Thil man a van sang ta em em ve

Khawvel buaipui hripui a len mek laiin lockdown kan kalpui a, dawr khar a ni a, khawlaia vah chhuah khap a ni bawk. hetihlai hian sa man leh chawhmeh man sang ta em em mai hi sorkar hian a hre lo nge a ngaizam mai mai ni ang? A enkawltu department hi an chet chhuah a hun ta hle lo maw? 

Bawngsa hi a hma chuan a ti hlang kg ah Rs. 500 a ni a, lockdown hnuah Rs. 600 a ni ta dawrh mai a; chutah a ti ṭha hlang pawh ni lo, a ti chhia nen an la pawlh zui. Vawksa lah a rate Rs. 350 a ni a, chu pawh chu duh ang a lei theih hauh lo. Sangha mai mai pawh a to far far hle tawh a ni. Vawksa hi a rate-ah chuan a pangngai deuh reng a, an tiṭha phian mai. 

Thil dang man pawh a to hlawm far far ta hle. A hmaa anṭam tel khat Rs. 40/50 ni ṭhin kha lockdown hnuah chuan Rs. 100 te zu ni hawlh a! Phai aṭanga eichawp lakluh pawh a MRP aiin a to ta hial hlawm mai. Heng thil man bithliah chungchangah hian Legal Metrology lam hi a mawhphurtu an nih hmel a, eng angin nge hma an lak erawh ka hre lo a, an thawm erawh a reh vung vung hle a ni.

Mipui lam chan chhe lo tura sorkarin a enkawltu tur depart­ment a ruat Legal Metrology hi an che chhuak hmuh tur a awm lo a, an thawm hriat a ni ngai ta hauh lo mai. Thil man bithliah chungchangah pawh thuchhuah emaw pawh an neih hriat a ni lo. He department hian mipui tan ṭan han la leh thar leh teh se. Mi tlemte hlawk em em a, mipui chan chhe ta em em hi an mawh a ni e. 

Thil man san chung changah local task force pawh a puh loh theih loh ang. Khawi vengah pawh vawk emaw bawng emaw talh awm se, local task force ruahmanna hnuaia hralh chhuah ṭhin a ni ta ber a. 

Bawngsa emaw vawksa emaw lei dawn pawhin mahnin duh a thlan theih tawh si lo a, sa chhia kan lei ṭawk ṭawk a, kan paih leh ṭeuh ṭhin dante pawh hi a lungchhiat thlak ta hle mai. Sa zuar an hlawk em em a ni ber mai.