Parliament session-ah minute 2

Parliament-a session khu páwn lam mi tan a hmuna chhim ve a har hle niin an sawi a; mi hausa tana vanram luh a harsat ang em ema harsa ni lo mah se, a harsa thawkhat tih a takin kan zu hmu. Chutiang karah chuan an hotute'n minute hnih chhung chiah chhim min phalsak angin Lok Sabha session chu December 9, 2021 (Ningani) khan kan chhim ve hlauh mai a; a boruak erawh kan tem tak tak hman lo, kan melh kual zung zung hman ṭâwk chauh a ni.

Mizoram sorkara IPR department hotu te, Mizoram Journalists' Asso­ciation (MJA) hruaitute leh PRIDE hotute ruahmanna leh duhsaknain December 9-10, 2021 chhung khan Parliament-ah MJA member paruk leh IPR officer parukte'n training kan zuk nei ve a. Thil ropui tak a ni lo mai thei a, mahse, Mizoram mipui hriat atana ṭha leh ṭangkai tur nia hriatte a awm ve avangin chumi chungchang chu tun ṭumah hian kan ziak dawn a ni.

PRIDE leh training
Kan training hi a buatsaihtu chu Parliamentary Research and Training Institute for Democracies an ni a, PRIDE tiin an sawi mai ṭhin. Kan training hming chu 'Training Programme in Parliamentary Processes and Procedures for Media Persons of Mizoram' tih a ni a; a hming ang hian Parliament kalphung chi hrang hrang min zirtir a ni ber.

PRIDE hian mi chi hrang hrang hnenah Parliament kalphung leh a kaihhnawih thil chi hrang hrang an zirtir ṭhin a, kum khatah vawi tam tak training an buatsaih ṭhin. Member of Parliament (MP) tharte tan training an buatsaih ngei ngei a, state MLA-te tan pawh an buatsaih ṭhin a; ram dang, a bikin developing country (ram ṭhang mek) hotute tan te, journalist leh media kaihhnawiha thawkte leh mi dangte tante an buatsaih ṭhin bawk.

Training-ah hian thu sawi tur (resource person) atan mithiam tak tak an sáwm ṭhin a, MP senior-te an tel deuh ziah bawk. Training an pek turte azirin resource person erawh an danglam thei àwm e. Keini training-ah pawh hian resource person zingah senior MP pahnih an tel a ni.

Thuthar dik thehdarh
Thil min zirtirtu hmasa ber chu Rajya Sabha-a Media Advisory Committee Chairperson Rahul Shrivastava a ni a, media lama kum 35 chhung tawnhriat nei tawh, India Today-a National Affairs Editor ni mek a ni.

A sawi zinga pawimawh tak pakhat chu, mipui hnena thu (information) dik tak pek pawimawhna a ni a, "Mipui hian information dik tak dawn an phû a ni," a ti. Mainstream media a ni emaw, social media a ni emaw, thu thehdarhtute kan fimkhur a, thu dik tak kan thehdarh a pawimawhzia a sawi.

Rahul Shrivastava sawi danin, tunlaiah social media hrang hrangte lârin chak viau tawh mah se, mipuiin rintlak tak takah erawh chuan an la ngai lo. Social media hmangtu zinga a zatve (50%) vel chuan social media-a thuthar thehdarh an ring ngam lo a, mipuiin rinna an nghahna tak tak chu mainstream media (chanchinbu leh radio/TV news)-te an la ni reng. Chutih rualin, social media-a miin ngaihdan an sawite ngaihthah loh tur a ni thung.

MP pahnihte
Lok Sabha MP ni mek Bhartruhari Mahtab hi term sarih chhung a záwnin Lok Sabha-ah MP a ni tawh a, kum 1998 aṭang khan chawlh awm loin Odisha state aṭangin MP a ta ni ta ngar ngar a, MP ni mek zinga senior ber zinga mi a ni. Ani hian Parliament-a ro an rel dan leh an kalphungte min hrilh a, a ngaihnawm hle. A sawi danin, Parliament-ah private member bill lut zinga 14 chu pawm (pass) a ni tawh a, a hnuhnung ber erawh chu kum 1970 daih tawh kha a ni.

Lok Sabha senior MP dang Prof. Sougata Roy pawh kan resource person zingah a tel a, mithiam chungchuang a nih bakah, Union Minister-te pawh lo ni tawh a ni. Ani hian Parliament-a committee hrang hrang leh an hnathawh dante min hrilh a, a bengvarthlak hle. Parliament-a committee péng hrang hrangte chu a tlangpui thuin state assembly-a committee-te nen a inang hlawm a, Mizoramah pawh kan hriat tawhte a ni tlangpui.

Kan intluktláng
'Parliamentary Privileges vis-à-vis Freedom of the Media' tih min zirtirtu KV Prasad, Rajya Sabha Media Advisory Committee chairman hlui chuan, media-te'n zalenna zau tak an neih rualin, Constitution hnuaiah mi tin kan intluktlàn thu a sawi a, "Press mite'n zalenna bik hranpa kan nei lo. Privilege case hi tu chungah pawh thleng thei a ni," a ti a. India danpui hnuaiah mi tin kan intluktlang a, press mi nih avangin inlâk vung viau tur a ni bik lo tih a sawina a ni ber àwm e.

RTI Act chungchang
'Right to Information as an Effective Accountability Device' tih thupui hmanga RTI Act chungchang min zirtirtu Pankaj Shreyaskar, Deputy Director General, Ministry of Statistics and Programme Implementation chuan, sorkar khalh ngil nan RTI Act hman ṭangkai theih dante leh a pawimawhnate min hrilh.

Pankaj Shreyaskar-a sawi danin, security force-te hi RTI Act hmanga chhui chiam theih loh leh information pek chhuah an duh loh chuan pe chhuak lo thei an nih rualin, tih dan kawng a awm zel. A bikin, mihring mihrinna (human rights) bawhchhiatna rawngkaiah inhung bikna (exemption) pek an ni lo. Human rights bawhchhiatna lam hawiah chuan RTI Act-in a huam ve tho tihna a nih chu. Information dil duhte'n kawng an zawn thiam a, zawhna an zawh thiam erawh a ngai ve deuh a nih hmel.

Parliament session pass
PRIDE hotute kaihhruaiin Parliament Press & Public Relations director MK Sharma nen kan inkâwm thei a, thil tam tak min hrilh. A sawi danin, Parliament session hi press mite'n an chhim thei a, chhim tur chuan pass/permit neih a ngai. Tunah hian Parliament House-a press gallery-a awm phalna mi sang chuang hnenah pek a ni a, TV channel 40 hnenah permit pek a ni bawk.
Parliament-a permanent press gallery pass/permit hmu tur hian chanchinbu lamah chuan RNI registration neih a ngaih bakah, copy 40,000 chhuah chin nih a ngai a; state têa chanchinbute erawh chu copy 15,000-ah ngaihhnathiam a ni thung.
A chunga resource person hming kan sawi lan mi pangate bakah hian resource person dang pahnih an la awm bawk.

Session kan chhim
Parliament-a training rau rauah session lai a ni kha kan vannei ang reng a. Hotu lamte'n session kan chhim theih dan tur an ngaihtuah char char a, an hmalakna avangin Lok Sabha session session neih mek chu December 9 khan kan chhim ve zuai a ni. Keini ho kha mi 12 kan ni a, a ruala luh nghal vek pawh an phal lo a, mi pathum tê têin minute hnih chhung press gallery-a ṭhut min phalsak a; minute hnih vel ṭheuh Lok Sabha session kan chhim ve a nih chu!

Session kan chhim hun lai khan tlai lam tawh a ni a, MP tam tak an awm tawh lo a, boruak pawh a lum loh lai a ni. Boruak sosàn lai, an inauh buai nuai nuai lai ni se a nawm dawn nen. Mahse, tawnhriat ṭha tak chu a ni ve hrim hrim e.

Kan resource person zinga pakhat chuan, MP tam tak chu session lai pawh ni se, Zirtawpni-ah chuan an state lamah haw an duh ṭhin avangin Zirtawpni chawhnu lamah chuan MP tam tak chu an bo duak ṭhin, a ti mauh mai!

Parliament Library
PRIDE hotute'n Parliament Library leh Museum min fanpui a, tlawh a manhla viau mai. Library-ah hian lehkhabu 3,02,183 lai a awm niin an sawi. India Hnampa Mahatma Gandhi lehkhabu ziah leh amah kaihhnawih lehkhabu ringawt pawh a tam nangiang mai a, pindan lian pangngai takah an rem khat tlat a ni.

Library-ah hian India Constitution kutziak ngei, a chhiat mai lohna atana uluk taka vawn ṭhat, a dahna pindan pawh an hawn zen zen loh chu kan dil angin min entir hlauh mai bawk a, a hlu danglam hle.

Website-a thil dah
Mizo mipui hi Parliament website-ah kan lut zen zen lo mai thei a, keini, zuk training-te zingah pawh lut ngai kan awm meuh lo. Mahse, an website hi an lo enkawl ṭha ngang mai a, thil chi hrang hrang an dah tam bawk. Political party hrang hrangte election manifesto thlengin hmuh mai theihin an dah a, regional party ṭhenkhatte manifesto thleng an dah zu nia! Hemi kawngah hian Mizoram Legislative Assembly leh sorkar department hrang hrangte hian zir tur leh entawk tur kan nei ṭeuh àwm asin.

Kan lawm e
Mizoram sorkar, IPR Minister Pu Lalruatkima leh IPR Director Pi Lallianpuii leh an thawhpuite'n Mizorama chanchinbumite hmasawn zelna tur ngaihtuah a, Parliament-a training theih dan tur an ngaihtuah chhuak leh min training tir hi a lawmawm tak zet.

Kum 2019 khan a thawh khatna atan MJA member mi 10 vel an lo zuk training tawh a, keini kha a thawh hnihna kan ni. Ruahman dan chuan, kum 2020 April/May thlaa training tur kan ni a, mahse, Covid-19 hripui a lèn tâk avangin kan thei ta lo. Mahse, IPR department leh PRIDE hotute'n kawng zawng zelin, kumin May thlaa training turin an ruahman leh a, chu pawh chu nasa taka Covid-19 a hluar leh avangin kan ṭhulh leh a. Hripui a ziaawm leh deuh hnuah kawng zawng lehin, kan training thei ta a ni. Kan training ngei theihna turin nasa takin ṭan an la a, a lawmawm tak zet zet. Keini tan tawnhriat ṭha, thil tam tak kan zira kan hriat belhna a ni a; an thawhrimna a thlâwn lo ang tih ka ring.

PRIDE hotute pawhin 'Kha bak kha a awm chuang lo ang' tih tur khawpa ṭhain min dawngsawng a, min lo buaipui a, kan tan ṭhahnem an ngai em em mai. Min buaipuitute zinga an hotunu, Lok Sabha Secretariat-a director (PRIDE) Dr Seema Kaul Singh phei kha chu a ngaihawm zual viau dawn nge maw ni tehreng, training ni hnuhnung zawk, training tàwpnaa kan inthlahnaah kan IPR officer pakhat phei chuan, "Madam, your smiling face will always lingers in my mind," a'n tih deuh hnâp kha!

- K. Zothanpara