Mizoram inthlan thuchah tawi

Mizoram hi Pa­thian zawnchhuah ram, Pathian hnam thlan kan inti a. Chumi avang chuan za-a za Kristian kan inti ṭhin.

Khawilaiah hian nge Pathian zawn­chhuah ram leh Pathian hnam thlan kan nihna chu a lanchhuah ṭhin tak le? Kil tin leh kawng tinrenga kan nun dan leh khawsak danah hian Pathian thu anga Isua Krista hnungzuia, Isua rilru nunpuitu Kristian chu kan va vang si em!

A zawnchhuah ram leh a hnam thlanteah chuan a neitu Pathian chu a hmasaber leh chungnung bera dahin, lalna leh thu­neihna kan chantir si lo a nih hi.

Khawvela ram tin leh hnam tinte hi Pathianin a hre vek a, a hmu reng a ni. Mitin leh hnam tinte hi an thiltih ang zelin an chungah ro a relsak zel a ni. Mizote phei chu Lalpa hriat leh Lalpa hre tawhtute kan ni a, chumi avang chuan Pathian hi kan chungah a thikthu a chhe bik a, i fimkhur hle ang u. “Nangni chauh hi khawvela chhungkua zawng zawnga ka hriat in ni a, chuvangin, in khawlohna zawng zawngahte chuan ka hrem ang che u,” Pathianin a ti si a. Amosa 3:2

Mizoram hi ram nuam leh awhawm, Mizote hi hnam lung­rual leh hlim, hnam awhawm leh zah­awm ni tura siam hi a harsa reng reng lo. “Keimahah awm reng rawh u, kei pawh nangmahniah ka awm reng ang. Keimah lovin engmah in ti thei si lo,” kan Lal Isua’n a tih hi pawma zawm mai tur a ni. Johana 15:4,5.

Engkima amah rawn hmasa a, Pa­thian thu ang zela kan ngaihtuah leh kan tih hian engkim a fel a, a dik thil ṭha ti kan ni mai. Tu pawh Pathian dah hmasa ber leh amah ṭih tak taktute chu Pathianin a awmpui zel ang. MLA kan thlang leh dawn ta a, mitin hian Pathian lakah bat kan nei a, ka tih dik loh chuan ka thiltih phu ang ngeiin ro a rel dawn e.

Pathian chu a hmasaber leh chung­nungbera dah tak taktute tih hi ngun takin i chhut ang u. Mizoram siam ṭha tur hian tunah hian Pathianin hun tlemte min la neihtir a. Kan lo tihsual tawhte chu nasa hle mah se, hei hi hun hnuhnung a ni tih hre reng ila.

Kan Pathian biak dan te, kan Kristian dan te, kan nun dan leh duh dan te, kan mihringpuite chunga kan rilru puthmang te, ram leh mipui tana kan thil tih ṭhin zawng zawngte leh, kan kan chunga roreltu tur kan thlan danah te hian, hawh u, i ti mai mai tawh lo ang u. Pathian thinurna chu i thlen lui hram tawh mawlh lo ang u. Pathianin a ti ve mai mai ngai lo va, a thutiam pakhat mah a ti lo ngai si lo.

“Mi ṭhenkhatin muanga an ruat angin Lalpa chu a thutiam kawngah chuan a muang lo ve; tuma boral duh lova, mi zawng zawng lo sim duhin, nangmahni lamah a dawhthei a ni zawk e,” II Petera 3:9

- K. Hmingthankaia