OVER-COAT LEH REVIVAL

Tlai lama over-coat (second hand) sale hun a lo thlen chuan, duhzawng lei tum takin kan mit pawh chu kan len kual vêl viau a. Aizawl Bazar pawh mipui avângin a tâwt vânglâi tak a ni.

Hmun pakhata an lo zawrhnaah chuan, ka mit la zet mai hi min bazar-puitu, ka nau, chuan a hai chhuak vei nawlh a. Ka mit a la bawk a niang, 'A va mawi ve' tih leh ban chu ka rual nghal a. Ka'n ha chhin ta chu, ka lo ha tâwk phian mai a. Phelh leh pawh phal mai lo chuan a dang melha kan hâi lâite chuan ka la ha ta reng a. Lei mai kha ka rilruk hman viau a ni.

Chutih lai chuan, ka bul lawkah hian keimah ang tiat vêl, kei aia pa sa ṭha lampang si chuan ka over-coat hak lâi en hian a lo ding reng a. Min en reng tih ka mit sir zauh zauh hnu chuan ka hre thei ta mai a. 'Eng tak chu beisei ni maw?' tiin a lam ka'n hawi thuai a, ani chuan "Eng zât nge an tih?" tiin min zâwt thuai a. "Hei lo thing ve rawh, a man a to lo a, a mawi zêk mai," tiin ka chháng liam mai a. Ani erawh chuan, "Ti khân in hai apiang kha ka lo en ve zêl a, hai thar ve zêl kher pawh ngâi ka ti lo ve," tiin a sirah chuan ka over-coat hak lai en reng chuan a ding ngawi ta zêl a.

Nakin deuhvah chuan, ka nau chuan, "'Ti khan lo awm la, hmun dangah ka va en kual lawk ang e; tuna i hak kha chu lo hauh phawt rawh," tiin kan inthlah a. Chutih lai pawh chuan ka bula ding kha chu ngawi rengin a lo la ding ta zêl a.

A hnu lawk chuan, phone call ka dawng ta. Ka nau chuan, "A dang ka hmu a, i rawn en chhin lawk dâwn em ni?" tiin min rawn bia a. "I hak lai kha a hnuai lamah dah rih la, heta mi hi i duh chiah loh pawhin khata mi kha kan lei dâwn nia," a rawn ti a. Kan inbiakna ṭawngkam chu ka bula lo ding reng tân chuan thu lawmawm a ni ang tih reng reng ka lo hrethiam mai lo (Ka hawi záu tâwk lo a ni phawt mai).

Chutia ka nau nên kan inbiak lai chuan, ka over-coat hak mêk kalsan chu ka hreh thu leh lei mai a ṭha lo maw tia ka sawi lai tak chuan, ka bula ngawi renga ding chuan, "Ṭhianpa, khaw maw ka lo ha ve chhin," tiin ka hâk lâi chu a rawn ban ta chat a. A man pea ka la lei bîk miau loh avângin, lo phal loh ngawt kha a rem bawk si lo a. Tichuan, ka hâk lâi chu ka phelh ang sawk sawk a, a han ha chhin ve ta a.

"Ka tâwk chiah mai a..."

"Nang chuan, kha, Jacket i hak hnan atin nih kha maw le; I tân chuan a lian hlek dâwn a nih kha," tiin a hâk tâwkzia chu ka hmuh lâi chuan a han tilang chho ta a. A duh thu tlang taka sawi mai bîk lo chuan a duhzia erawh chu a tilang ngam ta.

Kei lah ka nau phone ka lo la titawp mai si lo; ngawi rengin ka nau kalna lam chu ka pan ta a. Ka rilru te te chuan ka nau sawi chu, 'A mawi zâwk loh vaih' tiin lungni vak lo chuan ka kal zêl a. Ka kal hla tial tial a, kha over-coat kha chân dâwn hian ka inhre ta tlat a. Ka hlim meuh tawh lo.

Ka nau bul chu ka thleng phei ta thuai a. A lo hmuh pawh chu mawi tak, thar ṭha tak a ni a, a man erawh a to zâwk a. Amaherawhchu, a man inthlauhna leh ka mit a lâkna hmanga ka'n bûk tawn vêl chuan, a hmaa ka hak chhin kha ka duh zâwk tlat. Hei hi lei mai ang aw a tih laite chuan ka 'aw' lawk thei lo.

Ka nau chuan, ka 'aw' mai loh chu hrethiam takin, "Va en lêt chhin la, i duh zâwk chuan va lei mai rawh," a ti ta thuai a. Rang takin ka va lêt a. Ka va hâi kual a, ka hmu ta hauh lo mai. A zuartupa chu ka zâwt ta ngawt a.

"Nichina leitu kha nangmah i ni na nge?" a lo ti sam êt a.

Ka la harh chhuak lo! Ka lêt leh a. Ka nau hnenah chuan 'An lei tawh thu' lungawi vak lo tak chuan ka hrilh a. Ani lah chuan, "I duhte chuan nichin khân lei nghal mai tûr che a lawm," a la ti ta deuh deuh a. Ka sa deuh phat!

Hei hi lei mai ang tiin ka 'aw' muang ta raih a. Tichuan, kan lei ta. Ama hak tûr zawnga kan kal kual laite chuan ka ngaihtuah let a. "Engah nge ka lungawi loh ngawt le, ka thlir dân a dik tawk lo a ni ngêi ngêi ang," tiin ka thlir dân chu thlâk ka tum ta a! Ka la harh chhuak mai chuang lo.

Ka nau pawh chuan a duhzawng tak a hmu ta a; in lam pan tûra a scooty park-na lam kan pan laite chuan ka rilru erawh a la kal ding ngat ngat viau mai.

Ka lungawi chiah loh chhan hi, pawisa ka ken zât ka hre chiang a, man tlawm tak mai, ka hak tâwk em em mai bawk si kha kan bazar ṭan tirh lam khân 'A tlawm êm avângin' a puan awm dân ka iai deuhna pawh chu a kiang ta si a; ka lei nghal mai reng a. Chumi avâng chuan, pakhat lei tumin pahnih leina kha a daih ngêi mai a. Amaherawhchu, man to tak lei leh tûr chuan, ṭul ka ti lem lo a. Pawisa ka hum mêk kha ka thawhchhuah a ni lo tih ka chian em avângin 'rilru puitling' tak pua ka inhriatnate hlei hlei chuan min tihrehawm takzet a ni.

In kan han thleng ta a. Kan thlen veleh chuan, ka over-coat tûra kan lei hnuhnung zâwk, man to zâwk chu, pawisa min paitirtu ka pa lam ka panpui ta vat a. Ṭul tak maia lehkha a lo ziak laite chu ngaihsak lem lo chuan, "Ha chhin teh," ka ti thuai a. Ani pawh chuan laklawh sawi lo chuan a han ha chhin ta nghal a. A lo tâwk chiah mai.

Ka va'n lawm tak êm! "I inhmeh lutuk, nei rawh," tiin ka pe ta nghal a. Chutah tak chuan a lawm, kei mi hawi zim lutuk hi ka harh chhuah tâk chauh le! Ka bula ngawi renga lo ding kha ('pa' a ni tawh ngêi ang), a dawhtheihna ka zir chhuak tlat! A duh hle tih kha a sawi ngawt bîk lo a. A mit a la hle tih kha kei ngêi pawhin duh tak maia ka hak nghal mai avangin a lo sawi ri ngam lo tawp tih kha ka hrethiam ta.

Chhei le! Ka duhzâwng tak kha, keimah ang bawka lo duh em emtu an awm tih ka hriat tirh khan, "Nangma'n la zâwk rawh," lo tih vat tûr hi a nia. Kha secondhand zawrhna hmunah khan Revival a thleng nghal ni mai tûr! Ka tlai ta tlat mai. Mahse, ka tlai chhe lo ve!

Ka pa lah chuan bengkhawn tak hian, chu thu, chaw ei lâia ka sawi chhuak chiah chu min lo chhâwn vat a, "Hmanah kei pawhin chutiang chu ka tawng a, a duh ve hle tih hre chung khân a leitu zâwkah ka ṭang a, ka rilru erawh a nuam thei lo rêng rêng," tiin.

Ka va'n lawm tak êm!

Kha pa khân a duh tak a lei ngêi mai a. A lei tâk kha a hlut lehzualna chu, duh taka ka lo hak chhin a nihnate khân a tizual ngêi ngêi ang. Chu over-coat chu mi dang pawhina nalh an tih leh duhzâwng tak a nihzia mawlh mai khân a hlutzia a hak apiangin a hriat nawntir tluk tluk tawh ngêi ang.

Krismas hi nuam taka hmang tûra kan induhsak tawn a nih takzet chuan, kan Bazar hun lâite hlei hlei hian, Revival thlen theihna hmanrua nih hi tum tlat ila, "Nangin hei hi chu a ṭha bawk a, chang zâwk rawh," kan inti liam liamna hmunah Krismas hman nawm loh a awm thei tak tak lo ang.

I harh chhuak ve êm??

- Samuel Dinté