MLA thlan hun a hnai ta

Kumin kum tawp lamah kum 5 chhung atana kan MLA tur kan thlang leh dawn a, tun dinhmunah chuan MLA inthlan hi rorellai Indian National Congress (INC), sorkarna lo siam ve tawh Mizo National Front (MNF), MLA pakhat mah la nei lo Bharatiya Janata Party (BJP), pawl hrang hrang intelkhawm MLA inthlan la hmachhawn ngai lo Zoram Peoples' Movement (ZPM) leh tun hnaia political party-a inlet PRISM-te'n inthlan an hmachhawn dawn niin a lang.

Inthlan chuh tum party zingah hian INC, MNF leh ZPM-te hi an thawm a lian deuh a, BJP hi chu minority tama hmuna MLA an nei ve hlauh a nih loh chuan hmun dangah chuan ka beisei pui lo. PRISM lam hi chuan MLA pakhatmah an neih ka ring lo a, an nei a nih chuan thil mak takah ka ngai ang.

ZPM lam hi an thawm a lian ang reng a, mahse inthlan dawn tak takah chuan political field lama tawnhriat nei ṭha INC leh MNF lam hi ngamin ka ring lo. Tin, Mizoram politics dinhmun kan zirchian hian, tun dinhmunah chuan unit nei lo tan chuan survive theih lohah ka ngai. ZPM lam hian unit ang deuh chu an han din chho ve ṭan a, mahse an che tlai ema an insawh nghet hmanin ka ring lo. Tun inthlanah hian inthlan hma hun tlem la awm hi an hman ṭangkai thiam chuan a bik takin khawpuiah MLA neihna chance chu an nei veiin ka hria.

ZPM tan chuan tun inthlan lo awm tur hi insawhnghehna hmun atan hman tum se, inthlan leh hun thlir zawk se an tan a ṭha zawkin ka hria. Chutiang ni loa, tun inthlana an chet ṭhat loh avanga an kehsawm leh nghal a nih chuan ZPM hi engtikahmah an sorkar ka ring lo. ZPM lama hming langsar deuhte han thlir hian an inhui khawm thei reng a ngem tih hi ngaihtuah ngai tak niin ka hria. Zuang lawr tia sawi ṭhin te, inthlan dawn chauha rawn inlar tia sawi ṭhinte an ni hlawm tlat.

Tun inthlana in fight ber tura ka ngaih chu MNF leh INC-te hi an ni a, an candidate siam danin kawngro a su khawp ang. MNF lam hian mi thar ṭha tak tak an nei dawn niin a lang a, chutihrualin an hruaitu mipuite'n kan nin tawhte hian candidate an chan leh tho chuan sorkarna chance an neih chhiat phah ngeiin a rinawm. Huaisen taka candidate an siam a, party lama junior zawk, mahse mipui hip zawk tur site hi an theh chhuah ngam chuan sorkarna an siam a nih pawhin thil mak a ni lo ang.

INC lam hi seat 34 nei lai an ni a, sorkarna siam lo tur chuan seat 14 an hloh a ngai. Chutihrual chuan tlakpui kumah chuan seat 14 hloh hi thil harsa a ni hauh lo ang. Ka lo hriat ruk danin, Congress lam hian candidate hmel thar an nei nual dawn niin a lang. An MLA nilaite hi term hnih leh ai aia tam MLA tawhte an nih fur bakah, kum lama upa tawh tak tak an tam a ni. Hmel thar zawk nena inthlan an hmachhawn a nih chuan sorkarna siam leh tura beisei awm ber an ni ang.

- Lalrinliana, Aizawl