I DOCUMENT A HIM EM?

Ni 17.12.2021(Zirtawpni) zinga kan tukverha ka dak chhuak chu Lammual bul lawk a kang hluah hluah mai chu ka va hmu a, a hnuah kan DC Office a ni tih kan hre leh a. A pawi tih hian a hrilhfiah zo lo ang. Rilru a na vawng vawng a, chutihrualin an document te digitize hna chu hma nasa takin an lo la tawh niin a lang a, a lawmawm hle mai.

Mahse he kan chhiat tawhna hi sawrkar, pawl leh mimal tinte document vawn ṭhat kawnga min kaiharhtu lo ni mawlh se la a lawmawm ngawt ang.

Engmah hi zaah za him a awm hauh lo ang a, mahse kan tihtheih tawk; a hunlai mila a tha thei ang bera hmasawn erawh kan ngai takzet a ni.

Tin, Sawrkar leh pawl chauh ni lo mi tin hian kan pian hlim aṭangin document pawimawh tak tak, kan nihna tichiangtu, kan ram neih, kan zirna lehkha pawimawh tam tak bakah thlalak pawimawh tak tak, a bo a pawi em em thei kan nei ṭheuhin a rinawm. Khuarel chhiatnate hi engtikah nge, tu chungah nge, eng hunah nge thleng dawn kan hre si lo a. Kan phak tawka a vawn ṭhat dan kawng hrang hrang i han thlur dawn teh ang.

1. A hard copy: Hei hi a lehkha, kut ngeia kan khawih theih hi a ni a. Kan neih a kan dah that ngei a ṭul a. Chutihrualin kangmei, tuilian leh khuarel chhiatna hrang hrang avangin kan hloh thei a, keimahni ngei pawhin kan tibo thei a ni. Tin, hmuar leh thler lakah te a him lo bawk a. Uluk taka laminate a, file cover ṭha taka dah a, chhiatna hrang hrang laka him thei turah dah hram hram a ṭha. Khum hnuai, Thosilen chung etc ah te hnawh tawm mai mai loh tur a ni.

2. A soft copy: Hei hi computer/phone etc.-a a digital format-a kan dahho hi a ni. A format chu doc, image, pdf file te a ni thei a. A hard copy kan scan hnua kan dah luhte pawh a ni thei bawk. Heng document soft copy te hi vawn ṭhat dan hrang hrang a awm a - Computer hard disk, CD/DVD, Pendrive, External Hard Disk, Solid State Drive leh Cloud Storage ah te kan dah ṭha thei a. Mahse computer hard disk emaw phone emaw chauhah te kan han dah mai hian khuarel chhiatna hrang hrang kan sawite lakah hian an him chuang lo a ni. Virus bakah cd/dvd, pendrive leh hard disk corrupt vanga file chhia lakah an la him tawk lo cheu bawk. Amaherawh chu cloud storage ho (Company/Sawrkar etc in internet kaltlanga khawih theih tura dahthatna/storage hmunpui an siam, a awlsam zawngin a chhiat mai lohna atana hmun eng emaw zata a copy an dah ṭhat) te erawh hi chu 100% him bik lo mah se tun dinhmunah chuan data/document kan dahṭhat theihna ṭha ber niin a lang.

Engtin nge kan document pawimawh leh thlalakte bo leh chhe mai lo turin kan tih ang?

i) I document original copy kha uluk takin i laminate tir ang a, file cover ṭha takah uluk takin i dah ang a. Tin, a photocopy pakhat tal neih tel pawh a ṭha a. I thlalakte chu album ah ṭha taka dahin, hmun ro leh hul ṭha laiah i dah ṭha dawn nia.

ii) I document original leh thlalakte chu uluk takin i scan ang a (Thlalak hlui deuh a nih loh chuan scan ngai lovin kan nei sa tlangpui tawh a). A scan nan hian scanner man to tak neih a ngai lo a, heng mobile apps Adobe Scan, Microsoft Lens etc te hi a ṭha tawk em em a ni.

iii) I document leh thlalak soft copy emaw i scan sate chu uluk takin i thliar ang a, Heng local storage - i computer hard disk, Pendrive, CD/DVD, Mobile Phone ah te i neih remchan dan azirin i dah thei. A dahna hmun i neih tam chuan copy khat aia tam hmun hranga dah pawh a him viau mai.

iv) I document/thlalak soft copy chu cloud storage ah i dah ṭha tel leh ang a, hmun danga i dahṭhattea a chhia a nih pawhin cloud aṭang hian i la chhuak leh thei ang.

Cloud storage kan tih chuan heng google drive, iCloud, OneDrive, Drop Box etc te hi a larzual deuhte an ni a. A thlawna hman theih hi 5 Gb aṭanga 15 Gb te an ni hlawm tlangpui a. Tin company dang heng aia a free a hman theih tam zawk pawh hi eng emaw zat an awm bawk a. Tin, India sawrkar hian mipuite tan document bik dahṭhatna tur Digilocker a nei bawk.

Heng cloud storage bakah hian social media hrang hrang Facebook, Instagram, Twitter etc ah te a thlawnin kan thlalak leh video te kan duhtawkin kan dah thei a. Mi hmuh tura kan duh loh chuan mahni chauha hmuh theih turin private ah kan dah thei bawk a ni. Amaherawh chu mi hmuh tura kan duh loh chi chu upload laiin fimkhur a ngai thung.

Tin, tihdan ṭha ve tak dang leh chu kan thlalak leh document te slide show ang hian a video in siam ila, a video chu YouTube, vimeo, Facebook etc ah te upload mai tur a ni. Mi hmuh loh turin private ah kan dah thei bawk a. Kan lak let duh hunah screenshot emaw, frame export hmang tein a image format in kan la chhuak leh thei mai dawn a ni. Slide anga video siam hi thil harsa a ni lo a, mobile apps tam tak a free-a download theih hman awlsam tak tak a tam tawh a ni.

Technology a lo thang a, a aia tha zawk te a la rawn chhuak leh a nih chuan kan hman ṭangkai thiam chhoh zel a ṭha khawp mai.

Fimkhurna tur:- Cloud storage/Internet a kan document leh thlalak kan dahṭhat-te hi kan account password miin an lo nei a nih chuan kan computer leh phone ah te lut lo mah se, an awmhmun aṭangin an lo hmuin an lo ru thei dawn a, chuvangin a ven fimkhur kawngah ṭan lak a ngai thung a ni. Fimkhur dan tlem han zep tel leh hram ila:-

- I password te risk dik mai mai theih a ni tur a ni lo a.

- Internet/Social Media/email/message etc ah te link kan click fimkhur hle tur a ni.

- A theih hram chuan heng thil pawimawh bik kan dahna account ah hi chuan two-factor authentication on thei ila a ṭha viau mai. (A awmzia chu i password hmanga i luh dawn apiangin a verify nan i phone ah One Time Password a lo thleng ṭhin ang)

Khuarel chhiatnate hi kan thu ni lo mah se, theihtawpa lo inveng thei tura duan mihring kan ni a, kan inchhir lohna turin kan document vawnṭhat kawngah he thuziak mâwlte hi pen khat tala hma min sawntirtu leh kan beng tivartu a nih ngei ka beisei. Tin, mithiam zawk leh hre zawkte pawhin heng aia tihdan ṭha leh him zawk kan hriat chuan midang hnenah puangzar zel a ṭha ang e.

- Zoremsanga Chawngthu