Mizoram hmabak tlangram terrace

Mizoram hi awih­tlan deuh vek a ni a, terrace hi awihtlana siam chi tak a ni. Kan ramah hian buh chinna atan hmun awihtlan terrace-a siam theihna tur tam tak a awm a. Sawrkar hi heti lamah hian a ṭhanharh a, thapui thawha hma a lak tak tak hunah chuan ram intodelh kan lo ni ve tawh ang.

Israel ram pawh ramro, ruahtui tlak tlemna chhengchhe tak ni ṭhin kha terrace an siam hnan a, nasa takin an thawk a, tunah chuan an intodelhna leh hausakna chu khawvel hriatah an phochhuak. Pathian nung ringtute an ni a, keini pawh kan ni a, engvangin nge kan beidawn bik ang le? Israel-te angin bei ila, Lapa'n mal min sawm anga kan awmna aṭang hian ram intodelhah min hruai lut ve ngei ang.

Tunah chuan Zokhaw lama vuh chingte pawhin kum chanve hnu lamah chuan vai buh an rin a ṭul leh tho ṭhin. Sawrkar a tan hle pawhin kan godown-ah thla hnih khat ei chauhte an chhek khawl ṭhin a, ram buailai aṭang tawhin kan dinhmun a ni a.

Kan buhfai lakna phairamte pawhin tunhma ang lovin khawkheng leh ruah­sur nasa an tawk fova, chuvangin sum hmuhna tur ringawt ngaihtuaha huan zau pui pui kan siam lai hian kan ei tur ber buh chinna turin kan ram neihte hi i buatsaih ang u.

Mi ram buh thar hi innghahna tlak a tling lova, ram tan a him lo. Kan hmalam hunte pawh hi kan thlirthiam a ṭul a, thar chhuah sawi tham kan la nei ve tlat lo. Buhfai rate an duh tawkin an chhiar a, kan lei a ngai tho a ni.

Vairamte nen intih thiam loh a awm chang­in kan eitur lakluhna kawng an dang thei bawk. Kan duh angin an chungah hma kan lak ngam loh phah fo. Tlangram terrace siam hi kan ram khai chhuahna tur a ni tih hi kan Chief Minister hlui Pu Thenphunga Sailo leh C.Laltanpuia, Chanmari te khan an lo hmu chiang em em a ni.

Kan ramah hian tlangram Tenrrace chawm ṭha turin ruah­tui a ṭhahnem tawk a, tuihna kang lo a tam a, lei tih ṭhat nan hnimhnah leh changpat a tam; kan hlawhtlina tur hmanrua khuanu siamsa a tam tawk a ni. Kan ram hausakna hai chhuah dan kan la hre chhuak lova. Ram rem ṭha tam zawk hi terrace-ah kan siam hunah chuan phai ram aṭanga kan lak luh buhfai, alu, purun etc chu kan hnianghnar ve mai dawn a ni.

Terrace-te chu mo­tor kawngin a chhun ang a, electric ṭha pek luh a ni bawk ang a, chutiang ang dal theitu ram chhengchhia a tam hauh lo. Kan rama awihtlan rualrem ṭha te hi terrace-ah a tam zawk kan siam theih hunah chuan Zokhua a eizawnna a harsat avanga khawpuia lutte pawh tam tak chu an khua-ah an kir leh ang. Tichuan chhungkaw tin kan lo intodelh tawh ang. He hun hi a nghahhlehawm tak meuh a ni.

- H. Neihchungnunga, Durtlang North