Heti em ema rei Zan Curfew hi Human rights bawhchhiatna a ni em?

Mizoram sorkar chuan khawpuiah zan lam curfew a la puang chhunzawm zel a, a bikin Aizawl khawpui hi kum 2020 Covid-19 a rawn hluar aṭang khan zanah curfew hi chhum lo chat lovin an puang a, hei hi media hrang hranga police lam thusawi leh tih leh sorkar lam thusawi nia an rawn tarlan aṭanga en hi chuan sualna venna atan mai maia puan a niin a lang tawh a, Covid-19 dona chhuanlama hmanga sual dona tura zan curfew puana mi fel leh mi ṭhate zalenna hup behsak hi Human Rights palzutna a ni lo maw?

Keini ang duang dan lam hre ve lo tan zan curfew puan luih tlat hian human rights a kalh leh kalh loh kan chhut ve thiam si lo va, awm hmuna tar phunchiar ang maia phun bak hi tihtheih kan nei lo va, sualna dona hmanruaah zan curfew an puang a nih chuan Synod Pastor inhmuam ûp leh UPC Tirhkoh zuk leh hmuam ti lova tûm deuh hmânte hi zana ruihhlo zawnga vak vak ṭhin leh ṭhalai teihawite nen hrut rualin kan awm a, chumi tuam mawina atan chuan 'Covid Dona' tih hming lem an phuah tiin kan sawi thei a ni.

Zan curfew puan hian ṭhalai zan leng tur a veng tih mai mai hi thil ho tak a ni a, hman nia an ziak ang khan zana lirthei veivak chiah a ni Police te hian an ven mek tiin kan sawi thei ang. Aizawla kawngpui dung Ṭhuampui leh Saikhamakawn inkarah hian lirthei tlan tur an veng a, lirthei hian Covid-19 a tidarh lo va, mihringin an pu darh zawk a, mihring chu kawngpui dung bak zawngah zan lamah an tei suau suau a, chumi vengtu tura duty pawh dah thei chuang si lova zan curfew puan ringawt mai hi chu a kawng hmang lo va ni.

Zan curfew hian kan human rights a bawhchhia nge bawhchhe lo tih hi mithiam zawkte chhan atan lo khek ta pawh ni ila, kan nun chu a tibuai a ni.

- Samuel Laldinsanga, CV