Mipui thawhkhawm hmanga Hripui do, SEDP atan nuai 30,000!
Kan hriat ṭheuh angin Mizoram mipuite chu Covid 19 hripui vangin kan ṭap a, kan in vuiliam zawih zawih a, kan eizawnna a tawp a, mangangin kan rûm mek a nih hi. Covid 19 vanga kan tawrh nasatzia hi sawiin a siak lo.
Hetih lai hian kan sawrkar hian Covid vanga harsatna tawkte ṭanpuina tur lam Scheme/ Project engmah a ruahman kan hre lo a, Covid dona sum tam ber leh hmanrua leina tam tak hi mi inphalte thawhkhawm, CM Relief Fund a ni tih kan hre ṭheuh awm e.
State dangten hripui dona atan tiin an state budget aṭangin 35% hial te an hman phal laiin kan sawrkar chak tak hian 5% vel chauh a hmang ve tih han hriat te hian mipui hi min va ngai pawimawh lo em em ve tih awl tak a ni.
Tunah kan CM chuan kum 2022 Financial year aṭanga SEDP an kalpui ṭan tur thu leh chumi atana nuai 30,000 (cheng nuai sing thum) lai budget aṭang leh funding aṭanga an khawnkhawm tur thu a sawi leh thung a! Hripui dona atan leh hripui vanga harsatna tawk chhungkaw tan budget aṭanga ruahmanna nei duh hauh si lo, hripui dona tura budget appropriation ti tura special assembly pawh ko duh hauh si lovin SEDP atan erawh budget aṭanga ruahmanna siam tur thu a lo tlangau pui leh si hi mipui zahlohna lian tak ti ila a sual hauh lo ang.
SEDP hi engtiangin nge an kalpui dawn tih hi an la sawi chiang lo bawk. Cheng nuai 3 chhungkaw tin hnenah, NLUP dawng tawh zawng zawngte pawhin an dawng leh tur anga sawitu MNF President leh CM ni mek hian a thusawi hi a tihlawhtling dawn em? Nge ni, SEDP hi contract anga kalpuiin an Party mi leh sa invulhna atan an hmang dawn? Engpawh ni se an tum ram hi chu Serafim ten an hre tlang vek turah ngai phawt mai teh ang.
Eng le khaw le... mipui thawhkhawm hmanga hripui min dopuitu kan sawrkar chak tak hian kan budget aṭang hian hripui dona tur hi in dah phal hlawl lo em ni? Kum 2023 General Election thlir ru râna SEDP sum (mipui sum budget aṭanga hman tur) hmang hian hripuiin a sawp chauh leh sawp retheih Mizoram mipuite pumpui hnunah hian chaih kual in tum tihna em ni?
Hripui vanglai taka mipui tana Budget sawrchhuak phal si lovin SEDP tan erawh in phal rai leh viau thung hi in tumram hi mi â nileng tan pawh hai rual a ni ta lo ve. Zoram mipuite hi min zah ve deuh teh u.
- Lallianzuala Rokhum