Politician te u, inluling suh u

Tun hnaiah social media hrang hrangah ruling party nih vang te, ruling lama mi pawimawh nih vang te, MLA nih vang te, ṭhenkhat chu ruling pawh ni kher lova political party lama nihna neih vang te, chutiang zelin politics lama behchhan neih vanga Mizorama sechêk kal ngat ngat mai, mahni duh dan dana thil kalpui thei emaw tia tawn pawp pawp ngam mihring hi Mizoramah an pung zel a ni. Heng mite hian lo hria se ka duh chu politics khel ho ta bik a ni lo kan ram hi - rawn huangtau viau tawh lo teh u aw.

Mizoram neitu hi tunge tih inzawt ta ila, tumah a neitu bik an awm lo a ni. Ram enkawl tura thlan tlinte phei chu kan chhhiahhlawh nih in huama rawn lut in ni zawk, nangni awm hma khan Mizoram hi a lo awm daih tawh. In sorkar hma pawh khan he ral hi a kal mup mup tawh tih lo hria ula, tuna ruling nih vanga rawn pawr em em hi sim hmak teh u.

Nihna neih san avang te, sum ngah leh neih nun avang hian midang chunga leng emaw rawn in ti reng reng suh u aw. Sum hmachhuan khan rawn intithei viau suh u aw. Sum ringawt atchilh politician te kha kan chhinchhiah vek che u a nia aw. In sum siam dan te, in tih lawm kual vel dante kha kan hre lo emaw rawn ti reng reng suh u. Hming hrang hrang hawha contract tam tak tak in thawh te kha kan hai miah lo a nia.

Mizo mipuite hi kan fel vang leh a nawlpuia mi pawisawi hlauh vang hian kan la ṭawng chhuak lo mai mai a, tuna inluling deuhho kha 2023 kum chanve velah chuan in hming te, in hna thawh dan te, in intih lawm dan te tar chhuah a la ni lovang tih a sawi theih loh e. Social media hi khap beh zawh a ni si lo.

Hawh u, i chapo lo teh ang u. Chapote chu kan Lalpa hian a dodal si a. Chapo tur hian ruling nih kher a ngai lova, opposition pawh chapo tlat mai politician zingah hian an tam a ni. Politics ngaihsak lem lo Mizo mipuite hi i zah ang u.

Politics ringawt ngaih­tuahtute hi ram hmangaih tu pawh in ni kher lo, in Mizona hi kan lo thlir reng a ni. Ṭhenkhat chet dan hi chu an awmna Party pawh ti phel thei tur khawpin an inleng a ni. Lalpa hian ro a la rel dawn a nia.

- Zosangpuia, MSVT