Nungchate tan thing rah thei phun rawh

Tunlaiin thingphun kan uar hle mai. Mihring tan chauha phun lovin, ramsa te rin tur thing rah thei i phun tel zel ang u. Kan ramngaw la awm chhunte leh kan huan thingte chuan ramsa te khamkhawp rah an chhuah tawh lova. Kan ramngaw te chu thingzai atan te, huan lo ram atan te an kit rem zo tawh a. Ramsate ei tur petu thing lian rah thei chinte chu an kit rem zo tawhin, savate leh ramsa ten ei tur an nei ta lo.

Ramsate chuan ei tur an neih loh avangin ei tur dang an hmuh apiang an ei a, an ngeih si lova, an lo cherin natna te an lo kai a, ril ṭamin a tam zawk chu an thi mang zo ta. A la dam awm chhunte chu an tlem tawh em em a, kan ṭhenawm state ramngaw la ṭhatna hmunah te an pem bo a. Chungte chu tun dinhmunah chuan koh kir leh theih rual an ni tawh lo.

An chaw tamna hmunah min thang bosan zo ta a ni. I pin­dan aṭangin chhuak la, i verandah-ah dingin kawmthlang lama thing hmunte chu thlir teh, a reh ṭhup mai a ni. Khua an van ti har ṭhin tak em! Zoram hi a khua a har zo ta. Upate lo awi tleitu, sava thlawk mawi tak tak te, an hram rimawi tak takte awmna hmun chu a reh ṭhup ta mai. Ṭhangtharten an hriatpui miah lovin, Upate chuan ramsate hram rimawi tak takte chu an la theihnghilh thei lova, an bengah a la cham reng a, an pianzia dangdai leh nalh tak takte chu an mitthlaah ala cham reng asin.

Sirvate riah run remna leh an sum tualte chu a lo dai zo ta. Engkim siamtu chuan mihring leh ramsate chu chengho tur leh kan mamawhte in phuhruk tawn turin Eden huanah khan min lo dah a, chu chu vawiin ni thlengin a la dik reng a ni. Mihring leh nungchate inlaichinna hi a thuk em em a, chutah chuan kan hriat phak loh thil tam tak a awm. Tun laiin Aizawl veng ṭhenkhatah sava leh chehpa te lo lut hmuh tur an tam mai. Ramhnuaiah ei tur an hmu zo lova, an rilṭam ei tur rawn zawng an ni.

Kan ei nawi paih te an rawn ei a, mi chokaa eitur dahte an rawn eisak ṭhin.

Rikrapin lo tihlum mai lo la, lo lainat la, chawm zawk ang che. Tunlai ṭhangtharte hi ramsate dimdawi tura hrilh an nih angin ramsate chungah an ngilnei hle tawh a ni. Mi tlemte, ramsa chunga ngilnei lo, anmahni that a, an sate ei a, zuarte pawh an la awm a, hengho hi an ṭhanharh hunah chuan ramsate an zalen ve tawh ang.

Kan naupan laiin Tut kamah kan cheng a, van sang takah kawl­hawk thlawk ri kan hre ṭhin. Luimawng lam ram hla tak aṭangin zotlang sanga thingchang rah awmte hriain an rawn pan ding ṭhin.

“Khawiah ṭuan che u maw, sirva leng zawngte, riahrun rem leh turin lamang lo let ula, zoram nuam i din thar leh ang u” tiin ngaihtuah zui atan chhiartute ka chah a che u.

- H.Neihchungnunga, Durtlang North