BETHLEHEM KAN THLEN HUNIN

Lal pian hun cham­pha kan lo hnaih leh ta. Lalpa thilsiam zingah chuan mihringte hi bengchheng ber, thuawih lo ber leh buai ber kan ni. Kristiante hunpui christmas pawh buai reng rengin kan thleng ta fo mai.

Ramhnuaiah va kal ila, nungchate chuan Bethlehem min pan zawh san ta emaw tih mai turin an reh ta ṭhuap mai. Chutiangang bawkin thli te, chhumte leh ruahte pawh an bi bo zo ta. Ni pawhin khawchhak mifingte kalna kawng hlui a zawh ta emaw tih mai turin a zinkawng thui takah chuan a kal zel a. Lal thar hmaah a ding ta emaw tih mai turin a enna hlipthlain a lo dul ruih ta mai le.

Kan chenna khaw­vel pawh Bethlehem daireh lam chu pan zelin chhun zan zawmin chawl hauh lovin a vir muai muai reng a. Nakin lawkah chuan khawvela thilsiam zawng zawngte chu kan chenna khawvel hian Bethlehem hmunah chuan min va thlen dawn a ni.

Bethlehem mual­pui chu ralkhat aṭanga a lan theih hunah phei chuan khawvela kristian tluklehdingawn telte chuan kan thlen huna kan awmdan tur ngaihtuah chungin kan inbuatsaih leh mup mup ngei ang.

Lal thar lo piang chibai buk turin nang leh kei a thinlung leh ngaihtuahna, nundan te hi kan siam fel phawt a ngai. Kan nitin mamawh avanga kan buainate chu lalpan a lo ngaidamin a rinawm. Mahse tam lehzual neih duhna avanga duhamna te, chapona te, hausak duhna te, dinhmun sang zawk nih duhna te, ropuina te, lan mawi duhna te, hmingṭhat duhna te, hengte hian kan thinlung, ngaihtuahna leh nundan a tibuai reng a. Hengte hi lalpa duhzawng a ni lovang tih ring nghet ila, Bethlehem bawngin tlawm panin hmanhmawh taka berampute kalna kawng chu kan zawhve hunah chuan heng min tibuaitute hi kan chhawm zel a rem tawh dawn lo.

Kan nun tibuaitu zawng zawngte chu tunah kan paih a hun a, lalber hmaah kan ṭhingṭhit hunin kan va paih chauh a nih chuan lalpa ngaihdan pawh a ni lovang. Mari thinlung tlawm kha vantirhkoh hmaah a titlawm chawp a ni lova, a hma daihin a lo tlawm sa reng tawh a ni.

Pa famal neih­chhun tlawmna puan nema rawn sinna hmun tur vantirhkoh chuan thinlung leh nun tlawm chu a rawn zawng zel a, Mari thinlung tlawm chu an rawn chhui chhuak ta a ni.

Arsi eng mawi dinna hmun chu kan thlen hunin he thu hi kan thinlungah lo thang leh se:- kan lalber hmaah kan kun hunin lawmna thinlung chu kan hlan ang a, kan tana a pianna bawngin tlawmah chuan min rawn thlen ang, a thlamuanna thu chu.

- H. Neihchungnunga, Durtlang North