Engvangin nge JNU Alumni, Mizoram demonstrationah ka tel ve ang?

January 10, 2020 (vawiin) dar 1:00 PM hian Vanapa Hall kawtah JNU alumni, Mizoram te huaihawtin JNU Zirlaite January ni 5, 2020-a misual hmaituam ten  an campus chhunga an sawisak duh lohna entirna (peaceful demonstration) an huaihawt dawn. He demonstration-a tel turin mipuite an ngen. January ni 5 tlai lam khan mi tu tih hriat loh hmaituam ten JNU, New Delhi campus ah lutin zirlai engngemaw zat an SU president tiamin an sawisa a. He mi duh loh entirna hi India ram khawpui hrang hrangah lantir a niin mi lar tak takte pawhin heng misual thiltih hi demna thu an chhakchhuak.

Engvangin nge vairam University pakhata thil thleng chungchangah Mizote kan lo inrawlh ve ringawt ang i ti mai thei e. He university zirlaiten Mizo hnam tana an lo beih nasat tawhzia i hriat chuan he demonstrationah hian tel i tum ve ngei ka ring.

1979 July thlaah Pu Laldenga leh Janata Sorkar inbiakna a tlawlh a, India Sorkar chuan Pu Laldenga chu a lo intiam tawhna safe conduct zah lovin a man ta mai a, Tihar Jail-ah an tantir a. Mizoramah India Sorkar chuan operation thlak turin a inbuatsaih mup mup mai. Nunau mipuiten nasa takin an tuar dawn a ni. Armed Forces Special Act hmangin mipuite underground lo pawh sipaiten that mahse courtah kal ngaihna a awm lo. Pu Laldenga chu trial a ni anga, convict anih chuan damchhung lungin tan emaw khaihlum mai theih dinhmunah a ding. Kan dinhmun a thim. Mizo tumahin kan protest ngam lo.

Chutih lai chuan JNUSU hmalalaknain vantlang inkhawm koh a ni a, zirlai hruaitute bakah politician engngemaw zatin Pu  Laldenga an man an dem thu leh duh loh thu an tlangau pui. He mi avangin India sorkar a tim a, Pu Laldenga pawh Tihar Jail atangin a chhuah leh ta a ni. Hetih hun lai hian JNU zirlaiten hma la lo se, Mizote dinhmun tur hi suangtuah ngam pawh a ni lo. JNU zirlaite kha inrawlh ta lo se Remna leh Muanna hi kan nei ang em? Zawhna tam tak a awm thei.

Tunah JNU zirlaiten harsatna nasa tak an tawk mek a, JNU Alumni mai nilo, Mizo mipuite hian JNU  zirlaiten  min  lawm tawhna hi kan rulh vena hun remchang a ni. Lawm rul turin i lo thawk chhuak ve dawn em? Lawm rulh ve ngei hi Mizoten a bata kan bat a ni e.

- Lalthuamliana, Ex-Student, JNU