HLA PHUAH THIAMTE KA ZUI RÙ A

Hla phuah thiamte rilru vâk vêl ka chhui pha lo va, an suangtuahna ka zui na zo hek lo, an mitthlà ang ka hmu ve phâk bawk hek lo. An chham chhuah tawh ka chhiara ka sak ṭhin ngei pawh ka hre thiam famkim bawk lo. Chuti chung chuan ziah ṭâlh ka duh lawi si; tú huatthû êm ka sawi lo'ng chu maw!

Vânkhama Tlaizawng par aṭangin ṭan phawng mai teh ang. Buk nalh vak pawh ni lo, a hun laia par ve mai kha a han hmu a; Christmas min thlirpui hmasa berin,

Lal pian hun champha a lo ni a, tiin tlar khatnaah a dah a, a mawizia hrilhfiah ná'n,

Siamtu châwi rêng pár, a vuah a. A han bih chiang a, a mawina bâka nungchàte tán a hlutna a hmu tel zêl a,

Chawl kai lo ningzû dáwn nilèn e a ti zui thei bîk nia! Zan lamahte engtin tak awm ang maw, tih thlengin a ngaihtuah zui a;

Riahrún an lùm che'm ni khuavàngte'n? tiin a zâwt ta phawng mai. Chû tlaizawng lêr aṭang chuan khawvêl a thlir a; thil mawi tinrêng a hmu phâk bawk asin! Mahse, an chul leh mai ṭhin chu uiin siamtu a thiam lo hial a:

Aw enga'n mawi tin thang dang zawng pawh,

Chul mai tura khuanu'n a siam le! a ti ta hial a. Kan chhìar a, kan sak chhûng zawng chuan kan rilru hi a vâk kual ve vek nain, kan hmu phâk ve tak tak chuang si lo.

Patea Tlaizawng par pawh:
Ani pawhin Tlaizawng par aṭangin Christmas-ah min hruai nghalin, Lal pian hun pangpar min thlirpui a, min lêtpui leh lo; Thinlai mu hnu lunglên kaithotuah hmangin, Bethlehem thlengin min hruai daih a! Tlaizawng par aṭangin Eden thlân kawngkhâr chhûng a hmu phâk a, Eden khawvárah a chêng zui a. Chu mai a la ni lo; Bible-ah pawh awm lo, Lalna ram thing a phun chawp a, a mawizia a hrilhfâk a; chû thing, kan hmuh ve ngai loh kûng aṭang chuan a'n thlir a, Bethlehem tláng vul chu a hmu phâk a, saron pár tlânin a lêng ta nia mawle! Ka zui thleng zo vê lo ve!

Liangkhaia Kalvari tlang:
Misual tâwpthang, mi thih ang pawha thi tlàk lote, lei si lo, vân si lova an khài kânna hmun, an khenbeh chhûngte tán chuan ṭahna tláng kha! A hun laia sakhaw hruaitute'n an tèn leh kal pawh an kal duh lohna hmun bawlhhlawh, an hmuhsit êm êm kha, Aw tlang mawi kalvari, a ti a maw?

Tlang dang zawng zawng aia ngainatawm, a la ti cheu! Hlimna tlâng, a ti mawh hek lo; Hmun thianghlim a la ti tak deuh deuh a! A ni thei lo, a hresual a ni lo maw? Khawvêl thlîrna aṭang chuan, a hmun ngeiah pawh hetiang hi pakhat mah a lang si lo! Pastor Liangkhaia tarmit, Krista thisen hlua luan fîm hawh ngawt loh chuan ka hmu ve phâk lo a ni.

V. Thangzâma Vân aw mawi ri:
A muhîl chu râlkhata Christmas hla sa thâwmin a tiharh a, a han ngaithla chiang a, ṭhalaiho chu zai zêl a, V.Thangzâma tân erawh Vân mite zaiah a chang ta daih lawi a!

Vân aw mawi ri chu ngai r'u, tiin, mahni chauha ngaihthlâk tawng khawp lovin min sáwm nghâl a.

Amah a den dân sawiiin,

Min tho ve a thang ri chuan; tiin. Muhîl leh mai chi ziazáng a nih lohzia min hrilh zui a,

Zân mû rêng ka chhîng thei lo,

Min ṭháwng e ka thinlaiah, tiin amaha a thawh dân fiah takin min hrilh.

Nghakhlel taka thlirtute,

An liam ta kan pipute tiin a khumlaizáwl aṭangin Thuthlung hlui leh thar inkárah a insawn daih a. Hemi tlar hnih aṭang hian, V.Thangzâma hi eng hnam nge a nih sawi dawn ila, 'Juda pachal', ka ti ngei ang; Mizo pipute'n an thlir si lo. Mahse maw, a han phuah zawm a,

Thawnthu hlui an hril ṭhin kha,

Kan zíngah a lo thleng ta. tiin min telh leh thlap lawi si! A ina awm reng siin a chhuahsan daih a, Berâm púte kiangah, Vân mipuite zai a va ngaithla daih thei hi ka mitthlà ve phâk lo a ni.

Rokunga khualbûk vengtu:

Bible-ah pawh lang lo, lemchan thawnthu leh Cinemaah chuan lang ve zeuh zeuh kha dìn chawpin a han zâwt a,

Khualbûk vêngtu i ui lo'm ni,

Tlantu mual liam tûr chu? a han ti a, khualbûka an len chuan si loh vangin a mawhpuh ta a;

Khualbûk vêngtu suihlung mâwlin,

Vân Lal rêngpui ka lungdamna,

Puan ang a hnawl ta e. tiin ui êm êmin a chham chhuak ta a ni. Ni e, Amah vângin khawvêl a dam thei, tih hre si hek lo; hriat lohna hian min timâwl ṭhin a, kan pianthar hma chuan khualbûk vêngtu nên hian kan inang a ni lo'm ni? Chutah, keimahni hi khualbûk véngtuah min dahin, khualbûka leng lo a nu leh pa aiah Isua a dintir thung a,

A liam si lo khârdan hliapa'n

Chhingkhual a ding reng e;

tiin, khualbûk kawngkhâr chu kan thinlung kawngkhârah chànin, a phêna ding chu min kawhhmuh a;

Ngai teh kawngkhâr bulah ka lo ding e,

I chhungah ka lo lût ang e;

I thinlung kawng min lo hawn rawh,

tiin a han dîltír ta teh rêng a! Hawn loh phal chi em ni dáwn?

Isua nei lo ve ve, khualbûk vêngtu nên kan inanna a han thur chhuak a,

Sualin min bâwm reng e, tih hi a ni. Chû, sualin a bàwm,

Ka thinlung ram Kaisar lalnaah chuan,

Bethlehem tlangpui rawn din a,

Ranthlêng (inngaihtlâwmna) rawn húng a,

Chuta lo chêng tûra sáwm lo thei lo dinhmunah min dang chêp a. Rokûnga hian min hruai kawi nasa lutuk hi ka zui zo lo a ni, a kawng lah ka hre bel séng hek lo. Heti khawpa hla phuah thiamte mitthlá leh an suangtuahna chak bîk êm êm mai hi Pathian pêk a ni ngei ang. A pêk ve lohte tân chuan sual âwrh âwrh tham a lo ni e.

- R. Nelsona