Zan Curfew laia Huau Huau Programme

Aizawlah hian tun lai chu zan tin Vanapa Hall leh Hall hrang hrangah hian thil tih khawm hi a awm ṭhin a. In aṭanga TV leh YouTube lama thlirtute hi chu kan mit leh beng a tlai ṭhin tehlul nen kan ṭhalai tam zawkte leh zana eizawng ṭhin 'Zan Curfew' puan hnantute hian eng vangin nge milar leh mi thiltitheite hi zan chhuah phalna petmit hi an pek bik ziah? Kan dan hman hi Zan Curfew Covid dona a nih chuan lar avangin Covid lakah hian an him bik em ni le?

Gospel lam thila inhmuh khawm hi zan Kohhran inhmuh khawm ni si lo hian kil tinah hian programme a awm reng tih chu social media aṭangin kan lo hmu ve thei a. Zanah hian LIVE tia an pek chhuah avangin zan dar 9 hnuah an inah awm lovin hmun dangah an awm khawm ngei tih kan hmuh hi kan Police hotute hian engvangin nge an thlir liam mai mai theih le? Kan ramah hian dan hi mirethei rahbehna tur tawk leh mi lar leh chal langte tana pal zut theih tawk lekin em ni kan zam mai le?

Film release, zai intih siak tih te, huau huau programme te hi kan va han hmu ngun tawh si ve zan dar 9 hnu lamah hian.

Heng mite hi tu nge zan curfew bawh chhiat phalna lo pe bik zel ta le? Zan curfew min puan hnantute hian a thiltithei leh chal lang chin chu zan chhuah phalna an pe reng si tih te hi a va han mak ve!

Media lama thawk tawh dek dek PRESS CARD nei chu zan lamah hian an duh duhnaah an duh chen chen an chhuak thei thova, Police lamin an check pawhin an card an hmuh chuan an man miah lo. Chutiang bawk chuan sorkar hnathawk tam tak hi an Goverment ID hmangin zanah an leng ziai ziai thei an ti si a! Hei hi Covid dona tia kan ṭhalai khung lui tlattu, kum hnih dawn zan curfew puang tute hian lo hre ve tawh teh u.

Zana hna­thawka ei zawng hi kan pute hian an hre fuh lo a nih hmel a, a number pawh hian chhiar ila sang an chuang dawn; eizawnna hi chi hrang hrang a awm. Sorkar hnathawkte hlawh a buai loh avang hian zana inhlawh ṭhin tam tak te hlawh hi a buai tih pawh chhut ni se. Zan Curfew laia Huau Huau siam phal sorkar rorelna hi khawpui ṭhalaite rahbehna, a hmingah a lemin Covid dona an ni a, an tum chu ṭhalai leng tur dan beh niin a lang.

- Jonathan TBC