Bial ngaihnawm tur Siaha

Mizoram state a roreltu sang ber MLA inthlan kan hnaih ta hle a, kumin inthlanah hian issue lian tak pakhat han thlurbing ta ila chu chu ‘zu zawrh’ a ni.

Ka ngaihtuahnaah Zohnahthlakte zinga Pathian malsawmna dawng fal bika ka lo ngaih ṭhin Mara fate chu England aṭangin a bik takin R.A Lorrain hmangin Chanchin Ṭha an dawng a chuti chuan tisa leh thlarau-ah nasa takin malsawmna an dawng a ni. RA Lorrain a te nupa leh a faten Mara ramah an hun tawp thlengin rawng an bawl a, missionary pali laiin he ramah hian an lu an phum. Tunah hian an fanu Pi Violet-i chu he ramah hian kum 80 niin a hun tawp a hmang mek bawk.

Missionary zawn chhuah leh thihchilh hnam an nihna angin politics-ah pawh hamṭhatna tam tak an dawng a, autonomous district hial an lo nei. Mizoram politics-ah pawh mi chhuanawm Pu Hiphei te, Pu S.Hiato te hre lo an awm awm love. Politics-ah chuan a vawr tawp an thleng te pawhin a lang.

Kumin General Assembly election turah hian Siaha bial leh zu hi thlurbing ta ila, chuta tan chuan Siaha hi Kristian te tan darthlalang pawimawh tak ni dawnin a lang.

Candidate ni thei turte nen lam ilo thlir teh ang. D.r. K. Bei­chhua chu zu zawrh duh lo party MLA ni mek a ni a, a ding leh ngei turah ngai ila, damlohna chi hrang hrang leh zu avanga damlohna te pawh tidam tura theihtawp chhuaha lo thawk ṭhintu a ni.

Congress lam aṭang­in Cabinet Minis­ter hial lo ni tawh Pu S.Hiato chu Congress candidate a nih hmel a, mimal tak chuan an tling tawk ve ve hle ang. Dr. K. Beichhua ni se MNF tlak runpuiah pawh a tling thei a ni. Inthlanah lo tling lehin sorkar bawk sela, Health Minister atan pawh a iaiawm lo a ni dawn. Pu S.Hiato pawh Cabinet Minister hial lo ni tawh, hausa tawntaw a ni.

Tunah a fapa chuan SS Enterprise hmingin zu supply-tu a ni mek bawk a, tuna kan Zoram dinhmun ngaihtuah hian zu avangin nunna tam tak kan chan a, ṭhalai tam takin an thih phahin HIV/AIDS a pung tual tual a, hmeithai tamna ram dinhmunah kan lo ding ta hial a ni.

Khai le, Mara Christian te Missio­nary zawn chhuah leh thihchilh te hian Bible-in a ṭha a tih lamah nge ṭha lo lamah an vote dawn tih hi Zoram darthlalang pawimawh tak a ni dawn a ni. Pastor leh Upate pawhin tun aṭangin eng zirtirna nge an chhakchhuah dawn le?

Party ruihchilhna nge an dah pawimawh ang a, Bible zirtirna? Bible-ah hian zu zawrh sawi mawina hriat tur a vang hle. Chuvangin, kumin inthlanah hian Siaha bial hi a ngaihnawm dawn a ni. Keini Hmar ho te hi Mara ang bawka Lusei thlah ni lo kan ni a, zohnahthlak dik tak kan ni. A hranpa-a Missionary zawn chhuah leh thih chilh kan ni ve lo. Mahse keini Hmar-ho zingah chuan Mizorama zu supply-tu hi kan la awm lo niin ka hria.

Hei hi Hmar Chris­tian ka nihna anga ka ngaihtuah fo a ni. Chutichuan, Siaha bial hi Zoram ringtute mar enna pawimawh tak a ni dawn a, i lo thlir ang.

- Rualkhuma hmar