POLITICIAN-TE INBEIHNA

Sky Walk leh Ropeway chung changah Politician ṭhenkhat inbeihna a thleng mek nia hriat a ni a, court hial a thleng tawh bawk nia hriat a ni. A bik takin sorkarna fawng lo chelh tawhtute ve ve Congress leh MNF Party te pahnih inkarah hian hetiang hi a vawikhat thlenna ni loin hun hmasa lamah pawh a lo thleng zauh zauh tawh nia hriat a ni a, a tawp dan erawh mipui lamin kan hre mumal meuh ṭhin lo.

Tun ṭumah erawh hi chuan a tir aṭanga a tawp thlenga mipui lam pawhin kan hriat ngei han inbeisei ngawt ila, thil nihna pawh chiang taka hriain a dik lo pawh chiang taka hriat inbeisei ila a ṭha ang e.

He Ropeway siamna tur hian Central sorkar aṭangin cheng nuai 1241.29 chu Mizoram sorkar (Congress Sorkar)in a dawng a. Chutih lai chuan a hnathawktu tur, JV NEIP hnenah chuan kan sorkar chuan Central aṭanga kan pawisa dawn aia cheng nuai 76.50 zeta tamin pawisa a pe chuang a ni awm e.

Chutiang bawk chuan Skywalk siamna atana Central sorkar aṭanga cheng nuai 242.50 lai mai chu min rawn pek a nih laiin Mizoram sorkar (Congress Ministry) chuan hnathawktu hnenah cheng nuai 283.50 a pe tlat mai bawk a nih chu. An hnathawh lah chu hmuh tlaka lawi a awm meuh bawk loin an thawh hun chhung, 2017 September thla aṭanga thla 16 chhunga thawh zawh tura sawi a ni a, vawiin thlengin thawh zawh a la ni lo.

Hetianga kan pawisa dawn aia kan pek chhuah a han tam viau chhan hi hriatthiam har tak a ni a, sum pekchhuah hun lah inang thlap thlapa sawi a han ni leh zel bawk hian awmzia engemaw tak a awm nia rin loh theih loh a nih phah ta. Keini ang rual tan chuan hriatthiam a har tulh tulh mai a, a ngaihna reng kan hre phak lo a ni.

Chutih mek laiin rinhlelh kai deuh nia hriatte lah chuan Court lama kal an choin CBI hial chhuitir ngei an han duh zawk mauh mai bawk a, hetia ngaih mai chuan he thilah hian an fihlim a ni mai awm mang e a tih theih. Lo fimhlim ta ni sela, Court lamah pawh hian thiam lo chang ta zel pawh nisela Mizoram mipuite hian chawimawi tlakah kan ngai ang em, pangparṭhi awrh tir tlakah hian kan ngai ang em tihte rilruah a rawn awm nghal bawk.

Tute emaw chuan uchuak takin Tawlhlohpuante hi an lo bah tir leh mai ang em tihte pawh rilruah a awm. Mizote aia Politician-te uchuak taka chawimawi ching hi hnam dang an awm ve ang em tih ka ngaihtuah chang a awm fo. Jail tang an rawn chhuah pawha lo ‘Halelui’ duh khawp hnam kan nih tlat avang hian kan inbawl deuh mah mah em pawh a tih theih bawk ang.

Chuvangin, tuna kan Politician ṭhenkhatte’n inbeihna hmanrua atana an hman mek pawh hi court lamin felfai takin an rawn chingfel turah ngai ila, mipui lam pawhin thudik tak kan hre ngei turah lo ngai ila a ṭha ang. A nih loha hotea a zuzi a nih hlauh chuan kan Politician-te hi rinngam an har tawh ngawtin a rinawm.

Tunhma lama hetiang thil a lo thlen changa a tawp lama a zuzi thu kan lo hriat zauh zauh tawh avangin tun tumah hi chuan ni tawh lo hram sela a duhawm ngawt mai. OPD Floor khat bo chungchangahte pawh khan tute emaw chu mualpho ngei tura ngaih a nih laiin engtinnge a tawp mai tak kha? Agriculture Department-a cheng nuai 63 emaw ni bo chungchanga Inquiry Commission meuh kan din hnuah pawh khan engtinnge a tawp dan kha? Heng chauh lo pawh hi sawi tur ala awm nual awm e.

Tunah erawh hi chuan ṭhangtharte ngei pawh ram leh hnam hmangaihna kawngah an ṭhangharh tawhin ram hi an vei takzet tawh a, chutih laiin ramhlui zia anga kal tum kan Politician zingah awm an la awm tlat hi chuan thil buaithlak hi a thleng mai ṭhin a ni. Thil kal tawh chu sawi sawi pawh ṭul loah ngai ila, kan hun tawn mek aṭang hian hetianga Politician-te inkara inbeihna tura thil a lo awm hian fiah felfai takin a tawpna hi hriat ni ṭhin sela a mualpho tur tur pawh mualphoin thudik tak hi hriat ni ṭhin ngei sela ram hruaitute hi rinngam an ni lehzual thei ang.

Chutih lai chuan Political Party lam pawhin anmahni zingah sual inthup tumna awm bawk lo sela, an zingah kutkem nei emaw thianghlim tawk lo an lo awm a nih pawhin a thlavang hauhin au au bik suh se. Pathianthuah pawh kan hmu - Israel sipaite’n khaw tereuhte Ai khua an hneh loh chhan kha anmahni thianghlim tawk loh vang a ni. An zinga mi ṭhenkhatin puan manto leh rangkachak an lo paipawn ruk vang a nih kha.

Politician-te inbeihna hmanrua hi hetiang mai mai a ni tur pawh a ni lo a, mipui tana hna an thawh ṭhat leh ṭhat loh lamahte hian inbei tur zawk an ni. Kan Party lian pahnihte inbeihna hmanrua ngei pawh hi kum sawm ve ve sorkarna an lo chan tawha an hnathawh ṭhatah te khan ni zawkin mipuiah debate te nei hial zawk sela ṭha tur a nih laiin tunah chuan an thil tihsual an inzawn sak emaw tih mai tur a ni zawk hian kan thlen chin la san lohzia min hriattir thei ang.

Zoram hmasawnna turin hna tam tak an lo thawk ve ve tawh a, an hnathawh rah pawh mipuiin a zar kan zo bawk reng laiin chu aia ṭhaa hnathawh tum zel zawkin vawiin hi thleng ni zawk ila chuan he ram hian nasa takin hma kan sawn ngeiin a rinawm. He ram hian hmangaihna tak taka nena ram hruaitu a mamawh ngawih ngawih laiin kan ram hruaitu zingah erawh hmangaihna pianpui hauh lo ang maia thiltihtheihna hmanga ram sawisa (sawisa tih hi a mawi lo deuh em?) awm anga kan han hriat hian thinlung a na ṭhin.

Chutiang ai chuan ram tan an theihtawp an chhuah a, vawiin hun hi min thlenpui a ni tih mipuiin hre zawk ni ila chuan kan ram hruaitute hi Mizo mipuite hian tun ai hian kan chawimawi nasa zawk daih ngei ang.

- Mahmuaka Chhakchhuak