KA HRETHIAM THLAWT LO!

MLA thlan kum a nih vang chauhin tunah hian lalna chan tum pawl eng engemaw an rawn phingphihlip chhuah hum hum ni berin a lang a. Pawl ṭhenkhat chu NGO aṭanga political party a inlet leh political party hrim hrim tura lo piang an nih laiin ṭhenkhat leh chu inthlan chuh tum ve tho si, mahse political party nih hreh em em an ni thung a. Opposition political party awm sate pawh political party nih hreh em em pawlah hian an han tel leh mauh mai hi hriatthiam har ka ti a, ka hrethiam thlawt lo.

Heng inthlan chuha sawr­karna Congress Party aṭanga chhuhsak tumtute hian Congress sawrkar kan hrawn mek hi sawrkar ṭha lo, hnathawk thei lo, thlak ngai hliah hliah anga chhuah phet an tum a. Kan ṭhalaite hmakhua ngaihtuah a Youth & Sports Department changtu Minister hnathawh zawng zawng leh MNF sawrkarin a din, hman ṭangkai ngaihna an hriat miah loh, Congress sawrkarin tangkai taka ṭhalaite tana a hman tak, Mizoram Youth Commission hnathawh zozaite hi mipui hian an hre lo emaw an ti a ang hle mai.

Hengte bakah hian Mizoram tana hmasawnna rahbi pawi­mawh tak tak pahnih, MNF sawrkarin sum a hman dik loh avanga hluihlawn tawh, Tuirial Hydro Electricity Project leh Falkawn Referral Hospital-te chu Congress sawrkar hian tharthawh lehin hman tlakah a siam leh tih te, Referral Hospital phei chu doctor zirna turah hial a chhuah tihte hi lal chak ve em em ho hian an hre lo der a nih a rinawm. Mahse mipui hian kan hre miau si a nih hi.

Heti anga meng leh meng inbum tumna awm tlat hi hriatthiam har ka ti a. Kan hrawn mek Congress sawrkar hi hnathawk lo nia lan tir ṭalh an tum leh, sawrkar lak tlak loh, thlak ngai nia mipui hnena an tlangau ṭhin hi a nuihzatthlak zawk em avangin hriatthiam har ka ti bawk a ni.

Sawrkar sum dinhmun Congress sawrkar hnuaia ṭha chho ta em em te hi sawi hmaih phal chi a ni lo. Sawrkar ṭha lo hnuaiah chuan sum dinhmun hi a ṭha thei ngai lo a, leiba rulhna tur tlakchham ngawih ngawihna te a thleng thin a. Mahse hei hi tuna Mizoram dinhmun a ni lo. Tunhnai khan Bangalore a awmhmun khuar, NGO rintlak Public Affairs Centre chuan kum 2017 chhunga sawrkar ṭha (good governance) awmna an thlan zingah state te an tih, mihring nuai 20 aia tlem chenna state 12-ah Mizoram chu sawrkar ṭha awmna state 3-naah an rawn thlang nalh mai a. Heti ang dinhmuna din hi thil namai lo leh awlai lo tak a ni a, chuvangin “Kan sawrkar hi a lak tlak loh, sawrkar tha kan mamawh, thlak a ngai,” tia lo iak lo iak te hi thil zahthlak tak a ni.

Khawilai emawa hnathawh ṭha lo deuh lo awm te, khuanu rel chhiatna lo thleng avanga harsatna kan tawhte leh mi zawng zawng tih lawm theih kan nih lohna kara lungawi lo lo awm te hi thlirna zimte aṭang chuan “Sawrkar hi a chak lo, a ṭha lo,” tih mai chu a awl ve ta viau ang. Ama’rawh chu zau zawk a thlirna, Sap hovin, “The bigger picture” an tih anga kan thlir chuan tun kum 10 kal ta chhung hian hma kan sawn nasa hle a, MNF sawr­karin hmasawnna chu a zuan­in a zuang dawn an tih kha Congress sawrkar hnuaiah a takin a lo thleng a, a hretu leh hmutu chu Mizo mipuite hi kan ni a ni.

Thlirna zau zawk hmanga Mizoram dinhmun mi ṭhen­khatin an thlir duh tlat lo hi mahni hmasial vang ni berin a lang a. A ṭhen tan kan lal lo rei tawh em a, lal leh hi kan thlahlel a ni an tihna a nih laiin a ṭhen tan lal ṭhutthlengah hian kan la thu ve lova, ṭhut ve hrim hrim hi kan duh a ni, an tihna a ni a. Lal duh vang hrim hrim leh itsikna thinlung vanga insawichhiat vak vak mai hi Kristian ramah chuan zu kan huat ai hian a huatthlala fe zawk a, rilru kha hi Pathian pawhin a duh loh berte zinga mi a ni hial a.

Chuvangin, mipui hian rilru thianghlim tak pu chung leh tute emaw thil sawi a dik leh dik loh finfiah chungin thutlukna kan siam hi a pawimawh hle a ni.

- David M. Thangliana