B.P.L. SUAK A NI EM?
Ka zinna khaw ṭhenkhat ka tlan pelh laiin mi engemaw zat ration la ka tlan pel a. Ka hmuh tam ber chu BPL Ration Card keng an ni. Mahse heng BPL ration card keng tam berte hian motor car leh scooty zuk hmang tlat hlawm a! Thil inhmeh lo tak a ni a, BPL suak chu a ni mai lo maw ka ti rum rum mai!
BPL chhungkua han thlan dawn khan chhungkaw dinhmun chiang tawkin survey a ni a- TV, Fridge, Washing Machine, lirthei etc. hetiang neih leh neih lohte nen thleng khan. Sorkar hnathawk awm zat pawh record vek a ni awm e. A chunga sawi tak ang chi nei leh awm kha chu BPL nih theih loh ni awm tak khan sawi a ni.
BPL chhungkuate hi chu hnuai tak, an chenna in pawh chhe tak, heng khawtlang association hrang hrang ang chi pawha tel pha lo tur hial ni awm taka sawi kha a ni si a. Khatiang ni si kha engtizia nge maw heti taka kan ramah hian kan la hnualsuat lohva kan la inchuh tlat zawk le? BPL ni si RCC building-a lawi, semi pucca building a lawi te hi an awm fur awm asin le!
Khaw thenkhatah phei chuan Retailer tura thlan tlin, BPL lo ni si zuk awm a! Retailer tur ang chiahte pawh hian BPL chu an ni thiang lo hul hual an tih chu! V/C candidate tur pawhin BPL ang chite hi chuan chuh pawh an chuh ve tur a ni lo dan ang takah chuante pawh an ti. BPL te hi chu vantlang hnuai lam mi an ni tlat. Champhai District khaw engemaw zata BPL nei lo an lo awm tlat hi chu fak an phu hle.
Kristian ram hian dikna hi kan duh vak lo zawk nge, kan pamham lutuk vang zawk? BPL hamṭhatna dawn dawn ang chi te hi kan it a, mawi leh mawi lo thlu lovin kan inchuh ve ta mai zawk em maw ni le? Thil kalphung hi a mak teh zawng a ni e.
Kan hotu pa berin ‘Kutdawh State’ a tih te, ‘State rethei ber’ a tih fo ṭhinte kha a lo hre chiang a, BPL kan tam em em danah pawh hian a chiang reng mai. Ration Card lamah han ti leh ila kan ram mihring aia tam ration card-ah mihring kan awm tlat bawk si. Cencus hnuhnung berah Mizoram mihring 10.97 lakhs vel kan nih laiin kan ration card a mihring zat chu 5 lakhs zetin zuk tama mawle!
Heng thil zawng zawngah hian tunge dem tur tih lam thlir lovin, kan ram hruaitute hian kawng dik mi zawhpui tumin ṭan la se. Dawt thu leh thu puarpawleng mai maia lalna chan tum lo se, inthlannaah hlei hlei hian thianghlim leh felfaia inthlang thei turin ṭan la se. Pawisa leh therhlo eng eng emaw hmanga miretheite vote lei chin hi bansan se, tichuan kan ram mipui moral hi ala siamṭhat theih ngei chuan a rinawm.
Tun anga kan kal reng chuan chhuan khat a ral leh meuh chuan vai pathian biate zingah Kristian nih a zahthlak lutuk ang a, kan ram hi BPL chenkhawmna ramah min dah thei mai ang tih a hlauhawm ta.
He BPL tamna ‘thim’ aṭanga chhuak thei tur hian tun kan inthlan hmachhawn turah hian kan hruaitute leh a mipui pawh hian theihtawpin ṭan lain rilru fim i pu teh ang u.
- Patrick Z, Chhingchhip