KAWTKAI LAIBRARY

Mi ṭhen khatin kan ngaih ropui loh thil te hian nghawng ṭha tak a nei thei a. Eng thil pawh nise a ngaihlu leh a hmang ṭangkaitute a zirin a ṭangkaiin a hlu viau thei. Kawtkai Library chungchang sawi zui ve ang hmiang.

Aizawla Ramhlun South branch YMA hnuaia sub-committee peng pakhat Library & Documentation te chuan an hmalakna in an veng chhungah a mamawh tuten awlsam zawka hman ṭangkai theih turin Kawtkai Library an buatsaih a. He thil hi sawi zui ka chak a, a buatsaihtute hian an ngaihtuah zau ka ti hle mai.

Kum 2020 ah pawh khan Library sub-committee te hmalakna in hri avanga kan in kharkhip lai khan veng chhung mi a duh apiang ten lehkhabu an chhiar theih nan kawtkai library hi an lo buatsaih tawh a. Kha kawtkai library kha veng mipuiin hlawkpui lo se, tuna kawtkai library hi thar thawh leh a nih a rinawm lo, tun ṭumah erawh chuan mipuiin an lehkhabu chhiar duhte an kawtkaia va dah lam ni lovin YMA in library changtlung tak an neih bakah an veng chhung hmun remchang laiah he kawtkai Library hi buatsaih a ni a, library lian zawk hun bithliah neia hawn chi kal remchan loh lai pawhin he kawtkai library hi chu nileng leh zankhua a pan theih a ni.

Central YMA in zirna uar, kum puan thupuiah a neih laia hetianga branch YMA in khawtlang mipuite hman ṭangkai theih tura lehkhabu ṭha awlsam taka a chhawp chhuak hi kan kum puan thupui nen pawh a inzul hle.

Ramhlun South branch YMA library-ah hian lehkhabu ṭha tam tak a awm bakah hna sang zawk dilten an exam tur inbuatsaihnaa an hman ṭangkaipui theih tur central service exam turte tana lehkhabu ṭangkai tak tak pawh a awm niin ka lo hria a. Hetiang library changtlung hi branch YMA tam zawkte hian an nei ve ang em tih ngaihtuahnaah a lo lut a, entawn ṭheuh ila ava duhawm em.

Electronic thil leh silhfen thlengin a thar ber ber leh a man to tak tak te neiin inbel mah ila, fin leh varna lam hi a ngaihthah theih riau a, ṭhalai tam tak chu library leh lehkhabu dawr kawngka aia show-room kawngka hawng ngun zawk pawh a awm theih a. Chutiang mi chu original leh branded hlang pawhin inchei mah se, an incheina mil tawkin an inchhiar zau peih tlat ṭhin lo. Mite'n a nalh ang aiin a fing lutuk lo min tih phah daih thei. Pawn lam lan dana nalh viau si, fin leh varna lama chhungril kawrawng hi a awm theih tlat a ni.

Ramhlun South YMA hmalakna hi branch dang pawhin entawn zel ila. Mi ten, 'Chhiar tlem si, vak zau si,' min tih hmain kum khatah lehkhabu pahnih tal chhiar chhuak thei Mizo ṭhalai nih i tum ang u. Lehkhabu chhiar tam na na na chu belhchian an dawl a nia. Lehkhabu chhiar ngai lo miss Mizoram te hi kan nei ang e! A kuhva man leh a meizial man tur aiin lehkhabu a lei ṭhin a in an tih tur Mizo tlangval te ni ang u.

Thil ṭha tih nachang hi i hre thar zel ang u. "Unaute u. A thlawna lehkhabu chhiar theih te pawh a lo pung zel ang. Kum khata lehkhabu pakhat tal lei ṭhin nihte pawh hi intih hmuh zel ila. Kawtkai library kan sawi aṭang hian awlsam zawkna te, thil ṭha tih ve duhna chhar chhuak mawlh ang u.

- Ramchhana Hmar, Phuaibuang