My Dream Aizawl
India ram khawpui dangah lehkha zirin ka awm ve ṭhin a, Mizorama kan lo hawna kan khawpui ber Aizawla kan inkhuahkhirh dan hmuh hi chuan kan ram hi ṭhalaite chenna atana nual a ni hlawl lo.
He Aizawl khawpuiah ngei hian ṭhalaite zalen taka kan awm a, khawvel leh India khawpui dangte anga kan duh anga kan awm ve theihna tur hian kan sorkar, kan YMA, kan VDP, kan JAC te hian rolru zau hi min put sak ve tawh se a va han lawmawm dawn tak em.
Khawpui dangah chuan zanah hian ṭhalai inhmuhkhawmna hmun hrang hrang pub, club, party hall, discotheque, theatre hall, zan rei thlenga chawlh theihna restaurant etc etc etc hi a awm a, hengte hi Mizoram khawpui Aizawlah hian hmuh tur a awm ve mang lova ni.
A awm chhun pawh khawpui pawn deuhah a awm a, chu pawh chu a veng mipuiten an ngai thei lo an ti zel bawk si a, ṭhalai nun hi a chep a ni.
Ka thu ziah hi rawn counter in chak tawh viau ang a, ka sawi tum tak pawh ka la sawi thleng lo zawk a ni. Nangni chuan, "Hetiang hmun hi kan mamawh ve love, phai rama awm te, Sap rama awm ang hi Aizawlah kan la zo lova, kan tan a ṭha lo," tiin a khap theih theih kan khap a, chu chu kan ṭhat pui emaw in lo ti em ni?
Mizoram hi percentage a lakin drug addict tamna ber state kan ni lo maw? HIV positive rate pawh Mizoram hi a sanna ram kan ni a, kan ṭhalaite khawvel hmun danga mite anga an len khawthawnna tur kan khap sak zel a. VDP leh YMA duty ten kan khap avanga ṭha tura ngai kha HIV hmangin kan khap awmze neih lohzia a rawn lang bawk. Drug addict an pung zel a, ṭhalai hi chuan len thawvenna an mamawh a ni.
Mi zawng zawng hi KṬP tih leh ṬKP angah hian an tui theih loh avangin chumi a tel leh tel lote tan pawha zan lama an hang out na ve tur hi chu an mamawh khawp mai. Chu chu a ṭha lo tiin khap zel kan tum a, chutiang awm tamna khawpui hrang hrang aiin drug addict rate, HIV rate, zu ngawlvei rate a san bakah UPSC-ah pawh kan tling thei lo zawk a ni.
Tuna NGO hmanga inkhap awm lohna hi 'My Dream Aizawl' chu a ni a, chu ka Aizawl duhthusamah chuan Krismas dawna 'Covid Venna pawh ni lova Crime Venna Curfew' pawh a awm lo a ni.
- Mahminga DX