Politician zah nachang hre lo

Kan thu ziak hi a chang khel khawl dawn hle a, thil siam ṭhat duhna rilru aṭanga put chhuak hi chu thu a nêm hleithei tawh lova, kan pal bawrh bawrh loh chuan he ram, kan ram, neih chhun hi kan aiawha roreltu tura kan thlan politician zinga zah nachang hre lo, zak thei lo, sum hmanga thil tifel theia inngai, thuneihna neih tak avanga duh duha tal theia inngai hi kan tam avangin 'a hua hua chu in ni mai' tih ang khan a hua chua lo in en fiah ve mai teh u.

1. Politician pub­licity atchilh lutuk, mahni chet velna midang post tir chhen ṭhin, kalna apianga PSO te pawh cameraman atana hmang duh hial VIP nei state kan ni hi a vanduai thlak in ti ve em? Sorkarin thu puanzarna ṭha tak, Information Department an neih reng laia mahni chetvelna a tam thei ang social media lama puan zar tum tlat zel ringawt mai VIP nei hnam kan ni hi Mizo mipui kan vanduai a, heng politician te hi an zak thei lo a ni.

2. Politician zingah hian khawi pawl pawl hruaitu hlui emaw hi an tam a. Heng pawla inhmang mek zingah hian nakina Minister la nih ve mial tum, nakina MLA la nih tum avanga tun aṭanga chu lam ringawt ngaihtuah, zah nachang hre miah si lo kan ngah hle a ni.

Nakinah ram kan la siam ṭha ang, tih awm si lova nakina MLA nih mial theihna tura tun aṭanga pawl hmatheh chunga politics ralkhat aṭanga khela pawisa ngah em em te hi an zak thei lo a ni. Hetiang mi hi kan politics ah hian langsar deuh deuh an awm a, hnathawh mumal sawi tur nei lova pawla inhmang chunga hausa hluai thei, politician ni zui ta tam takte hausakna hi chhui a ngai lo maw?

3. Politics hmang­in kan han inthlang zova, sorkarna chan hnu ah duh duh ti theia inngai politician te hi (term hmasa leh tun term pawh) inen let ve deuh teh se. Restricted tender tih te hian kalhmang a nei a, chu pawh hmang lova duh duh kan thei sema sawiselna kara kan kal tlang pui theih zel avanga thil awm dan hi kan ram hian a tur a ni.

Tuna contract hna Vai hminga chhanga mahni invulh mek te, midang hming hawha hna lian tak tak thawk mek politician zah nachang hre lote u, tunah him angin lang mah ula nakin lawkah chuan in hming hmerhin ṭhangtharte hian an la vawm zui tho tho ang che u.

- Mapuia Hmar, Ramhlun North