THIANGHLIMNA LEH MEDIA
Media hi kan inbiak pawh tawnna hmanraw ṭangkai a ni a, mi tam takin a ruala kan dawn theih leh kan hman ṭangkai hi mass media an ti. Tin keimahni ngeiin kan awka leh chetzia a thu awmze neia kan entir reng reng hi media chuan a huap tel vek a, hei hi Presentational media an ti a ni.
Khawvel ṭhang zelah hian mihring nun hi a khawih danglam hle a, a ṭangkaina sawi tur tam tak a awm laiin a ṭha lo zawnga hman theih hi tam tak a awm a ni.
Kan khawtlang leh Kohhranah hian media hman ṭangkai dan hi tun aia nasa hian in zirtir ṭhin ila. He kan in zirtir aṭang hian khawtlangah leh Kohhranah nasa takin hmasawn pawimawh tak kan lo nei tihna a lo ni dawn a ni.
Kan hriat hauh loh laia min zirtir rengtu chu kan thil hmuh leh hriat hi a ni ṭhin a, heng te hi mass media-in a keng tel vek a ni.
Tunlai sualna langsar zual mipat hmeichhiat hman dik loh hlemhletna hrang hrang zu leh damdawi hman khawloh dan bawhchhiatna tharum thawh leh tualthah thleng hian mass media chuan a huam a, thil ṭha lo tam tak karah hian mihring te thianghlimna hi a bo zo vek ṭhin a.
Heng thil a hranpa in sual ti turin min fuih hauh lova, kan rilru lamah nasa takin min kai peng ṭhin a, lehkhabu chhiar leh film en aṭang te hian kan khaw hawi kan ti zauh viau laiin a ṭha lo lam pawh zir tel a hlauhawm khawp mai.
A tira sual anga lang lem lo pawm zam hian keimahniah sualin hmun a khuar zui duh viau. Tunlaia hmanraw ṭangkai taka kan neih computer te pawh hi telephone a thlunzawmin internet aṭang hian kan thil hriat duh engkim mai hi awlsam takin a hmeh chhuah zung zung theih a ni. Heng thil hmang ṭangkai duh tan chuan thil ṭha tak a ni awm e.
Internet aṭang hian sakhaw duk dak lo thil tam tak min zirtir mek bawk a, USA rama sakhaw kal sual pakhat an sawi ṭhin, Heavens gate an tih ho pawh khan internet webside hmangin an thurin an vawrh darh ṭhin an tih ṭhin kha kan la hre ṭheuh awm e.
Hetiang thil ṭha lo tam tak hi hmuh tur leh hriat tur a tam leh nghal a. Media lama hma kan sawn mek lai hian heng kan hmasawnna te hian kan nun a ti bawlhhlawh thei em tih te hi in zawt ṭhin ila. Thianghlimna kawng ata min hruai peng em tih a in zawt chung zelin fimkhur tak leh uluk tak a heng kan media te hi kan kal pui a pawimawh tak zet a ni.
- George L.Ralte