Rangkachak leh Lunghlu aia hlu hmingṭhatna
Mihring te siamtu Pathian hian keini aiin kan ṭhatna tur hi a lo hre chiang khawp mai a. Kan thlan zawk tur thil ṭha te, malsawmna leh hmuingilna kan la dawn zawk tur thlang tur tein min lo fuih ṭhin a. Keini erawh chuan rilru duhâmna nen, hausak thut châkna nen kan bawh ruak ruak ṭhin a, a tawp chu mualphona mai niin hmingchhe takin kan tâwp fo. Mahni hming chher ṭhat kan tum luatnaah te hian thil tam tak bawhpelhin a tawpah mi huat te pawh kan hlawh leh mai ṭhin. Kan Pathian thu chuan, “Sum tam tak aiin hmingṭhat hi thlan zawk tur a ni” (Thuf 22:1) Tin, hming ṭha neih dan thuruk pawh min pe a, “I kutin tih tur a hmuh apiang chu theihtawpin ti rawh” (Thuh 9:10) tiin min lo fuih bawk a.
Mizote hi hnam naupang kan nihna kil tinah hmuh tur a awm a. Mi in min ring ta maw tih veleh rinawm tak leh tlo taka nung tura inpêk ahnêkin hotute bum dan tur kan ngaihtuah chhuak nghal a, a tirah lang lo mahse a tawpah lai lanin a awm leh nge nge ṭhin. A dawt lehah chuan hetiang mi hi rin an hlawh tawh ngai reng reng lo. Thlan nawn leh ruat nawn pawh an ni ngai tawh ṭhin lo. Sum tlem te leh sum lemah pawh rinawm lo chu engmah kawltir tlak an ni lo tiin kan Lal Isua pawn a lo sawi tawp mai a nih kha!
Project ṭha tak pawh kan ti ṭhuanawp zel mai zawng a nih hi. India lai pui rin hlawh khawp hian hma lain thawk ngat ila chu sum tam tak vûr kan ni ngei ang; minorities ngaihsakna hi central sawrkar thupui pakhat a ni reng. A chem fawng vuantu minister te kan dem leh mai ṭhin a. A hnuai a department hotu te aṭang hian kan rilru put hmang hi a dik tawh lo va, a hnuaia thawk te zel pawhin kan chhûn chho zel mai. Huaisen takin hetianga tih hi chu a fel lo e ti ngam ṭhah turin kan rinna avang pawh hian intihuaisen tlang teh ang u. Pu ber te thu pawh ni se an ti rei ngam hauh lovang.
Duh nei si, pû te hlau der anga lang hian sual lian tak kan dai lui zel mai. A tawpa tuartu ber chu kan ram hi a ni a. Tin, keimahni ngeiah pawh hian a tawp mai ni lovin kan tu leh fate tan anchhia a ni. Nimahsela, baal hmaa ṭhingṭhi ngai miah lo pawh an awm ve tho tih hriat tur.
Sumdawnna lam ni se kan bawh chak em em a; mahse kan tei rei peih si lo. Mi thil tih hlawk deuha kan hriat chu loan la pawhin kan bei ve rawk rawk a. Thla thum em pawh sumdawng thei lo va tawp leh ta mai mai pawh kan tam khawp mai. Vai kan tih te hian a tlem berah kum 500-te plan neiin sumdawnna hma an la ṭhin an ti. Vawikhata tam tak hlêp aiin mi aia hralh thei ni ngei turin an theih tawpin an ti tlâwm a, chu chu a tlo nge nge ṭhin.
Kan Mizo sumdawng lo hausa ta te pawh hi, kawm leh ṭhahnemngai taka sual chhuak te deuh vek an ni. An hausa thut bik lo, an tumruhna leh chhelna avanga lo hausa ta mai an ni a, an entawntlak takzet a ni. Amaherawhchu, heng mi te hian a ṭul leh thil ṭha atan sum an ui leh hle fo ṭhin. Entirnan- Bill Gates pawh hi khawvela hausa ber a nih tak loh chhan pawh hi midang te ṭanpuina foundation hrang hrang a ngah êm vang chauh a ni. Pathian malsawmna pawh an dawng ngei ang. Khehpuama inti hausa te hi lo ngai reng rawh u, chhiatna leh vanduaina in a ûmzui vat dawn a nia.
Mahatma Gandhi te, Jawaharlal Nehru te zirtirna kha a lo hlûin a ṭha em em a, mi hausa ni lo mahsela kumkhuaa hmingṭhat an lo thlang zawk a; vawiin thlengin an thu dah chu kan la zir ta zel zawk a nih hi! Hmingṭha hi lunghlu leh rangkachak ai pawhin a hlu tak meuh meuh a ni.
- Vanhmingliana (Taua), Dawrpui