Champhai DC 100% support

Ka hmelhriat ngai loh leh a hmaa ka la hriat fuh loh, Champhai kal tlanga dan lova Kuhva phurh lo man ngamtu Champhai DC Pi Maria CT Zuali hi full support ka pe a, ka ṭhalai puite pawh hian an support tih chu social media tinah kan hmu thei a ni.

He DC hi Cham­phai aṭanga an sawn chhuak a nih chuan Mizo ṭhalaite chuan sorkar an hmuh dan hi a dang daih dawn avangin a hmasa berin Champhai aṭang hian sawn loh ni phawt rawh se.

Pahnihnaa ka sawi leh duh chu eng vangin nge kawngpui hranpa lai tawp tawp thei khawpa thiltithei te hian Assam Rifles leh Customs ho check an hlauh viau? Kuhva tawlh hi dan anga tawlh ni ta se Customs leh Assam Rifles lak ata tlan chhiat hi a ngai dawn lo a ni.

Dan lo na na na chu dan lovin kal mai se, chutiang teh hrepa tlan chhiat pui ngai, bihruk pui zak zak ngai sumdawnna chu, "A hlawk em a," tih vangin kan sorkar hian a khap duh lo a nih chuan kan sorkar hian smuggling ni reng si hi a hmu lo der tihna niin engvangin nge dan lova thil tih dang hi a do tlat bik tawh ang? tih zawhna a lo piang ta a ni.

Pathum lehnaah chuan kan ramah hian dan lova sumdawnna hi duh ang anga kal­pui kan phal dawn a nih chuan miin min hmuh dan tur chu sorkar awmze nei lo, dan leh dun pawh pawisa lo kan ni dawn a. Chumi hlawkna chu mi tlem te pawisa chiah a ni si ang a, Mizoram pumpui image hi smuggler tlemte te avangin a chhe dawn a, ṭhalaite hi nakinah chuan smuggling uar state tia an sawinaah kan la puitling chho ang. Chumi chu kan thiam loh ni si lovin smuggler tlem te leh a khap duh lotute vang a ni tih miin hre si lovin Mizoram pawnah image chhe takin kan awm ang tih a hlauhawm em avangin tun hi smuggling tih tawpna tur bulṭanna ni se.

Kum tam tak smuggling kal pui tawh hi tunah ṭhalaite hian an haw thar chauh ni lovin history lama kan chhiar ṭhin angin 'immediate cause' hi a awm ve a ngai. Kelkang daia kuhva hal ral hi a bulṭanna ni mawlh rawh se.

A tawpna ber atan chuan Champhai DC hian tun aia khauh zawk hian hma lo la zel se. Mizo tam zawk hian smuggling hi kan duh lova, tuna smuggler lam ṭang hi chu mi tlem zawk an ni a, pawisa a lo luh dawn avangin dan lova thil tih hre lote hi chuan ralthuam leh Heroine No. 4 tawlh pawh support law law se. A hlawk avanga dan bawh chhiat an support tlat dawn a nih ngai chuan, chuvangin dan lo chu dan lo a ni tawp mai. Mizoram sorkar hian smuggling hi a thlawp nge a thlawp lo tih chu Champhai DC an transfer leh transfer loh te, FIR an bawh zui danah kan lo hmu chat mai dawn a ni.

Mizo ṭhalai smugg­ling family chhung hnai vai lo zawng te hian 100% in Pi Maria hi kan support a ni.

- Lalremmawia (Mamawia)