RAMRI NGE PAWIMAWH KHAW CHHUNG?

Tunhnai lawk aṭang khan ramri a duty chu pawimawh em em leh khaw chhung a duty chu thil tul loa ngaihna a lian ta hle a, pawimawh zawk leh pawimawh lo zawk pawh kan thliar nasa hle bawk. Hetihlai hian engnge pawimawh ber sawi theih ni lo mahsela, ramri duty te, khaw chung duty te leh in lama thuawi taka tawm te hi an pawimawh dan a inchen a tih theih ang. 

Ramri hi kan veng nasa hle a, pawimawh hle in kan hre bawk a, a dikna chen pawh a awm ngei ang. Hetihlai hian ramri a state pawn mi rawn luh an tum dan kan en chuan, ramri a rawn luh ruk tum te aiin khaw chhunga loh theih loha kan mamawh rawn phur lutte leh state danga Mizo tangkhang rawn haw mek leh rawn haw turte enkawlna chungchangah hian fimkhur a ngai zawk niin a hriat a ni. 

Mizoram ramri hrang hrang dinhmun han en ila, Myanmar lam aṭanga Mizoram rawn luh ruk tum record hi kan la nei lo niin a hriat a, anmahni lam hian kan luh chhoh an hlau hle zawk nia sawi a ni. Tripura lam aṭanga rawn luh ruk tum an awm sawi a la ni lo bawk. Assam lam aṭang pawh hian Mizorama rawn luh tum hi lockdown kalpui a nih tak tak hnuah chuan Vai mi â pahnih Vairengte dai leh Saihapui V ah bak sawi tur an vang hle. 

A chhan chu Mizoramah hnathawh tur a awm chuang lo a, ramri piah lamah Police leh Task Force te an duty nasat avang niin a ngaih theih bawk ang. Mizorama state dang mi rawn luh chak em em tura ngaihna hi 'ngaih' a ni ve mai! 

Assam leh Mizoram ramri hmun hrang hrangah hian buaipui awm tak chu an awm a, chu chu keimahniho tho kan ni zawk. Assam lama zu lak tum leh heroin lak tumte hi buaipui awm ber an ni zawk a, mi 100 telin quarantine an tawk tawh a ni. Council Of Minister ṭhukhawmin ramri kan lui te pawisa chawitir a tih te hi anmahni venna atan ṭha awm tak a nih laiin, heroin ngawlvei anmahni ruihhlo leina tur pawh ruk chawp ngaite ven nan chuan a thawk nep khawp ang. 

Ka sawi tum ber chu tlang takin sawi ta ila; ramri aṭanga rawn luh tum hi ven tham an awm lo. Khawi ram mahin mikhual thlen an phal lo a, thlenna tur pawh a awm chuang lo. Khaw tin veng tina heroin ngawlvei te hi chhinchhiah theih vek an ni a, heng mite hi kharkhip dan sawrkar hian ngaihtuah sela. Ramri khua te buaina hi 30% chuan a hahdam nghal ang. 

A bak chu zu zawng an ni leh a, ṭhalai tam tak Mizoram pawna zu zawng quarantine tawk an awm tawh. Man fuh loh te pawh an awm bawk. Zu zawng ṭhenkhat phei chu Assam lamin an rawn report avanga keimahni zawkin kan zuk laklet te an ni. Mizoram lamah drone nen zu kan zawng vut vut a, hei hian Mizoramah zu a ti vang a, zu a ti to em em bawk a ni. Zu man a to avang hian zu to ve lohna lama kal tur an awm leh ṭhin. Hmuh loh der chin a awm a nih loh chuan Covid19 laka kan him nan kumin chu rim hle phawt mai teh ang. Kan buaipui ber te hi ina tawm mai mai thei lote avang an ni a, a tawm thei te hi chu pasalṭha an ni. 

Heroin ngawlvei Covid19 avanga ina tawm a, ruihhlo an khawih ṭhin insum ngat ngat phei hi chu Covid19 ven nan hian thawh hlawk tak an ni. 

Tlawng ral lehlam mai, Hailakandi te, Kanhmun piah mai Tripura lama zu lo zuk zawngte leh USA aṭanga rawn haw te an inang reng bawk. Quarantine-na hmun pawh a danglam chuang lo. 

India ram hmun hrang hrangah mahni state a haw khawm runpui a thleng mek a, Mizoramah pawh thar thawh leh mek a ni. North East lam an rawn haw khawm mek a, Quarantine chungchangah thawm a awm nghal laih mai. Rawn haw khawm tawhte hi 600 bawr vel chauh niin an la hriat a, India ram Covid19 bupui aṭanga rawn haw tur mi eng emaw zat an la awm. 

India ram hmun hrang hrangah hian tangkhang 6000 vel zet kan la nei a ni. Khawiahnge kan quarantine ang tih hi ngaihtuah tham tak a ni. Sawrkar quarantine facility hian a tlin dawn lo sa a, Covid19 laka kan him theih nan chuan quarantine facility ṭha tak kan mamawh si. Firm house nei an awm chuan an awm phalsak mai an ngai hial ang. 

Home quarantine pawh tam tak an awm a ngai dawn a, a hma ang mai maia an len kual leh mai mai chuan kan vanneihna hian tlin pawh a tlin seng lovang. 

Hnam dang driver Mizorama kan bungrua tur rawn phur lutte lakah kan fimkhur tawp a ngai khawp mai. Sawrkarin dan a zam te hi kan zawm tlan ngei ngei a ngai. Ṭhenawmte rama pal sawn ang ngawt a ni lo. Ṭhenawmte nen ngawta buai lovin a hnam buaiin kan la buai thei a ni. 

Driver rau rauah pawh Ambulance driver te hi an him lo ber. An mi phurhte reng reng hi dam ṭha ver vawr an awm ngai meuh lo. Tripura lamah pawh Ambulance driver a lo positive a, an buai phah zek kha. Hetihlai hian driver zawk ni lo bungrua avanga positive erawh sawi tur an awm ve lo thung a ni. 

"Ramri hi uluk takin veng ila, a chhung lam chu i zalen tawh ang u" tih ngawt hi a thlir zau thlak lutuk lo. Chumite chu an pawimawh ber han tih ngawt te hi ngaihtuah chian ngai thil a ni bawk ang. Covid19 do hneh nan hian kan awmna ṭheuh hi a pawimawh ber vek a ni.