Inthlan hmaa theih loh chu inthlan dawnah pawh theih loh

Mizoram chang ni lovin India ram hmun dangahte pawh MLA inthlan a hnaih hi chuan mipuiin thil nawr an nei ṭhin a, sorkarna siamtute rilru nêm lai leh vote zawnlai an châng a, tichuan an duhzawng tihhlawhtlintir tumin an nawr mai ṭhin.

Tunlai Mizoramah pawh he thil hi a thleng leh mek a, hetiang boruaka kan awm lai hian kan sorkar hrawn mek hi eng ang sorkar nge a nih tih tehna ṭha tak niin ka hria.

MNF sorkar lai khan an hunlaia an tih theih loh, mahse an term tawp dawna an tlak hma deuh khan mipui tihlawm beiseiin private sikul, khawtlang sikul ho kha sorkar aṭanga sum dawng thei turin an siam ta chiam a. Hei hi an sorkar hunlai khan sumin a daih lo tih an hriat vang a ni ngei ang engmah an sawi ri lova, inthlan a hnaih khan an inphal zau ta chiam a ni.

Nimahsela kha khan khawtlang vote a ko chuang lova, an tla ta tho a ni.

Heng sikul ṭhenkhatte hian sorkarah dinhmun ṭha zawk an beisei a, ṭanpuina tam zawk leh sorkara luh chhoh hialte an ngen ngam ta a, 2013 inthlan dawnah tak khan an rawn nawr tawh tih kan la hre awm e.

Khatah khan sorkar kha a ding nghet ngam a, tichuan inthlan a zova, a ngai bawk an sorkar a ni. A nawrtu lam pawh an reh vang vang tawh a, mahse tunah hian inthlan dawn ‘advantage’ bawk an rawn chuh leh ta chat a ni. Hei hi sorkar hian an ngaihtuah a, a theih loh an tih tawh hnuah inthlan dawna a nawrtu an tam avang hian sorkarin a zawh loh tur thutlukna a siam a nih ngat chuan a fel lo hle ang.

Tin, a nawrtu lam pawh hian sorkar hian an thil nawr hi a tihhlawhtlin chuan vote thlak hunah sorkar puih an inhuam a, an tihhlawhtlin loh chuan an vote loh tur thu sawi miah lo mah se, inthlan dawn taka thil tih a nih hi chuan a kalphung hi a hriat mai niin a lang ta a ni.

Tunah hian sorkar chuan sorkar hnathawkte a ngam tawh lova, 7th pay a pe dawn tawh a, hei pawh inthlan dawn hnaia thutlukna a ni. Inthlan dawna thil thleng hian kan ram hi nasa takin a lo tibuai tawh a ni. Inthlan hmaa theih loh chu inthlan dawnah pawh a theih loh tur a ni dawn lo’m ni?

- Lalthanpuia Hmar (LTA)