen hna ṭha tak tak kan sawi bakah pawh hian private sector a hna a la tam teh asin le. Sawrkar leh sawrkar hnuai company emaw sipaiah te khi chuan tribal quota kan la nei zui. India rama tribal nih nawmna em em chu tribal min tihote hi vai chheho kan ti let ngat vel. Tribal / st (Scheduled Tribe) kan nihna hi hna hmuh nan leh promotion nante kan hmang a, chu bakah chuan India rama tribal kan nih hi kan lo theihnghilh leh ṭhin ni berin ka hria. Mahse private company angah hi chuan tribal quota a awm ve tawh lo thung. Private company ah chuan kawisuruta luh ve phawt a, chumi hnua pute tih lawm thiam leh thiam loh te, company tana kan ṭangkai theih dan hisapa kai chhoh pawp pawp a ni mai. Hna ṭha lutuk tak a tam hle, heng Tata, Birla, Reliance Industries tih ang te phei hi chu 'trun' tak an ni.

Kan ṭhalaite ka fuih duhna area ve leh chu... Mizoram pawn India ram ringawt chu sawi loh India ram pawn... Khawvel pum huap global employment hi a ni. Kan ṭhalaite vanneihna em em chu India mi niin Indian passport an hum a, hmel, che zia leh smartness/hawihawmna lamah chinese an ni leh thung si hi a ni. Tun ang lai India leh China ramte chu emerging economies bon lutuk an nih chhoh mek lai hian heng mnc (Multi National Company) zawnga kal ngam Mizo ṭhalaite tan chuan... hna zawn kawng hi chu huau a ni ringawt mai.

Dik tak chuan tuna kan sawrkar thar lo piang tur hian nedp/sedp pelin ngaihtuahna seng se, vote hmanga lal leh hrim hrim ringawt ngaihtuah lo ngam bawk se chu... Self employment / enterprenuership te hi hna ṭha filawr asin. Hna hmuhna ni mai lo, midangte thlenga hna ṭha siamsak ve theih hi kan Mizo Kristian ṭhalaite birth right a ni ve tho asin.

Han sawi tak tak chuan hna chu a lo va tam hmel si em... Ngati nge hna kan hmuh harsat em em si kan tih chuan - kan hna tih leh kan hna zawnna area hi kan zauh a ngai a ni ber mai. Keimah ang talin Mizoram leh hnam hmangaih vangin Mizoram pawnah rawn feh chhuak ve rawh khai. Mizoram state te reuh te, sum harsatah hian hna min pe thei mumal lo a nih hi. Mizo tan Mizoram tluka nuam a awm lo, a awm tak tak dawn chuang lo. Chu kan ram neihchhun, kan pianna Zoram nuam chhawrpial iang ngei mai chu khawvel laili nihtir thei turin... I feh chhuak ve hlawm teh ang u. India rupiya chu sawi loh dinar, dollar, pound tih vel khawvel zau zawk aṭangin Mizorama chhungte tan i han pump lut tak tak ang u hmiang maw le.

Kei, Serchhip zu zuar venga sei lian tak ngial pawhin kum 1992 ah daih tawh khan ka pianna ram leh hnam chu hmangaih leh ngai em em chungin ka pem chhuahsan luih asin le. Dik tak chuan Mizoram sawrkar ah khan group A Officer hna ka thawh mek lai a ni a. A hminga officer nih ve ngawt, tihtur awm mumal si lo kha mahni pawh inthiam thei ngang lovin chu ram leh hnam tan chuan nakin atan pawh ka ṭangkai lehzual theih tak mialin, tiin hmangaih lehzual thei tura ka pem bosan kha tunah ka rawn haw hlen dawn ta a nih hi le. Kan mizo Kristian ṭhalaite talent nei ṭha lutuk hote hi fine tuning sak a, Mizoram pawnah India ram leh khawvel zau zawkah kan Pathian, ram leh hnam tana tent maker missionary ni thei tura buatsaihtute zinga mi, heti lam zawnga fatu 1 ni ve turin... There i come home... Ka rawn ti vei roh a nih tak hi.

Mizoram Synod-in a rawn tuipui chho bawka over hlekin ka lo phurpui tak chiam chu. Mizo Kristian tribal ang hian a va changkan theihin, thil ṭha leh ropui hi kan va ti ve thei tak em. Ka unau, Mizo Kristian i nih chuan harh rawh, zuang rawh. Pathian fate, Mizo Kristiante kan che nawi reng thiang lo.

- Hriata chhangte