MNF leh Congress thu inchuh

Mizorama minis­ter pakhat leh a ṭhui­hruaite khaw pakhata zanriah an ei chungchanga Face­book-a thu post avangin a lakah minister private secretary-in Decem­ber ni 13, 2021 zanah Cyber Crime Branch-ah FIR a thehlut a. Thil sual tia an puh chuan a lakah FIR thehluh a nih avangin FIR thehluttu lakah Cyber Crime Branch-ah vek December ni 13 zanlai pelh hnu, December ni 14 zing lamah FIR a thehlut ve nghal bawka sawi a ni.

FIR inthehluh khum tawn chung chang hi tunlaia social media luahtu langsar leh party pahnih MNF leh Congress-te press release hmanga an inpuh tawnna ber pakhat a ni mek.

Hetianga inbeih tawnna leh thil dik tâwk lo nia langah pawh dik ni awm taka ṭang tlata inpuh tawnna hi Mizoram politics-a mipuiin an nin ber pakhat, ram siamṭhat tumna aia mahni leh party mi puite inchhan tumna leh party dang thiam loh chantir tum ngar ngarna a ni tih party pahnihte hian hria se a duhawm khawp mai.

Mizoramah hian pawi khawihna a thlen châng te, dan kalh leh dik lo taka thil tih a awm nia langah thu dik a dinchan theih nan FIR thehluh a lo ni tawh ṭhin a; FIR thehluttu laka thil dik lo tia puh (accuse)-in FIR a thehluh ve nghal ang chi hi a lo thleng tawh ṭhin a nih pawhin, ka hre khât viau mai.

Facebook-a thu post-tu (Congress party-a nihna pawi­mawh tak nei nia sawi)-in thu dik lo a post a, mi tihhmingchhhiat theihna nia an ngaih avangin a tuartute lama mi pakhatin FIR a thehlut a; kalphung pangngai tak niin a la lang. A dik leh dik loh te, dawta thu post a nih leh nih lohte chu police-te'n an chhui a, Court-in a finfiah tur a ni ang chu.

FIR thehluh chhan, facebook-a thu post-tuin a laka FIR a thehlut ve erawh chu thil thleng zen zen lo a ni thung a. FIR a thehluh ve chhan lah chu a laka FIR thehluh a nih vang liau liau niin a lang leh nghal a! Media aṭanga kan lo hriat chinah chuan FIR-a a mi puha chuan dan kalhin thil dik lo tak a ti, tih lam a ni loin a lang.

December ni 13, Thawhṭanni zana Congress party mi ṭhenkhat Cyber Crime Branch-a an kalkhawm nia sawi phei kha chu, an party-a an hruaitupui, thil dik lo tia puh chuan thil dik lo tih a nei lo, thiam lohna a nei lo, tih aiin, an party pui, an hruaitupui a nih avanga chhan tum ngar ngarna a ang viau bawk.

Hetiang hi kan rama thil thleng fo tur leh tih ṭhin dan tur a nih a, ram hruaia siamṭhat tumtute leh 'Dik loh theih lohna bâwm' siam tumtute kal dan tur a nih chuan kan ram hi a va ngaih­tuahawm dawn em!

Engpawhnise, thu dik hai lan duhin FIR an thehlut tawh a, police-te chhui zuina chu ring tâwk se; press release hmanga inbeih zui vak vak hi chu tâwpsan hmak teh se. A ninawm zozai e. Police pawhin lai takin, ṭan lam leh âwn lam nei hauh loin chhui chhuak ngei bawk rawh se.

- Zohmingliana