Mizo ṭhalaite hmabak

Tunlai kan ṭhalaite chevel han en vang vang hian, "Nakina ram hruaitu tur in la ni a, in pawimawh a ni," tia fuih hi a harsa ka tiin kan ram hmabak hi kan ṭhalaite kutah kan nghat a nih chuan hmabak eng tak hi kan nei lovin a lang tlat.

Kan ram hruaitute sel ṭhintu kan ṭhalai zingah hian taima, lehkha zir peih, hnathawk peih, aia upa zah thiam hi ṭhahnem tak an awm ang, mahse a nawlpui hi an taima lo, aia upa zahna an nei lo, hna an thawk peih lo tlat hi a pawi a ni.

Kan ram hruaitute pawh an duh duh sawi mai mai, hnathawh sawi tur awm vak si lova sem tum leh tih tur dream sawi liam mai mai, pawisa ringawt ngaihtuah mai mai tiin kan han sel a. Kan ṭhalaite pawh hi an hnathawh sawi tur a vang ve viau tho lo maw?

Europe leh ram changkang dangte nun ang an dream lai a, zan lama rei fe fe inkhel en mai maia an meng a, hun an khawhral hi kan ram hruaitute hnathawk lova dream vak vak nen an intluk tawk vel lo maw?

Kan ṭhalaiten na­kina tih tur leh nih tum, tih theih tur ropui tak tak an sawi hi kan ram hruaituten nuai 3 min sem vek an 'tum' thu nen hian a inbuk tawk vel viau lo maw? tiin inthla­hrung tak siin zawhna kan rawn zawt a ni.

Kan ṭhalaite zingah hnathawh hun ngai pawimawh lova thle kual mai mai, zan khaw tairek thlenga mahni intihlima mobile phone hmanga games khel mai mai, hnathawh huna chhawr theih tur awm si lo an tam dan en hian he ram hian nakinah ram hruaitu ṭha a nei thei dawn em ni?

Tuna kan ram hruai­tute hi office-ah pawh hnathawk lova vote zawnga kual mai mai, zin dawna office pawisa ṭham ching, thawh chhuah ni lova dil chhuah sa pawisa awm ang ang inchuh mai mai tia sawisel thei tur pawhin kan ṭhalaite hi an khawsa em ni le?

He MNF Ministry ah hian Minister pakhat chuan a Minis­ter pui pakhat chu, "A Minister ber ram tana hnathawh tur zawng ni lovin ama tana hnathawh tur zawngin Department dangah a vak kual dun dun," tiin a rel e, an ti nia! Hei hi kan ram ṭhalaite ang tho hi a ni lo maw? Kan ṭhalaite pawhin ram tana thawh tak tak leh ram vei tak tak peih lovin mahni tana nuam leh hlawk tur chin bak chu buaipui lovin an awm mai mai ni hian an lang. Kan ṭhalaite hmabak thlir hian tuna kan awm dan nen hian kan inhmeh tawk lek zawk lo maw? tih hi mahni ṭheuh i inzawt ang u.

- Lalthlamuana