Politics titi chhunzawmna

Vanglaini article ṭha tak takte aiin zeldin leh thutak belhkhawm deuha politics titi hian tunlai chu ka rilru a la tawh zawk a, inthlan hi chu pawn lam aṭanga Kotlang A Team tan pawh hian a nuam ve em em a ni.

Pu Hawla pui roh hi a la tling leh ang an ti. Ani hian khingtu tur hi a la nei mumal vak lova, MNF aṭang hian tute unau emaw hian bei viau mahse an ngam tak tak dawn loh avangin a khingtu tur chu mi dang daih Thenzawl khaw chhuak zawk a nih hmel e an ti leh a, chuti a nih chuan a tihchhiat a tam viau chung pawh hian a lal ber ber em avang hian tihṭhat a lo ngah tawh si a, a tling leh dawn an tia lawm.

Pu Zorama tak hi a tlin dawn leh dawn loh a chiang lova, a tlinna tur chiang bial him ang deuhah MNF midang an lo lut thut tawh si a, tunah hian bial pahnih vel a melh a, Aizawlah bial pahat a ṭhut chilh a, khaw chhak lamah bial pakhat chu ral khat deuh aṭangin a la hual bawk an ti. Ani hi a tlin loh palh chuan MNF tan a pawi thei ang.

Pu Duhoma hian an veng lam hi a tum nghet a nih chuan chance a nei a, a rilru a ngheh loh chuan a political career-a a tawpna atan a tla thum dup thei an ti. A kum a lo tam ve deuh tawh a, party lian ṭhutchilhtu a ni bawk si lova, tun inthlanah a MLA zo lo a nih chuan a politics kawng hi a tawp titih tawhin a rinawm.

Congress lamah hian a hmaa bo­ruak sang leh khawih phak loha awma ngaih Sports Minis­ter pawh hi a bialah hnam dang an tam a, BJP lamin an target avangin a rilru a hahdam bik loin a rinawm. Minister zingah Finance Minister pawh hi a ṭan viau a ngaiin a rinawm a, Home Minister hi khawi bial aṭangin nge ṭan a lak dawn a la hriat loh. Home Minister hi Hmar awm tamna lamah a kal tlut tlut mai a, sitting MLA candidate ni phak lo an awm nawlh mai thei a nia. Home Minister hi MNF lamahte a lo va dâk deuh dêk dêk niawmin an sawi a, hei chu titi mai mai a ni a, kei chuan engmah hriat chian ka nei lo e.

MNF-ah hian ṭhang­thar cak chak tak tak, social media leh thil danga bengvar riau hi an awm a, hengte hi party lam hian an lawm viau dawn emaw tihlaiin party lama senior zingah, “Naupang te te, junior bawk si, mahni intihlar tum, next election lama ticket beisei tur hi duh aiin kan hotute hian an zinnaah hian an hruai nasa. Senior min hlamchhiah,” ti tawk an awm.

Ṭangrual pawl lamah pawh hian sawi tur neuh neuh a awm ve der tawh mai, ZNP zingah hmin zan lo an la awm cheu an ti bawk.

- Ramtea Kawlni