Assam Rifles hmanga Politics khelh hi sim rawh se

July ni 5, 2018 Ningani-a Vanglaini chanchinbu chhuakah khan "September 30, 2018 ral hmain Mizoram Bru-te lak lêt tum a ni" tih thupuia hmangin Home Minister Rajnath Singh-an July 3, tlaia Mizoram CM leh Tripura CM te nen New Delhi-ah Mizoram Bru, Tripura-a relief camp-a cheng mekte Mizorama lâk lêt dan tur an sawiho thu lo langin; paragraph tawp ber dawtah khan "Meeting-ah hian, chief minister Lal Thanhawla chuan, Zokhawthara Ṭiau leia Assam Rifles-in sumdawnna bungraw phur truck an dang chu ngaihven tur leh, lirtheite chu Assam Rifles-in a rang thei ang bera chhuah theih nana hma la turin Union Home Minister a ngen a. Zokhawsang, Aizawla Assam Rifles sawn chungchang a sawipui bawk" tih a lo lang a. Hemi hma daih June 18, 2018 khan Mizorama Investigative Journalism kalpuitu The Frontier Despatch chuan '"Mizoramah Assam Rifles an awm a ṭul tawh lo" tiin State sorkarin Home Ministry a hrilh tih' thupuia hmangin, June 14 khan a ziak bawk a. Mizoram sorkarin AR te chhuak tura a duh chhan langsar zual a tarlan te:

Tun hnaia AR-in anmahni thua Zokhawthara bungraw phur truck an danchah ringawt avangin state sorkar a thinur hle a. May 12 aṭanga AR in Zokhawthar lei kaltlanga bungraw phur truck an danchah ngawt chu Champhai DC (Bawrhsap) pawh hrilh hriat a ni lova; ramri bula chengte tan dam khawchhuahna a nih vangin lirthei danchah chuan mipui lungawi lohna a thlen avang leh Champhai DC-in an danchah chhan a zawh pawhin ṭanchhan mumal tak sorkar laipui aṭanga lehkha lokal an nei lo leh Mizoramin sorkar laipui aṭangin engmah hrilhhriatna an dawng bawk si lova, Mizoram sorkar chuan ngai thutakin Assam Rifles hi Mizorama an awm a ṭul tawh lo niin Home Ministry-ah an thlen tih TFD hian a tarlang a.

Mizoram sorkar hotute ṭanchhan zawng zawng hi dawt mai a ni. February ni 5, 2018-a Ministry of Home Affairs Border Management I Under Secretary Jitendra Kumar Jha in lehkha a tih chhuah (No.1/6/2014- BMII) number IV naah chuan Movement of Vehicles across international Border tih thupui hmangin hetiang hian tarlan a ni. "At present, there is no agreement between India and Myanmar on Motor Vehicles crossing International border. Therfore, concerned State Government/ Border Guarding Forces must ensure that there is no unauthorised crossing of vehicles at International Borde, except with specific approval of Competent authorities" tiin. Tun dinhmunah India leh Myanmar-in Ramri kana lirthei kaltir chungchangah inremna an la nei lo a. Chuvangin, State sorkar/ ramri vengtu sipaiten ramri kanin lirthei engchi mah a kal kai lo a ni tih an tichiang tur a ni, (an kal tlangtir tur a ni lo pawh a tih theih ang) Thuneituten kaltlang an phalsak bika te chauh lo chu. He lehkha hi Commissioner (Home) Gov't of Mizoram, Director General of Assam Rifles bakah Mizoram, Manipur, Nagaland leh Arunachal Pradesh DGP theuh te an pe vek a ni.

March ni 15 2018 a Ministry of Home Affairs Border Management -1 Div Under Secretary Jitendra Kumar Jha in lehkha a tihchhuah (No 1/6/2014-BM II) leha Number 8 (vi) ah chuan "All IMB States to ensure that there is no unauthorised crossing of vehicles at IMB border" tiin a dah leh a. Hei hian state sorkar a hriattir chian zia leh ramri kanin lirthei engchi-mah kal kai tir lo turin a hrilh nawn a ni. He lehkha hi Commissioner (Home) Gov't of Mizoram, Director General of Assam Rifles bakah Mizoram, Manipur, Nagaland leh Arunachal Pradesh DGP theuh te an pe vek a ni. He lehkha hi Mizoram sorkar (State) hian a haider zel em ni zawk?

May 7/2018 ah khan Headquarters, 23 Sector Assam Rifles chuan Mizoram sorkar Chief Secretary leh DGP hnenah "Effective implementation of Free Move Regime Along Indo-Myanmar Border-Mizoram " tih thupui hmangin lehkha an thawn a. Hetah hian March 12, 2018 a MHA (MB-1) lehkha, Mizoram Government Gazette Notification (2003) aṭanga Free Move Regime chungchang lakchhuak copy leh, Gazette of India No 403, July 21, 2010 a tihchhuah copy an thil tel a. Tin, MHA (BM-1 Div) lehkha angin Free Move Regime para1(a) ah Assam Rifles te chu hmala tura tih an nih thu leh chumi kal zelah Zokhawthar Ramri lei kana lirthei kalkai tur danchah tur chungchang an hrilhre bawk.

"Lirthei kalkai tur dan chah chung­changah Champhai Bawrhsap an hrilh hre lo" tih khi chu Mizoram sorkarin a tihtur a tih loh vang zawk niin a lang. CS leh DGP an hrilhhre tawh a, state sorkar chuan DC te hrilh chu a bat a nih hmel e.

A chunga lehkha pawimawh kan tarlan Ministry of Home Affairs Border Management -1 Div Under Secretary Jitendra Kumar Jha ziak aṭang khian "Sorkar laipui aṭangin hriattirna kan dawng lo tih leh Assam Rifle ten lehkha pawimawh phawrh tur an nei lo" tih khian Mizoram sorkar dawtsawi zia a tichiang awm e.

Engvangin nge Mizoram sorkar hian mipui hnenah dawt hrilh a, engmah an hriat loh thu an sawi tlat?

Meeting na engkimah telin, meeting minutes thlengin an dawng vek si a, mipui dawt an hrilh tlat?

Engatinge Assam Rifles Mizorama kum 100 chuang lo awm tawh hi hnawk an tih tak em em? Zirtirtu leh health worker takngial pawh an awm duh lohna khua, km 60 chuang te kea kalin mahni ration phurin post an luah a. An awmna khua tan medical, education, civic action nasa takin an kalpui mek lai hian politics-a hamṭhatna beiseiin inthlan kumah AR te chu Mizo mipui tana hnawksak anga sorkarin lantir a tum em ni?

Mizoram police kan ring tawk an tih lai hian AR ho post ah hian nitin zatin helho umchhuak leh hnu chhui hian Mizoram police hi an kal ve peih em? Mizoram police te hi border ah dah ve se engtin nge Mizoram sawrkar hian ration pek a tum?

Kawmzawl aṭangin Helicopter-a load-in, Parva leh Tuithumhnarah a thlak a. Chumi ration va la tur chuan an border post aṭangin kein ni 3 te kal a ngai si a, an tlin ang em?

Anih heng khaw kilkawr tak leh thingtlang khua, Health Worker tak ngial pawh awm lohna te hi AR hian chhuahsan ta se khaw mipuiin khawiah nge First Aid an dawn tak ang? An awmna khuate hian damdawi hmanga enkawlna an dawnna berte an ni a sin. AR awmna thingtlang khuate hian emergency thilah damdawia enkawlna hi Mizoram sorkar aiin AR hnen aṭangin an dawng tha zawk lo maw?

Kan CM khan Zokhawsang lama sawn chungchangte a sawi kai a; an sorkar hmasakah Assembly House-ah zawhna, “Assam Rifles te Aizawl khawpui laili aṭanga sawn chhuahna turah hian engtia hmalak nge a nih?” tih chu “Khawpui aṭanga sipai hmun sawn chhuak ta an awm ka hre ngai lo” tiin a chhang a nih kha. Kumin inthlan dawnah hian Assam Rifles hmanga politics hamṭhatna zawn hi sim teh se, tunah pawh Lammual hmar lama an hmun pawimawh chu Zokhawsang lamah an sawn mek zel tawh zawk e.

- Lallianzuala Fanai