REM LAL PIANG CHUAN THINLAI HNEM RAWH
Khawvel mihringte hian kan duh emaw, duh lo emaw, hun leh ni te chu banga sanapui intarin a kawh ngai number kawk reng lova a her liamsan reng ang hian kan hringnun leh kan hun hman mek dan pawh hi a danglam ṭhin a nih hi...
Chutiang kara cheng kan nih miau avang chuan mitin mai hian he khawvela kan hun hman duh danah pawh mahni duhthlanna a lal hle ṭhin. Chu kan duhthlanna hmuna cheng mi tam tak chu chhungkaw nuam tak siamin an cheng a, ei leh in tur, silfen lungkham lovin an mamawh zawng zawng an ei-in thei a, an in bel thei ṭhin.
Thenkhat erawh duh kan thlang sual mek bawk a, mahni hringtu nu leh pa, unaute bula awm pawh thlahlel hlei thei lovin keimahni duhthlan sualna hmun ngeiah harsatna leh lungngaihna kan tawk mek a. Kan Zoram chhungah ngei pawh Kohhran leh khawtlang in relbawlna pawn lamah kan hun zawng zawng hman a ṭul chinah phei chuan kan nun hi a ruak ngawih ngawih a, hun thar kan tawn apiang mai te chu kan lungngaihna ti zualtu mai a lo ni ṭhin.
Kristmas hun lo her chhuak tur boruak rim leng velte chu han hip ve mah ila, mahni in chhung lum ngaih ti zualtu maiah a chang zo ta. Tuna kan khawvel lo ni ta aṭang chuan kan khawharna belhchhahtu leh kan lungngaihna mittui luantirtu, hnuk ulh ṭeuh chunga kan naupan laia kan lenrual lungduh tak takte thawm hriat chauh chu kan chan tawk a ni ta si.
Pu C.Lalkhawliana'n: Leng zawng thinlai damten lawm kim tak ang maw, Rualduh kal ta suihlung rualpuite zawng kha, Ngai mah ila, kohkir leh theih awm si lo, Rem Lal piang chuan ṭhinlai hnem rawh... tiin mahni rilru natna leh kan rumna hmun hrehawm tak aṭang hian kan rilru natna zawng zawngin hnem tumin Lal thar lo pianga chu zaiin kan lo au ve vawng vawng ṭhin.
Hun dang chu hun dang pawh lo ni se, Krismas lo hun her chhuak tur thlasik van boruak thiang kuk hnuai aṭanga chu hun hlu em em ral thlir leh ngawt mai tur chuan ka hringnun hi ka va lainat ṭhin tak em...
Chutiang dinhmuna ding mekte chhanchhuak tur chuan hawh u i in buatsaih ang u. Hetiang mi vanduaite chhanchhuak tur hian chempui leh hriamhrei, silai a ngai lo; hmangaihna avanga khawngaihna thinlung nen heng kan unaute hi kan chhanchhuak thei asin. Kan hma lawka Kristmas leh Kumthar lo thleng mai tur hi an naupan laia anmahni duat tak leh hmangaih sawi hleih theih loh a lo kuangkuahtu leh anmahni ngai em em chunga an in lamlet hun nghakhlel taka lo thlirtute kiangah ngei chuan i hruai kir ang u.
Chhantu ngaiin he thlasik khaw vawt tak hnuaiah hian kan unaute chu an rum mek si.
- Lawta Khiangte