Tlawng lui chhan a ngai

4th January, 2022

Kum zabi 13-na vel khan Mizote ang thovin China ram aṭangin Mirawng Hnam an lo thlang tla ve a. Tlawng lui hming hi Mirawng/ Rongmei ho hming vuah niin, an ṭawngin ‘Tuang lui’ an ti a, ‘Tuang’ chu ‘chuang’ tihna a ni.

Hmanlaiin an zawlnei, puithiam ni bawk chu a lung a leng em em a, Tlawng luiah hian Mau Pum-in a chuang let, a chuang let ṭhin a. Chuta ṭang chuan ‘Tuang lui’ hming a lo pu ta a. Mizovin kan lam ve thiam lova ‘Tlawng lui’ kan lo ti ta a ni.1 Mirawng/Rongmei ho hi Naga hnam chi khat, tuna Manipur-a chengte an ni a. Naga hnam chi 80 zinga Kacha Naga hnam peng an ni.

Naga hnam zingah rau rau chuan chin hills aṭanga lut hnuhnung ber an ni a. Mizorama an luh hnu hian Rongmei ho hi Mizoten Mirawng (Rongmei) tiin an sawi ṭhin. Hei hi kan sawi tum ber a ni lo.

Hetih hun laia Tlawng lui awm dan tur, Siamtu’n a duan ang tak hmelhmang hmuh a chakawm hle. A zar tlantu thing leh mau, nungcha zawng zawng nen. Tunah erawh chhantu ngaiin a rum vawng vawng a ni si a.

Tlawng lui tlantute:
Aizawl khawpui mihring rinrawl ber, Tlawng lui aṭanga Public Health Engineering Department tui pump, Greater Aizawl Water Supply Scheme Phase- II hian mihring 3,10,000 thleng chawm thei tura ngaih a ni a. Hei hi a tak takah chuan a ni lo tih a chiang.

Aadhar Card nei mek (Aadhar Statistics) aṭanga a lan dan chuan Mizoram mihring hi kum 2020/ 2021 hian 1,205,974 (1.21 millions) ni-a ngaih a ni a. Chhiarpui hnuhnung ber kum 2011 khan mihring 1,091,014 awmin, kan thanna, (growth rate) chu 10.54% a ni.

Hei hi kan dinhmun a lo nih mek tak si-ah chuan Census of India report hnuhnung ber kum 2011-a tarlan, Aizawl mihring 2,93,416 tih chu Tlawng lui tui ring pawh tun dinhmunah nuai thum kan chuang dawn tih a chiang reng mai. Tun aṭanga kum sawm lo awm leh tur 2030-ah hian engtin zel nge ni ang?

Lunglei mihring hi census-2001 a tarlan a nih ang chuan 47,137 a ni a. An tui rinrawl ber Tlawng lui tui pump a nih tirh, kum 1990 chho khan mihring 66,000 thleng chawm zo tura ngaih a ni. Amaherawhchu, tunah hian mihring 161,428 (2011 census) an ni a. Greater Lunglei Water Supply Scheme-in a chawm zawh loh chu thu hran lo ni ta se, Tlawng lui leh a chhehvel kan tih chereu zel dan ngaihtuahin ‘mahni Thlan lai’ kan ang riau mai. Kum sawm lo awm leh tur, 2030-a tana Tlawng lui humhalh inbuatsaihna hi a hmanhmawh thlak tak zet tawh.

Lunglei district Zobawk khaw bul mai, Zopuitlang (Zopui Hill, 1,395 mtrs. elevation) a hnar nei, Tlawng lui hian Lunglei khawpui chu chhuah lamah a luan hel a. Chu chu PHED chuan Pukpui ram, Pialthleng lui nen an infinna bulah Lunglei khaw mipui tan tui thianghlim intur an pump mek a ni.

Mizoram lui sei ber Tlawng lui (234 km) hian duhsak takin kan leilung, thing leh mau, a vela cheng Zofate a theih anga tam lei malsawmna vur tum niawm takin a luang a. A hnar neihna Zopui tlang aṭanga hmar lam pan zelin, Lunglei khawpui tan tui thianghlim a hnutchhiah hnuin, Aizawl khawpui tan Reiek kai aṭangin nitin tui thianghlim ṭhahnem tak, (initial stage-ah 7.05 mld, intermediate -15.27 mld. leh ultimate -24.18 mld = MLD millions of liter per day or megaliters per day) pump chhoh leh a ni a. Sairang, Mualkhang, Khamrang leh Bairabi khuate’n kawng hrang hrangin Tlawng lui hausakna hi an hne mek bawk. A fintu Tut leh Teirei luite nen Bairabi aṭangin Cachar district, Assam-ah a luanglut.

Tlawnglui paltlang khua leh a zarzo phak Mizoram mihring hi kan ṭhahnem hle ang. Hetih lai hian a kum tela Tlawng lui tui a kam zel thu te, PHED-in tui pump khawp an hmuh loh thu te chu social media leh nitin chanchinthar luahtu a ni chho mek thung.

Kum 2019-2021 chhunga Aizawl-Reiek kai Tlawng lui tui tlem zel dan chu hetiang hi a ni:-

1. 2019 tui tlem ni berah 70.742 million litre per day.

2. 2020 tui tlem ni berah 65.971 million litre per day.

3. 2021 tui tlem ni berah 31.679 million litre per day.

(Source: PHED, Govt. of Mizoram)

Riverine Reserved Forests:
Mizoram hian luipui kam tuak humhalh bik, (riverine reserved forests) hi 1832.50 sq.km. zeta zau kan nei a. Chu chu Mizo District (Forest) Act, 1955 hmangin Assam Gazette-ah dt.19.5 .1965 khan Notification chhuah a ni. (Notification No. ADC supplement to the Assam Gazette, dated 19th May, 1965 under Sec. 14 & 21 of the Mizo District (Forest) Act, 1955.)

Heta tarlan a nih ang chuan Tlawng lui kam tuak ramngaw humhalh bik hi 369.8 sq.km niin, Mizo District (Forest) Act, 1955 tlawhchhana a lo humhalhte chu hengte hi a ni:-
Luipui kam tuak ramngaw humhalh zau zawng hi Zopa Buh tin hmun zau zawng anga sawi chuan, buh tin 4,58,125 (183250 Hectares) zet a zau a ni a. Tlawng kam tuak ramngaw humhalh bik 369.8 sq.km hi tin 9,240 hmuna zau tihna a ni.

Luipui kamtuak humhalh titawp:
Kum 65 chhung zet luipui kamtuak, lui lai aṭanga a kam tawn 800mtrs. humhalhna dan kan lo hman tawh chu January ni 27, 2021 khan Gauhati High Court, Aizawl Bench chuan a hnawl (set aside and quashed) a. Gauhati High Court thutlukna dodal hian tlawmngai pawl hrang hrangte’n thuchhuah nei tawhin, Central YMA pawhin Chief Minister an sawipui tawh bakah, ni 27th March, 2021 khan CYMA Executive Committee chuan an sawiho leh a. A tṭul anga bawhzui zel turin Central YMA hnuaia Science & Environment Sub-Committee kutah dah a ni.

Gauhati High Court thutlukna chungchangah hian Mizoram sorkar, General Administration Department (GAD) pawhin dt.14.4.2021 khan thuchhuah (Notification) a lo siam tawh a. Amaherawhchu, he Notification hi tute emaw hum tumna a ni thei em, a tih theih.

A pawimawh em avangin point ṭhenkhat lo tarlang ila:-
1. Mizoram sorkar chuan a chunga court judgement hi appeal tul a ti lo va, amaherawhchu lui tarlante leh a kam humhalh a ṭulna avangin executive order hmanga humhalhna thupek chhuah erawh ṭul a ti.
Chuvangin, Mizoram Governor chuan lui tarlante leh chung luikam tuak meter 800 huam chin chu 'Restricted Area' atan a puang a. He restricted areas hi state sorkar ta a niin, hemi huam chhungah hian sorkar phalna lo chuan eng hmalakna mah neih phal a ni lo. Amaherawhchu, Council Reserved Areas chhunga Notification dated 28.01.1965 anga thil lo tih tawh, Gauhati High Court, Aizawl Bench-in (27.01.2021 notification) a ṭhiah hmaa thil lo tih tawh leh hma lo lak tawhte erawh chu a nih ang anga pawm theih a ni ang.

Mizoram Governor chuan a hnuaia mi ang hian competent authorities te chu Government of Mizoram (Allocation of Business) Rules, 2019 angin thuneihna a pein restricted areas chhungah hma la thei turin thuneihna a pe:- (The Government of Mizoram preferred not to file an appeal to challenge the said Judgment and Or- der, but considered the necessity to issue executive order for protection and preservation of the said rivers and their banks.

NOW THEREFORE, the Governor of Mizoram is pleased to declare the said rivers with its banks up to 800 meters from the middle of the river on both sides of the river as ‘Restricted Area’. All the rights within the restricted areas shall vest in the State Government and no development or activities will be allowed within the restricted areas without prior approval of the Government of Mizoram. Any ac- tions done within the said Council Reserved Areas in accordance with Notification dated 28.01.1965 before it was set aside by the Gauhati High Court, Aizawl Bench vide its Judgment and Order dated 27/01/2021 shall be considered valid and bonafide exercise of authority.

The Governor of Mizoram is further pleased to authorise certain competent authorities under the Government of Mizoram (Allocation of Business) Rules, 2019 to take action within the restricted areas in the following cases)

1) Section 43 of the Mizoram (Land Revenue) Act, 2013, leh Provison to Rule 25 (4) of the Mizoram (Land Revenue) Rules, 2013 as amended-in a sawi anga competent authority-in phalna a pek tawhte chu tihnun leh (renew) theih a ni. (The Passes already issued with the approval of competent authority are allowed for renewal subject to the fulfilment of the provision of section 43 of the Mizoram (Land Revenue) Act, 2013, read with the Provision to Rule 25 (4) of the Mizoram (Land Revenue) Rules, 2013 as amended from time to time)

2) The Mizoram (Prevention of Government Land Encroachment) Act, 2001 as amended angin Restricted Areas chhunga dan lova lut/kutthlakte chu hnawhchhuah tur an ni. (Encroacher within the declared Restricted Areas shall be evicted in accordance with the provisions of the Mizoram (Prevention of Govern- ment Land Encroachment) Act, 2001 as amended from time to time)

3) Eizawnna leh thil pawimawh dang atana restricted area chhunga ram luah awmte chu thuneitute’n enfiahin, lui dung leh a chhehvel environment tana pawi thei thil a nih chuan cancel-sak tur a ni ang. (Land occupied for dwelling and other purposes within the declared restricted area shall be verified and cancelled by the Competent Authority if it is found that the occupancy poses any threat to the preservation of the environment and rivers.)

4) Chenna atan ram luahte chu vantlang ta adt. pawh ni se, dan ang taka neih anih loh chuan chhuahtir tur an ni ang. Chu ram chu lui leh a kam vel environment tichhetu an ni lo ngei tih hriatchian a nih loh chuan. (The land occupied for dwell- ing, for public purpose etc. without lawful rights/ title within the Restricted Areas shall not be considered for regularization and liable to be evicted unless it is veri- fied the occupied area does not pose any threat to the preservation of environment and rivers.)

5) Mizoram sorkarin heng, acts/ rules/regulations & guidelines a siam chhunga mihring chenna In, sumdawnna, thilsiamna, vantlang hmun emaw, vantlang tana ṭangkai thila hmante chu sorkarin dan thar a siam vanga tihtawp ngai an nih loh chuan, a pangngai anga kalpui zel a ni ang. (No. B.11011/1/2021-GAD, Govt. of Mizoram, Aizawl, the 14th April, 2021) (All other activities and uses, resi- dential, commercial, industrial, social and other public purposes undertaken in the interest of the public by different Departments under the Government of Mizoram for purpose of enforcement of certain acts/rules/regulations/guidelines in the said riverine restricted areas shall continue to be in force unless repealed by the Government.)

He Notification-ah hian Pu J.C. Ramthanga Addl. Chief Secretary to the Govt. of Mizoram, General Administration Department chuan hming a ziak.
Mizoram sorkar thuchhuah (Notification) hi a mal malin kan chip lo ang. A khaikhawmna atan chuan he thuchhuah phenah hian Riverine Reserve Forest huamchhunga ram nei hum tumna a inphum em ni? tih ngaihtuah theih a ni.

Hmasawnna Kebai:
Tlawng lui hi a kum télin a kang mek zel a. Hetih lai hian a bul hnaiah hmasawnna hna (development) thawh mek zel a ni bawk. Development kan tih hi ‘Hmasawnna’ tiin kan hrilhfiah thei mai awm e. Amaherawhchu, khawvel ram changkang zawkte’n hmasawnna tehfung an hman leh, keini ram hnufual zawk tehfung chu a inang lo fo. Chumi awmzia chu- environment humhalhna lam ngaihtuah lek lova hmasawnna hna thawh bawrh bawrh mai hi ram changkang lo zia a nih laiin, environment humhim chung sia hmasawnna hna kalpui hi tunlai khawvelin hmasawnna dik (sustainable development) a tih chu a ni thung. Tlawng lui bik han luhchilh ila.

Tlawng lui hnar lam Pukpui ram huamchhung, Sazatlang leh a chhehvel 300Ha. vela zau chu Mizoram University (Southern Campus) atan en mek a ni a. Tin, Tlawng lui hnar lam Zobawk ramah State Sports Academy chu bulṭan a lo ni tawh a, march 2021 khan Residential Sports School tur lungphum a lo nih tawh bakah, Zobawk ramah tho hian Local Administration Deptt. enkawl picnic spot a awm bawk.
Heng bakah hian Indian Air Force (IAF) chuan Zopuitlang-ah Air Defence Radar Station din an tum mek a. Bairabi–Sairang Rel kawng 51 kilometres a thui chu Northeast Frontier Railway chuan Rs 5021.45 crores sengin an thawk mup mup bawk a. He Rel kawng hian Station pali, Hortoki, Kawnpui, Mualkhang leh Sairangah a nei ang a. Hei hian ram 28 hectares zet a zau a la dawn a ni.

Kan la chhe vek lo e:
Tlawng lui chhehvelah hian hmasawnna hna hi eng ang pawhin thawk nasa mah ila kan environment hi a tichhe tur a ni lo, a tichhia a nih pawhin a tuam dam lehna tur ruahmanna a awm ngei ngei tur a ni, tih chu kan sawi tum a ni. Hemi kawngah hian thawktute pawh an intuaihriam fo a ngai ang. Tuna kan dan neih sa, kan Utawk tur vawn mai maite pawh hi kan hman ngam a ngai a, kan zir peih pawh a ngai. Hun a lo kal zel ang a, heng kan dan neih sate pawh hi kan la duhtawk lo thuai ang. Dan siamtu (legislator)-te an intuaihriam a ngai tak zet.

Kum 1972 khan US leh Canada chuan an tui tlan ber Great Lakes tihthianglimna agreement an ziak a. Hemi avang hian mihring maktaduai 25 te chuan tuithianghlim an lo in theih phah! Kum 1974-ah US Congress chuan Safe Drinking Water Act passed-na chang an lo hre tawh bawk. Kan sawi seng lo vang. Hmasawnna hi mihringte tana himna leh hriselna keng tel hmasawnna a nih loh chuan hmasawnna kebai mai a ni. Thui kan kal lo ang.

Tuna kan kal dan phung ringawt hi chuan thui kan thleng dawn lo tih a chiang sa reng mai. Tlawng lui behchhan hian development project lianpui pui senglut ṭhin mah ila, Tlawng lui hne phak mihringte leh nungchate kan him chuan si loh chuan hmasawnna dik a ni thei lo. Kum 1957 a Kaptai Dam (230MW) khuah a nih khan ram 400 sq.km zet a chim avangin a chhehvela cheng Chakma leh hnam tenau (Jumma tribes) chhungkaw 18,000 zet te chu In leh Lo nei lovin an vakvai tih kan hria. He tuikhuah ropui, ‘multi-million dollar mega dam’ an tih hi hmasawnna lungphum pawimawh tak chu a ni ngei mai. Mahse, kum 64 zet a liam hnu hian vawiin nia Chakmate vahvaihna hi a hriatpuitute kan ni.

16th. India State of Forest Report hnuhnung ber (ISFR-2019), Ministry of En- vironment, Forests & Climate Change Department, Govt. of India-in a tarlan danin ram zau zawng, (percentage of total geographical area) za zela chhutin Mizoram hi India ram State zingah ram hring/ngaw (forest cover) nei ṭha ber kan ni mek a, chu chu 85.41% a ni. Kan hnuaiah Arunachal Pradesh (79.63%). Meghalaya (76.33%), Manipur (75.46%) leh Nagaland (75.31%) te an awm. He tih lai hian ram ngaw nei chhe ber chu Haryana niin, 6.79% chauh a ni thung. India hmarchhak state zingah Assam leh Tripura tel lovin ramngaw kan hloh mek a, chu chu 765 sq.km (0.45%) zet a tling. Tuihna siamtu thing leh mau humhalh kawngah ṭan lak kan ngai. Kan thlen chin aṭang hian hma i sawn zel ang.

Ngaw tichereutu Ramkang:
Kum 2019, January aṭanga June thla inkar chhung zawng khan Mizorama kangmei chhuak zawng zawng (bawlhhlawh hal chenin), Forest Survey of India (FSI)- in thla lem (satellite) kaltlanga a chhinchhiah dan chuan kangmei hmun (fire point) 9,490-ah a chuak a. Ramkang ṭhenkhat chu a kikawi leh zauh dan azirin Satellite hian fire point 6 laiah te pawh a hmu ṭhin.

Kum 2019 chhunga kangmei chhuak satellite-in a hmuh, a hmuna endik chin, 90% vel aṭanga a lan danin Mizorama kangmei chhuak zat hi a vaiin 1,452 a ni a. Heng zingah hian hmun 1,357 chu Lo hal niin, hmun 12 chu ramkang a ni. A dang 83 chu Cha hal (debris burning) leh bawlhlawh hal a ni a. Lo hal vanga kang zau zawng hi 4,773 Ha. niin, ramkang zau zawng hi 60 Ha. a ni thung.

Tlawng hmathlir (Vision 2030):
Kawlphetha hnianghnar kan mamawh a, kawngpui ṭha kan duh a, ram ṭhang zelah hmasawnna project lian pui pui Mizoramah hian kan la seng lut zel ang, bul kan ṭan mek a ni si. Hmasawnna hian environment nasa takin a tichhia kan ti bawk si a. Engtin nge kan tih tak ang?

Ni e, chu chu kan kan sawi tum chu a ni. Tlawng lui kamah hmasawnna hna kan thawk dawn a nih pawhin, chu hmasawnna avanga thing leh mau, tuihna siamtu an chereu loh theihna dan ang ber turin ruahmanna kan siam tur a ni ang. Chu hna enzui kawngah a enzui hna (monitoring) kan vil ṭha tur a ni. Hemi chungchangah hian sorkar leh mipui thukhat vuaa kan ṭanrual a ngai. India sorkar pawhin kum 1994 khan environment impact assessment (EIA) chungchangah Notification a lo chhuah daih tawh.

National Climate Vulnerability Assessment (Full Report 17th April, 2021)-a tarlan a nih dan chuan Mizoram chu 'most vulnerable state' - sik leh sa inthlak danglam tuar nasa ber tur zingah tarlan kan ni a. He zirchianna hi Department of Science & Technology leh Swiss Agency for Development & Cooperation (SDC) te tihchhuah a ni. Chutiang dinhmuna awm chu kan nih avang leh, kan lui tuite pawh nasa taka a kiam mek laia a kam tuak ramngaw tihchereu theihna kawng Gauhati High Court hmanga hawn a ni hi a pawi tak zet a. Mizoram sorkarin a nekna tawk lo ni a lang pawh hi a pawi hle. Kan thing hnuhnung ber kan kih hunah, kan lui hnuhnung ber tûra kan hrai a, kan sangha hnuhnung ber kan man hunah chuan pawisa hi ei theih a ni lo, tih kan hre chiang tawh ang. Hmasawnna nia kan hriat kan duh em emte hi dan hnuaia hmasawnna a nih loh chuan a him lo va, a changkang lo va, a hrisel hek lo. Sawi tawh angin ‘Mahni Thlân lâi’ mai kan ni.

“I ram lo thleng rawh se,” tia ṭawngṭai ṭhinna ram, kan ramah hian Tlawng lui a kang chat zo dawn, i humhalh ang u, tihte chu aupui a lo ngai ta hial a. A mak hle mai. Hei hi eng dang vang ni lovin - thing leh mau, nungchate hnena Pathian ram thlentir tur hian kan rinna mit a lo del zo ta a, “Thil siam zawng zawngte chuan Pathian fate lo lan hun chu nghakhlel takin an thlir si a,” tihte chu Pulpit tlanga sawi mai lo va, a taka nunpui a lo ngai ta a ni tih a lang.

Ram hmangaihtu inti tamna Zoramah hian Ram kan hmangaih lutuk hlawm a, han hawi ila hmuh phak zawng zawng tih mai tur hi mimal ram a ni deuh vek mai. ‘Kawlphetha kan intodelh lo’ tia kan phun mur mur laiin thuneituten min han tihsak dawn tak tak chuan a kawlphetha laiah ni lovin, a zângnadawmna laiah kan buai leh a. Chumi kal zelah chuan riverine reserve forest humhalhna dante chu kan lo ngaimawh ta pawh a ni ang e. Mizote hi kan zâng a lo nâ hlawm em a, dawm kan lo ngai a ni ang. Kan ram hmangaih dan hi hmangaihna mak, mawi leh duhawm si lo a ni. Hemi avang hi ni maw; Gauhati High Court-in riverine reserve forest humhalhna dan a hlîpte, Mizoram sorkarin a nekna tawk lote hi tute emaw sum ngainat rah a ni thei ang.

Kan tlai tawh, mahse a la tlai lo:
Tlai mah se, a la tlai lo kan ti tlat dawn. Khawvel indopui pahnihna a tawp hnu fe, khawvel ram hrang hrangte’n ei leh bara an dinhmun siamṭha leh tura ramkal an siam mup mup tawh hnu, khawvelin nunphung pangngai a zawh leh tawh hnu fé khan, Pacific Thliarkar khawhar tak pakhata Japan sipai hratkhawkheng zet mai chuan - ‘INDONA A TAWP TA!!’ (the war is over) tia radio leh chanchinbute'n an thehdarh chuai chuai hnu fe tak meuh meuh khan indona a tawp a ni tih a hre ve chauh va. A harhchhuak tlai teh e!

I han ti leh zel teh ang. Kristian zirtirnain khawvel a chiah hneh fe tawh hnu khan Arthington mission sap pahnih, F.W. Savidge (Sap upa) leh J.H.Lorrain (Pu Buanga) te chuan kum 1894, January ni 11 khan Tlawng lui kaltlang ngei hian India hmarchhak hmun kilkhawr tak mai Sairang chu an rawn rap a. Chu rama cheng ‘Mizote’ chuan kum sang chuang teh meuh khawvel chiahtu - Isua chanchin hi an lo hre ṭan ve chauh a!
Ni e, tlai mah se la; a la tlai lo ve. Hmasawnna hna thawka ram kal kan siam mup mup lai hian environment humhalh tihte chu kan lo mangnghilh palh tawh ṭhin. Mahse tunah chuan kan mit a lo var ta a, kan harhchhuak ve tawh tlat a ni!

Chuvangin, hmasawnna hna hrang hrang kan kalpui dan pawh hi hmasawnna khingbai a ni reng bik dawn lo a. Kan Lui tui humhalh hi kan nunna hnar, a loa kan awm theih loh, humhalh hi kan mawhphurhna a ni, tih kan hre tlang tawh. Kan ram tichereu zawng chuan kan kal reng bik lo vang. Kan pi leh pute thawnthu kan chhuikir chuan kan tlangvalte chuan vanah lawnin vanchung nulate pawh an lo han rim ṭhin a. Tunlai cloning an tihte pawh hi kum za tel nufa zet liam taah khan Kungawrhi pa chuan a kutzungpui aṭangin nausen duhawm tak a lo hnai chhuak daih tawh!

Kan tha leh zung, hriatna thazam leh kan thluakte hi mi chunga leng ve phaka duan leh buatsaih a ni ve tih a chiang sa reng mai. Eng dang a ni lo, a muthlu rih mai a ni. Muhil pawh kaihthawh theih a nih chuan muthlu kaihthawh chu thil harsa tak a ni lo vang, tih hria ila. Tlawng lui humhalh turin i pen chhuak nghal teh ang.

- Rothuama Sailo, Green Mizoram Network (GMN)

References:
1. Hawla, K. To Bul, 1981.
2. ASEP Press Release. No. 2 of 2021.
3. The Assam Gazette, under Sec. 14 & 21 of the Mizo District (Forest) Act, 1955. Dated 19th May, 1965.
4. Govt. of Mizoram, Notification No. B.11011/1/2021-GAD. Dated 14th April, 2021.
5. Gauhati High Court, Judgement and Order, WP (C) 45 of 2017, WP (C) 51 of 2017, WP (C) 130 of 2013, WP (C) 131 of 2013, WP (C) 132 of 2013, WP(C) 135 of 2013, WP (C) 16 of 2013, WP (C) 116 of 2013, WP(C) 117 of 2013 and WP (C) 118 of 2013). Dated 27th January, 2021.
6. 16th. India State of Forest Report (ISFR-2019), Ministry of Environment, Forests & Climate Change Department, Govt. of India.
7. PHED, Govt. of Mizoram.
7. Sailo, Rothuama. Development Vrs Environment Protection (unpublished).