BJP-in NEC kut a phuar em?

Central sorkarin North Eastern state-te hmasawnna turin North Eastern Council (NEC) a din a, chu council-ah chuan sum tam tham tak dahin NE state tinte'n project siamin kan thal hlawm a, hmasawnna ruhrel lian thawhnan kan hmang ṭangkai em em a ni.

Mizoramah pawh NEC sum hmangin hmasawnna tam tak kan nei a, tunah pawh NEC-ah project tam tak thehluh a ni a, hna kal lai mek pawh a awm nual bawk. Central sorkarin hetianga hmarchhak state tana council a lo din hi lawmawm tak a ni.

Central-ah BJP sorkar a lo ding a, sum pawh a tamin hmasawnna hnathawh a awlsam ngei tura ngaih a ni a, mahse North Eastern Council kut a phuar ta tlat mai erawh chu ngaihthiam a har ngawt mai.

Hna kal lai mek (on going project) pawh a kal hlei thei ta lo a, an chawl ta ṭhuap mai. Hmar­chhak state ten kan tuar ta mek a ni.

Sorkar chak leh thil tithei, sum leh lai pawh ren lo leka sum ngah party BJP hian vote zawn nan leh state hrang hrang sorkar, anmahni party ni lo tihchhiat nan chauh sum hi a hmang a; hmarchhak state hmasawnna tura council din NEC kut a phuar reng mai hi thil dik lo tak a ni.

Tunah hian NEC-ah project pawm tawh tam tak pawh sum pechhuak loin dah a ni a, NEC kaltlanga hmarchhak state ten hmasawnna tur kan neih theih tam tak chu dan chah a ni ta daih mai a ni. Hei hi eng vang nge tih hriat ni lo mah se BJP hian an party tihchak nan hman a tum em ni tih ngaihtuahna a awm rum rum ta mai.

Chuvangin, kan state BJP te hian aw han chhuah se, NEC kut phuar mek pawh hi an phelhtir thei ngei ngei ang. Khu lamah BJP-in ro a rel a, Mizorama kan BJP hotute thusawi pawh an ngai pawimawh ngei dawn tih a chiang a. State dangin an tih ve leh tih ve loh lam ngaihtuah lohin Mizoram leh Mizo mipuite tan Mizoram state BJP hotute hian central a BJP hotute hi dawr se, NEC kaltlanga Mizoram hmasawnna tur tam tak hren leh tih khawtlaia awm mek te hi kaltlang tir thuai a nih theih nan leh hmasawnna hna thar pawh kan thawh leh chur chur theih nan aw chhuahin hma han la teh se.

Kan state BJP hotute hian NEC sum tang tam tak awm mek hi an hre ve ngeiin rinawm a, an pute hnenah zu zualko hram teh se. BJP sorkarna state Naga­land ngei pawhin NEC kut phuar an tuar mek a, chutiang chuan an party ni lo sorkar phei chu duhsak vak ngaihna a awm lo a, kan tang mek bawk a nih hi. Chuvang tak chuan kan state BJP hotute chet a hun ta e.

- Lal Rinmawia