Hausak thut tumnain kan ram leh hnam min ei chhe mek

Harsa taka lehkha zir ṭang ṭang te, rinawm taka sumdawng te, rim taka hnathawkten kum tam tak an thawh chhuah tur aia tam dik lo taka ti tu te, smuggler te, Sawrkar phal loh thil ti tu ten thla 2/3 chung lekin an thawk chhuak mai a. Khawtlangah te, Politics-ah te a thil ti thei thei an rawn ni chho a.

Rinawmna te, thawhrimna te, teirei peihna te, dan pawisak na te, mipui nawlpui-ah te, ṭhangtharah te a bo phah nasa ta. Thamna hmanga kaltir ngai sumdawnna, biru leh tlanchhe chunga sumdawnna, duty awm loh lai chan ngai sumdawnna, duty hela kawng ruk siala sumdawnna hi Mizo Christian te hian kan hnawl phal mang tlat ta lo.

Champhai leh khaw­chhak lam chauh pawh a ni lo, Aizawla tunhnaia sumdawng rawn lian tharho hi dan pawna sumdawnna khawih, hausa thut an ni deuh vek emaw tih tur a ni. Hengho hian kan politics thlengin an control nasa tawh. Kohhranin politics thenfai nana a din Mizoram People's Forum (MPF) te hmalakna vanga hma kan sawnna te chu hengho hian an ṭhiat hiau hiau mai a nih hi. Hei aia kan value system, kan morality leh kan thlarau nun khawichhe nasa hi tunhnaiah kan la tawng lo.

Hetih lai hian kohhran a ngawi thei angreng khawp mai. Kohhran ṭhenkhat phei chuan smuggling vanga thawhlawm tam ta hi an intihtheih pui zawk emaw tih tur a ni. Zirna uar kum kumpuan a nei a, ram leh hnam humhalh kumpuan a nei leh tur YMA lam pawh hian zirna awmzia neih loh tirtu, ram leh hnam min eichhe mektu hi kan ngaimawh lo mah mah deuh em aw...

Sum leh paia a hlawkna kan hmuh hian kan mit a tidel a, thildang engmah kan hmu hleithei tawh lo chu a nih hi. Dan lova che ten sawrkar an vau let ngam tawh a, a sawiseltute hi mi rilru chhia tiin min puh let ta mek a, sawichhe ngam pawh kan awm mang tawh lo! Smuggling nasatna ram, ram nuam leh awhawm an awm ngai lo. Ram ralmuang lo, dan pawisak lohna, law and order fail na ram an ni vek. Chutiang hre tur chuan Central America lam Mexico, Colombia tih vel en pawh a ngai lo, kan ṭhenawm Manipur aṭang hian a chiang viau. Tun hma aṭanga smuggling hmunpui, a kalkawng ber ni reng an ni.

An mi hausa tam tak pawh smuggler an ni. Ram ralmuang lo, dan pawisak­lohna leh law and order chhiat berna state an ni ta ringawt mai, ram awhawm ni ah kan ngai emaw chu?

Hetiang hi kan tawng chho mek a, mi tam tak hian kan welcome em em mai bawk si. Kan ram leh hnam hmalam hun hi ngaih­tuahawm deuh a ni.

- Dr Samuel Laldinthara, Champhai