Lottery sum bo nia sawi hi Ngaihthah chi a ni lo

Mizoram awm tirh ata sum tihchingpenna lian ber nia lang, khawvel ram dang leh India ram ngeiah pawh thleng nise mipui ngaihven lawih tur, sorkar inrelbawlna ṭha leh ram changkang chu nise, mipui leh media-te pawhin thu dik zawn chhuah an tum ngei ngeina tur sum tihchingpenna, Mizoram sorkar hnuaia Lottery-ah a thleng ta mai hi a vanduaithlak takzet a.

India rama sam inphiarzawmna hmanga eiruk dotu leh thuneihna sang tak nei ‘Competition Commission of India’ (CCI) pawhin Mizorama Lottery kalpui danah dik lo takin thil an ti nia an hriat avangin an chhui a, an chhui zelna hi Supreme Court-ah ngaihtuah mek a ni. CAG pawhin lottery an kalpui dana audit-na report-ah Dan an bawhchhiat ngei thu leh sum chingpen Mizoram sorkar budget aia tam daih, sorkar sum bawma lut tur cheng vbc 11,808.77/- a riral a ti hial a.

Lottery sum bo nia sawi hi a tam thamin a rapthlak takzet a, ngaihthah mai mai chi a ni hauh lo. Mizoram mipui hi a lu nungin mi nuai(h) 12 kan tling ṭep tawh awm e. Nau piang hlimte nen pawh insem ta ila, Rs.98406/- vel ṭheuha insem theih khawpa tam a ni. Heng sum zo zai hi mimal tu emaw, mi tlemte chauh account-a lut tur chuan a tam tham mah mah e.

CAG report meuhin a tarlan heti khawpa sum tam tham kawng bo nia sawi hi opposition party MNF chauhin a beih tura dah phal chi rual a ni lo. Hemi chungchangah hian rorelna fel leh thianghlim kalpui duh nia insawi ZPM-te pawh hi an ngawi reng dawn em ni? BJP-te pawh Central lama in pute koh eih-na tham a ni asin. Hetiang zat sum tam ngaihven tur chuan MZP/ MSU/ YMA-te meuh pawh inrawlh se huang lo daiin kuang lo an nawr bik awm love.

Kan Zoram inrelbawlna leh kalphung siamṭhat duha thuziak mi tam tak lahin he mi chungchang an ziah lah ka la hmu fuh hek lo. Kan ram siamṭha tur hian a eng lai ber hi nge ngaihtuaha ngaihtuah loh tur tih pawh hriatthiam a har ta hle mai. Cheng nuai tel eirukna nia an hriatah ACB-a FIR thehlut ṭhintu, dik lo leh hlemhletna do rengtu awmchhun nia lang PRISM-te pawh khawiah nge an awm tak le? Cheng nuai(h) tel mai ni lo; cheng vaibelchhe tel hlira chheh a, chheh hmun singkhat sangkhat zariat chuang tihchingpen nia sawi hi mimal tin pawhin mutmawh hnarmawhah lak hi kan zavaia bat a ni. Mizo mipui hian hetiang em ema tam tham sum luangral dik lo chungchangah thudik hai chhuah hi kan chanvo dik tak a ni.

MNF party ho hi Lottery chungchang buaipuitu leh ngaihventu ber an nih vangin hma an lo lak tawh dan ṭhenkhat tarlang ila. MNF President Pu Zoramthanga chuan Lottery-ah dan bawhchhiaa an kalpui chuan Mizoramin cheng vaibelchhe tam tak an hloh dawn tih sawiin, ni 06.03.2012 khan Press Confereance a lo nei tawh a, party ang pawhin ṭum 5 zet Press Conference an ko a ni. MNF workers-te chuan Dt. 9&10/7/2018 khan Lottery office hnathawk kal turte an dang ta hial a, 10/7/18 tlai lam khan Lottery kalpui dan chu sorkarin a suspend ta rih a nih kha.

MNF thuchhuah tarlan dan chuan, “Vai Firm pali-te hun ral tawh pawh vawi thum lai an la pawhsei sak a, an pawhseina hnuhnung berah phei chuan ‘tiam chin awm lo’ ang hialin ‘30.09.2018 emaw, tender chinfel hun emaw, a engemaw zawk zawka a hnuhnung zawk thlengin’ an ti a. Tender hi kum 3 fel lo se, a fel hma zawng chuan an kalpui dawn tihna a ni a,’ Lottery kalpuitu Pu Hawla vai ṭhiante chuan dik lo takin thil an ti a ni. Dik lo taka Lottery Distributor-te hun pawhsei hi suspend mai ni lo cancel nghal turin kan phut a, tender maksak tak mai, anmahni duhsak bikte chauhin an chhan theih tura an siam pawh hi cancel a, a rules siamṭhat ngai laite siamṭhat hnuah a thara tender chhuah leh kan phut bawk. Khaw eng pawh zah zo lovin savawm khuaila ang maiin maimit chhing chungin an ham buan buan a, kan thil phutte tihlawhtling tur hian a tawp thlengin kan kal dawn,” an ti a.

Hetih lai hian Chief Minister Pu Lalthanhawla chuan Dt.13/7/2018 khan Congress Bhanvan-ah thusawiin, lottery-ah hian naiasen pawh an eiruk loh thu te, MNF chuan an sorkar lai aṭang tawha engemaw dik lo deuha an kal pui thu a sawi a. MNF lam erawh chuan May, ni 17, 2017 khan Chief Minister hnenah hian CBI ko lut tura ngenna lehkha an thehlut tawh a, chutah chuan an hun lai tangin Lottery an kalpui danah CBI emaw, a aia corruption chhuitu lian pawh chhuitir vek turin kan cho em em a, CM hnenah pawh chhuitir vek tura kan ngen chung pawhin Pu Hawla chuan hma a la ngam lo, an ti ve thung.

Chief Minister Pu Lalthanhawla hian Lottery chungchang hi CBI chhuitir turin a tifel tawh a, chhanna an la hmuh loh thu sawi mahse, MNF lamin RTI hmanga Lottery chhui tura CBI ngenna lehkha hi an dil pawhin sorkar lam chuan a la hriat loh thu leh, lehkha pek tur an neih loh thuin an lo chhang tih a ni bawk si.

Eng party pawh kan ramah hian sorkar se, kan do leh huat ber tur chu mipui pawisa hlemhletna leh eirukna laka fihlim loten an tichingpen ṭhin hi a ni. Congress worker-te hian MNF sorkar laia sum tihchingpen nia sawite kha vawiin thleng hian social media-ah nimina thil thleng ang maiin an sawi thar reng peih a. Thu dik a ni emaw, ni lo emaw MNF hun laia sum chingpen nia puh belhkhawm kha cheng vbc 100 pawh a tling awm lo e. Kum 10 meuh thil tidik lotu chhui thei dinhmuna an awm chhung hian MNF hotute zingah eiruk avanga jail bang zut ta pakhat mah an awm bawk si lo.

Mizote hian thil dik leh ṭha chu kan hria a, a sawi pawh kan sawi tam. Thil ṭha ringawt kan hriat a, thil ṭha zawn chhuah kan peih si loh chuan awmze nei lo a ni. Cheng vaibelchhe singkhat sangkhat zariat chuang bona ram nia chai mek Lottery hi engtin nge Mizo mipuiten kan thlir zel dawn le...?

- R.Lalhmangaiha, Bethlehem veng