Kan nunphung kal sual palh i siam ṭha ang u

Mizo ka ni a. Nikhua ka lo hriat chhoh ve aṭangin kan hnam nunphung lo kal sual chho nasa hle tawh chuan kei pawh mi hrut tel chho zel a, kal sualah pawh ka lo inngai mang ṭhin lo.

Mizo zingah mipa fa an pianin 'ral that tur, mi huaisen,' hmeichhia an pianin, 'sial man tur,' an ti a; hei hi Mizo nu leh pate thuhla a ni. Kum zabi eng emaw ti lai aṭang tawha ngaihdan kan lo in rochun a ni a, he ngaihdan kal sual hi a hnam pum huap chuan kan la vei zel. Kal sual hi erawh chu a siam ṭhat theih.

Tun hma daih tawhah khan Mizo chhungkaw nunah, khawtlang hriatpuiin, mipa chu ral hlauh laia muantu atan leh ram hna buru deuh thawk thei zawk a nih avang te in leh hmeichhia chu awm hmun leh eirawngbawl te an inhmeh deuh zawk avangin, hna insem thu-ah, kan pi puten hmeichhia leh mipa chan hi, chhungkuaah an lo thliar hrang hle a. A thuphungin a awm ve angreng viau thei bawk a. Mahse, chu ngaihdan tlangpui chu denchhenin mipaho chuan an handamna atan an changchawi thiam hle.

A awm lo thleng pawha sawisel a hlawh pawhin, a inluling thei zawkah an ṭang tlat si a. Changkannain han tinep deuh mah se, pawi tham takin he thil kal sual hi a la buaipuiawm zel rih tho mai. Vanglaini chanchinbu 1 May 2018 (phek 2) khan thlalak a lo chuang a, Thlalatu: Kima Hnamte a ni. Thlalak chu: Thingphur haw lam tih mai a ni.

Chutih lai chuan thing­phurte hnungah khan, an pa nge tlangval chu, hrisel hmel tak tak si, ipte a thil tlemte ak a, thingphurte chhawma koki ruaka kal ve kha a lo lang bawk a. Kha thlalak kha thla latu leh chanchinbu-in a chhuah chhan chu tar lan a ni lo nain, khawpui leh thingtlang huapin Mizo hnam nun­phung a rawn thai lang chiang hle in ka hria. Vanglaini chan­chinbu hnenah lawmthu hrilh pahin, ka ngaihdan nen ka han chhun­zawm zui ta ngawt a. Ka ngaihdan mai a ni a, a thla neituten min lo ngaihthiam ka beisei.

Mizo chhungkuaa tihdan phung pangngaiah chuan, unau zaa hmeichhia chu, ram lama ṭulna bakah, in chhungah chuan englai pawha ṭul reng tura ngaih a nih laiin, mipa erawh chu awm awl a, hmeichhe siamsa ei mai tura ngaihna a awm tlat ṭhin. Inchhung nitin mamawh kal zel bakah, thingtuah tuichawi, buhden leh ei rawngbawl te hi mipa pawhin tih vek zawk awm, a chak lo zawk hmeichhe tih tura dah ngawt ṭhin hi kan hnam hrivei pawi tak a ni. Nu leh pa fing chuan hei hi an lo kalsan zel tawh.

Kan Zosapten YLA (YMA) min lo dinpui pawh khan a thupui atan "Kristian nundan ṭha ngaihsan" leh, 'Zofate hmasawnna ngaihtuah' tihah te hian, chhungkuaa in lam hnaa Mizo mipa awl tura inngaih sa tlatna rilru kha an ngaimawh tel ni hialin ka ring. Entir nan Mizo hmeichhia chu, a naupan lai aṭanga a puitlin thlengin, zing thawh aṭanga zan mut hun thlengin, a dam phawt chuan, in chhung pawimawh thawka

ṭul nileng tura ngaih leh, mahni pawh chutianga inngai a nih laiin, mipa vethung chu awm rawlai leh len khawthawn mai mai kha a 'hun awl hman ṭhat' a ni mai a, ngaihdan phung kal zel pawhin chu chu a hriatthiampui tlat.

In lama ṭangkai tlanna hi Mizo chhungkuaah, a hmei a pa tan, YMA chhang aṭanga YMA kal zelah, Sunday Sikul, nitin sikul chhungkua leh khawtlanga inzirtir a ṭul tak meuh a ni. Kan hnam hi kan la naupan deuh avang leh Kristiannaiin min hneh hma phei chuan, ṭha leh ṭha lo thua mi mai ngaihdan pawh vantlang ngaihdanin a lo chhilh hneh ṭhin hle mai a. Tun hma chuan (tun thleng pawhin a ni em?) nupui nei tawh te pawhin, ram lam hna buru an thawh tawh chuan, in lama sekrek khawih te leh nauawm te leh ṭul dang pawimawh ngei ngei pawh, an ti peih lo ni lovin, rilrua ṭul ti ve chung pawhin, thaibawih nih a hlau tlat a; tlang ngaiha awm reng a nih loh chuan, ina awma hmeichhe tih theih lo tih pui chu, hmeichhe ngam lo leh taptawm nih a duh loh avangin, an inah chuan awm tam loh a tunn tlat ṭhin.

Tunah erawh chuan mahni chhia leh ṭha hriatna ṭheuh, zalen taka hmang ngam ṭheuh kan lo ni ta. Tunah hian Mizo Kristian chuan 'Chanchin Ṭha-in kan rama ramhuai a um bo ta’ kan tih zingah, tuna ka han sawi pawh hi um bo tel ve ngei se, kan lo kal sual palh tawhna pawh hi siam ṭhat ni ngei se a va lawmawm dawn em!

- Rev. Rokhuma, Mission Veng