Pawisa a awm dâwn em?
Kan Pute hian an han sawi tak tak chuan SEDP atan sum tam em em mai an lo dah ṭha reng mai tih kan han hre ve leh ta a. Covid dona atan sorkar hnathawk sum an puk chhan kha pawisa neih loh vang lam ni lovin pawisa neih sâ kha inthlan hnaiha 'sem' atan an duh vang pawh a lo ni reng thei a, keini tán zuk hriat ve theih lah ni suh.
Kum a lo thar ta a, pawisa awm loh thu bawk hi chu hre tawh lo ila. Sorkar hian pawisa lo kal hi hmin danga pawt huai tawh lovin sem chhuak zar zar thei se chu SEDP leh NLUP leh eng P pawh hi sem chuai chuai se rilru a nâ lovang.
Tunah hian contractor tam tak chuan an hnathawhna tura pawisa lo kal ngei ngei an hnen a thlen loh avang leh K Deposit leh Deposit tur pawh neih lohna boruak vela a tham ral avangin lei an ba ṭen ṭun tawh an ti.
PMGSY sum pawh hi a maka maka tam hai chhuah tur, khawh lut zir zir tur chu a lo awm tak tak a, chu chu a hman dan dika hman dâwn chuan pawisa lo thleng hi release zung zung a ṭul si a, chuvangin PMGSY sum pawh chu a lo buai zo ta a. Chutiang tho chuan PMKVY an tihte pawh hi a thawk tawh sâ te pawisa pek chhuah theih lovin central sorkar aṭanga sum lo kal hi state sorkar hian a la dah an ti a ni awm a. Hei chang pawh hi lo ni lovin Vawk Pul Hri (ASF) avanga vawk thi a tam tehlul nen tun thleng hian calamity ah pawh puan a la ni lovin an sawi zel a ni.
He boruakah kan awm lai hian PAHOSS tih angreng Aizawl mi lian in nei ṭha sate garage sakna atan a hlawm lianin sum an pe chhuak pawp pawp a, Sports project hrang hranga sum pawh hi SEDP aṭanga an pawh te pawh awlsam takin a dawk chhuak zut zur niin an sawi bawk si!
Hnam Run lama Secretary rual pawh an bill a tán laia anni aia MNF ni hnuhnung zawkten sorkar aṭanga sum an sawi chhuah zel theih zawk avangin an lungawi tawh bîk lo, tih thute WhatsApp lamah kan lo chhiar ve mêk bawk a.
Health Care bill leh bill dang táng a tam lai hian kum lo thar turah hian Mizoram sorkar hian sum a nei tawh ang chu maw?
- MS Dawngliana