Zan Curfew leh Vote a inzawm lo

Tun hnaia a thawka phita "In tih loh chuan inthlan dawnah kan vote lo ang che u," tia ṭawngkam cheh chhen mai hian kan politics ṭawp zia hi a ti lang niin ka hre ṭhin a, tun hnaiah chanchinbu leh social media hrang hrangah sorkar in zan curfew a puan rei tawh em avanga kum 2023 inthlan dawnah Aizawl ṭhalai rual curfew ning tawhin MNF reng reng an vote tawh dawn lo tihte hi thil mak tak leh thil dik lo tak a ni a, sorkarin zan curfew a puan hi political party nen lak kawp loh a ṭha ngai e.

Zan curfew hrim hrim hi chu Mizoram hi a nei rei ber kan nih hmel tawh a, ziaktu ṭhenkhat ziah dan anga human rights lam bawhchhiatna ang hiala an sawi te phei hi chu a dik hmel lo a ni. Tun hnaiah Covid hri pui a leng a, hei hian min tihbuai nasat em avangin kan hotutenj kan zavaia ṭhatna tura ngaiin zan lamah curfew an puang a, hei hi chhun lama mipui loh theih lova an chhuah a ṭul sia avangin chhun lama Covid hlau lo, zan lama hlau ang chauhva sawi pawh hi thu belhchian dawl tawk lo a ni tel bawk a ni.

Zan curfew in a tum ber chu Covid dona a ni a, tun hnaia Crime Control na anga Police lam in an sawi ri zauh erawh hi chu a fuh tawk lova, hei hi Covid dona tur a nih loh chuan curfew hi neih chhan tur a awm tawh lova, curfew hi chu hripui do na liau liau a ni.

I duh angin thil a kal lo a nih pawhin roreltute thu hi zawm phawt mai la, he curfew avanga MNF vote tum lo tihte phe hi chu sawi rik pawh sawi rik loh tur thil a ni a, mipui ṭhatna an duh vanga kan hotuten an thiam anga ro an rel a ni a, roreltute thu zawm mai hi ṭhalai fel leh fing chin tih tur a ni.

- KV Lalṭanpuia