DAMDAWI HMUHCHHUAH DAN

Damdawi pakhat lek hmuchhuak tur hian kum 10-15 leh cheng Maktaduai 600 vel seng tura ngaih a ni.

Ni, damdawi dawra lei mai theih a ‘damdawid title a neih meuh chuan khiti zat sum leh pai mai bakah kum 10 chuang lai mai a siamna tura hun khawhral ngai a ni tlat. Heti em ema hautak a nihna chhan ngaihnawm tak hi i lo thlir dawn teh ang.

Bawlhlo (Chemicals) damdawi atan zirchianna hi ranah neih hmasak ber a ni thin a. Rana an enchhin bawlhlo 10,000 zela 10 vel chauh hi mihringa zirchian chhunzawm tlaka ngaih a ni. Chu’ng mihringa an enchhin 10 zela 1 chauh chu ‘damdawi’ a rawn ni pha dawn chauh a ni.

Rana damdawi enchhinna hi ‘Pre-Clinical trials’ an ti a, kum 1 vel zen zawn a awh thin. Dan tlangpuiin rannungah chuan sazu leh sazupuite hi an hmang ber a. Zawngte pawh hman thin an ni.

Zawng nen hi chuan inanna tam tak nei mah I la, an harh em avang leh enkawl an buaithlak deuh avangin an hmang tam lo hle thung. Rana enchhin a nih hnuah chauh mihringah zirchianna kalpui thin a ni. Mihringa damdawi enchhinna hi Volunteers mi hrisel tha pangngai, mipa leh hmeichhiaah neih a ni tlangpui a. Hmanlai chuan jail tangahte enchhinna hi neih thin a ni a; amaherawhchu hun lo kal zelah ‘Human Rights’ te a rawn lar chhoh tak avangtein damdawi siamtu company hnena in-volunteer te ngei hnenah neih a ni tawh a ni.

Mihringa zirchianna "Clinical Trials" hi Chi 4 ah then a ni. Chungte chu:

PHASE – I:

 Hun rei zawng: kum 1 - 2 vel awh a ni.

 Mihring mamawh zat: Zirchianna hi Volunteers mi hrisel tha, natna engmah nei lo mi 20 atanga 100 inkar velah neih a ni thin.

 Enchhinna chu:

- Damdawi chu a him tawk em, kan mamawhna bakah hnathawh dang a lo nei em, lo nei ta se eng ti ang chiaha hlauhawm thei nge a nih?

- Dose mamawh tawk tur chhut te, Damdawi kan ei chuan eng tik hunah nge hna a rawn thawh dawn a, engtia rei nge hna a thawh ang? tih te.

- Damdawi kan taksaa a kalkual vel dan zir a ni bawk. Damdawite hi ‘foreign particles’-ah ngai ta i la, kan ei hian kan taksaah a kal kual a, hna an thawk ang a, chumi hnuah an chhuak leh mai tur a ni. Damdawi tam zawk hi kan taksaah an chambang tur a ni lo. Damdawi hi kan zunah a inpaih chhuak tam ber a, kan ekah te, thlan, hnute tui leh thawahte a inpaih chhuak thin. A inpaih chhuah zat leh a inpaih chhuahna kawngte chu kan hre tur a ni.

PHASE - II

 Hun rei zawng: Kum 1 -3 thleng a awh.

 Mihring mamawh zat:

Damdawi chu damlovah ngei enchhin a ni tawh a. Entirna’n, Malaria damdawi tur chu Malaria vei damloah, Cancer damdawi chu Cancer veiah te ngei enchhin an ni. Dan tlangpuiin Damlo 100 tling lo deuhvah zirchianna hi kalpui a ni.

 Enchhinna chu:

- Hetah hian damdawi chuan eng ang takin nge natna chu a chhawk tih te, pawn lama a hnathawh ang chiahin kan taksa chhungah hna a thawk em? tih te.

- A him tawk em tihte enchhin an ni leh ang a, dawmdawia inenkawlnain awmzia a neih chuan a dawt leh phase III a kai ang.

PHASE - III

 Hun reizawng: Kum 3 - 6 vel awh a ni.

 Mihring mamawh zat:

Hemi phase-ah hian enchhinna zau zawk, damlo sang chuangah neih a ni . Research an tihna Clinic leh Hospital-a inentir damloah damdawi hnathawh dante chu enthlak zui reng a ni.

 Enchhinna chu:

- Damdawi chu rei tak hman a nih hnuah nghawng tha lo a nei thei em tih te, entirna’n, Paracetamol hman nasat lutuk hian thin tha lo a thlen thei.

- Mi thenkhatah huat bik a awm thei em? Entirna’n - Penicillin te hi mi thenkhat chuan an haw em em a, thihna hial pawh a thlen thei a ni.

- Rai laiah nghawng tha lo a nei em? Entirna’n 1960 vela Thalidomide, raino damdawi ei hovah chuan nausen kut ke bul an piang teuh mai a ni.

- Damdawi dang nena ei kawpin nghawng a neih theih dan te, entirna’n, damdawi thenkhat Sulfonamide leh Trimethoprim ei kawp chuan an hnathawh pangngai belhkhawm aiin a chak ta daih a, chuvangin hemi pahnih combination 'Cotrimoxazole' tiin an siam phah nghe nghe a ni. Chutih laiin hemi opposite chiah, damdawi hman kawp avanga an chakna hlauh phah ta daih pawh a awm thei bawk. Entirna’n Insulin leh Glucagon te.

- Damdawi thenkhat chu kan pianphung danglamna vangin a hnathawh pawh a danglam thei. Entirna’n, G6PD tlachham damloah chuan Primaquine leh Sulfonamides damdawiin thisen natna chi khat 'Hemolysis' a thlen thei.

PHASE - III

Damdawi approve tur chuan a chunga kan tarlan - phase I, II & III te hi a kal tlang ngei ngei a ngai a. Damdawi leh natna a zirin, a hautak zawng leh hun mamawh dan erawh a inang lo thei thung.

Phase-IV hi chuan damdawi atana pawm tawh, approved tawh leh hralhchhuah tawh hnua zirchiannna lam a ni. Damlo sang telte hnena damdawi hnathawh dan chu en zui zel a ni a, damdawi a him lehzual theih na’na zir chhunzawmna a nih ber chu.

Aw le, a hmaa kan sawi tak, Phase thum - I, II, III te hi a paltlang tawh hnu chuan kan bawlhlo enchhin chu DAMDAWI ni turin a interview ve thei ta. Kan damdawi chuan Phase III thlenga kan beisei anga hna a thawh theih chuan sorkara ‘Foods & Drugs Administration Department’-ah NDA (New Drug Application) kan thehlut thei ang. FDA lamah hian dan tlangpuiin kum hnih khat vel a tangkhang leh dawn a ni. Anni lam hian approve turin zirchianna leh a tul tul endikna an lo nei leh dawn a ni.

Kan damdawi chu approve a nih hlauh chuan zawrh chhuah turin kan siam ve thei tawh ang.

COVID-19 DAMDAWI CHU LE?

Tunah hian khawvelah Hripui a leng mek a ni a, eng tin nge khitianga rei kum 10 chuang zet khi kan nghah theih tehlul ang? Hemi avang hian WHO chuan a rang thei ang bera damdawi hmuchhuah a nih theih na’n ram hrang hrangah khing a chunga kan sawi ang Clinical Trial te khi, kan awmna hmun theuh atangin min kaltlangpui nghuah nghauh mai. 'Soliditary Trial' tiin a hming a phuah a, April ni 8 thleng khan ram 90 chuangte tangrualin Clinical Trial khi kalpui a ni a. WHO hian kan damdawi neih sa atangin duhthlan tur chi 4 a chhawpchhuak a, chung damdawi hnathawh dan chu WHO-ah report thawn leh zelin, tichuan a rualin Clinical trial chu a kal mup mup tihna a nih chu. Hetia van hnuaia hringmi leng zawngte tanrualna avang hian damdawi zirchian na’na hun tam tak duh thin pawh zaa 80 laiin a tlem phah dawn nia chhut a ni.

Natna thar a nih avang hian SARS CoV-2 chungchang hi hriat loh a la tam hle a, kan mithiamte zirchianna neih sa pawh thlak danglam leh fo a ni. Tin, damdawi reng reng laboratory-a enchhinna hi "in-vitro" an ti a. Laboratory-ah chuan natna hrikte chu thatin tha hle mah se la, mihringah (in-vivo) hian an hmantlak vek lem lo a ni. Cancer-te pawh laboratory-ah chuan kan tihlum thei lutuk; mahse chung a tihhlumna damdawite chu mihringin kan huat ve zel avangin tun thlengin Cancer damdawi tha tak kan la hmuchhuak thei lo a nih hi. Tunlaia lar em em COVID19 virus pawh hi sahbawn leh hand sanitizer ten a that thei a ni lawm ni? Ni e, in-vitro-ah chuan kan tihlum thei lutuk alawm. Mahse, tiraw, damdawia kan siam loh chuan kan ngam lo chu a nih hi.

Tuberculosis te hi a damdawi kha lo hmuchhuak ta lo se, kan hlauh turzia mai chu! Mahse tunah chuan Isoniazid, Etambutol leh Rifampicid hmangin duh duh hunah kan tihlum thei ta. Antibiotics te hi hmuchhuak ta lo se kan inzai ngam dawn em ni? Hnimhlum leh kahhikna te ngat hi awm lo se tunge inzai ngam ang?

Tun thla hnih lek chhung hian khawvel chuan damdawi pawimawhzia a hre thar ngei ang. Kan damkhawchhuah hmasak phawt hi a lo pawimawh hmasa ber si a. Kan Pharmaceutical Reseacher te hlutzia hi hripui lengte a lo reh a, nunphung pangngai kan neih leh hunah pawh i hre reng ang u. Eng natna pawh hi a damdawi a awm miau lohva, natna hrikte kan do hneh miau loh chuan kan thihpui dawn tho tho a ni. Phai hmun hlaah damdawi in tha ber panin, rangkachak khumah pawh mu mah i la, khawvela Doctor thiam ber ber leh hmanraw changkang ber berten min hual khup mahsela chungte chuan min chhan zo dawn si lo!

Natna chu, a DAMDAWI a awm loh chuan HLAUHAWM a lo ni mai thin.