BENG VAR NAN

Mithiamten uluk taka an lo chhut danin kumin thla thum kal ta chhung khan natna tlanglawn hrang hrang aṭanga khawvel puma thihna thleng zat hetiangin an chhinchhiah.

Covid-19 314,687

Malaria 340,584

Mahni intihlum 353,696

Motor accident 393,479

HIV 240,950

Zu 558,471

Mei zuk vang 816,498

Cancer 1,167,714

Covid-19 natna 81% hi a nep (mild), 14%, na lutuk lo (moderate) 5%, na zual (serious) a ni a, chuti a nih chuan lo kai ta pawh ni ila damna chance a sang hle a ni.

Kumin May 1 khan khawvel pumah mitthi hetiangin an awm:

Covid-19 vangin mi 6,428

Cancer in mi 26,283

Lung tha lo in 24,641

Zunthlum 4,300

Khawvel pumah Covid-19 hri vei maktaduai 269 chuang an awm a, thi maktaduai 5.31 an awm. India ramah maktaduai 34 chuangin an vei tawh a, thihpui maktaduai 4.74 an awm tawh. December 12 hian Mizoramah chuan 1,37,952 in kan vei tawh a, mitthi 513 kan awm a; hei hi chawhrualin khawvel pumah a vei za zelah thi 1.971 awm ang an ni. India ramah a vei za zelah thi 1.369 awm ang a nih laiin Mizoramah chuan a vei za zelah .372 (pakhat tling lo) kan awm a.

Chhut awlsam zawk nan Mizoram­ah chuan a vei zathum zelah pakhat thi ang kan ni. Chutih laiin India ramah chuan mitthi hi kan let 4 chuang an ni a, khawvel pumah chuan kan let 6 an tling. Hei hi enkawlna kan neih that vang a ni kher lo thei e. Khawvel zau zawkah damdawi leh khawlte leh thawktute an indaih zawkin a lang a. Chuti chunga kan rama hmanraw tlachham tak chung leh enkawl theihna hmun changtlung pakhat chauh Zoram Medical College, Aizawlah kan nei chunga kan thihna rate a la hniam hi thawktute inpekna leh Pathian min venna a ni tih i hria ang u.

Tun hnaiah kan hriat angin natna hrik insiam danglam Omicron a lo chhuak leh a. He hri chhuak thar hi a huphurhawm hle nain hmana natna hrik insiam danglam mai a nih avangin invennain enge maw chen a ti nep thei tih hriat tur a ni. Chuvangin, invenna a kimin la ṭheuh ila a duhawm hle. He natna hi pumpelh theih a nih avangin hmaituam, kut sil leh inhlat tawka awm hi ching zel ila. Insawiṭhaih lutuk a ngai lova, mahse fimkhur chuan pumpelh theih natna a ni e.

Krismas hunpui te kan hmachhawn a, Biakin leh zaikhawm te mi tam takin kan chak hle tawh a ni. Amah­erawhchu, kan zai hian natna hrik tam tak kan hamchhuak a, chu chu Biakin leh in chhungah a nih phei chuan boruakah langin midang tan hip luh a ni nge nge ṭhin a. Hei hi natna inkaidarhna awlsam tak a ni tih hriain kan hma hunpuiah hian midang tana natna kaitirtu emaw, midang natna aṭanga kai lo turin i fimkhur ang u.

- Dr. C. Biakmawia