Politics i ngaihven ang u

Inthlan kum a ni a, political party-te chu an ṭang tawh hle. Mizo mipuite hian politics kan ngaihven lo ṭhin hle a, hnam anga poli­tics ngaihven lo ber pawl kan ni ngeiin ka ring.

Political party huam chhunga talte leh hlawkna hmuh tumte chuan politics hi an ngaihven teh meuh mai, hnam anga politics kan ngaihven lo ka tih chhan chu political party huang chhung tal loteah hian a ni. Ṭhalaite hian politics hi kan ngaihven lo hle a, vote thlak hunah vote kan thlak mai a, Mizo mipuite hian politics hi ngaihven lehzual ila, tun ai ṭha politician kan neih ka ring.

Ṭhalai tam zawk hi chuan political party hruaitute pawh hi kan hre kherin ka ring lo. Kan ram hruaitu tur, kan ram sum leh pai hman dan zawng zawng ngaihtuahtu, dan leh thupek kenkawh kawnga mawhphurtu ber etc. te chu kan politician-te an ni. Politician-te tel loin in ding khaw chhuak thei a ni thei e, mahse i ram leh hnam i hmangaih chuan politics hi i ngaihven ve a ṭul.

Khawvel ram chang­kang ber USA mipuite khuan poli­tics an ngaihven hle. Inthlan dawn kum­ah phei chuan an candidate-te chanchin an ngaihven a, a nun kal tawh zawng zawngte nen an phawrhsak ṭhin. Mi hausa tak tak, politician-te mamawh miah lo turte pawh an ṭawng chhuak, a chhan chu an hmangaih an ramin hruaitu ṭha a nei lo ang tih an hlau tlat.

Milar rual, millio­naire rualte pawh inthlan dawn kumah chuan an awm mai mai lo. An mi duhzawngte huaisen takin an au chhuahpui ṭhin. Sum tam tak nei mahse, an ram economy a chhiat chuan an tuartu tur zingah an tel tih an chiang a, ram leh hnam hmangaihna nen politics hi an ngaihven ve a ni.

Tun dinhmunah social media lamte han thlir ila, politics lam han sawi a, han ngaihven deuhte hi chu political party mi leh sate an ni fur. Social media vela in la fing tak, an party hruaitute'n an ngaihdan an lak lem lohte an ni fur. Social media-a politics chungchang han khel zingah hian ṭhalai lehkhathiam leh fing zawk, party awn lam nei lo hmuh tur an vang hle.

Hetiang renga mipui mimirin politics kan ngaihven loh chuan politician ṭha kan nei thei lo ang a, politician ṭha kan neih tlem chuan kan ramin hma a sawn tak tak thei lo ang. Tun ai hian kan hnam hian politics ngaih­ven ila chuan poli­ti­cian-te pawh an fimkhur lehzual ngeiin a rinawm.

Mipui mimirin politics an ngaihven loh miau chuan politi­cian-te tan pawh fimkhur loh a awl khawp ang. A bik takin inthlan kumah phei chuan nasa lehzuala politics hi ngaihven a ngai. Politician mamawh loa i in ngai a nih pawhin, i ram leh hnam tana rorel tur chu politician-te hi an ni tlat.

Political party-te'n candidate tur an ngaihtuah ṭan a, bial tam takah chuan an tifel thawkhat tawh. Tunge kan biala candidate tur tihte hi ngaihven ila, ram leh hnam tana mi ṭha lo tura kan ngaih an awm a nih chuan huai takin dodal ngam ila, kan ram leh hnam tan hian a va ṭha dawn em. Politics i ngaihven deuh deuh ang u.

- Lalramsiama