CAB sawi chhiata rilru nâ kan awm hi ka rilru a nâ

Miin Citizenship Ammend­ment Bill (CAB) a ni tawh lova tunah chuan Act a ni tawh ti ti mah se, kei chuan CAA aiin CAB kha ka hmelhriat hmasak avangin 'au ka ti thau thau' dawn a ni a, CAB chungchang sawia Mizo zawng zawngin kan duh loh lai a ngaihawm zia sawi chhuah pahin tuna CAB ṭan ta em em kan awm hian ka rilru chhungril hi a vit ngut ngut zuk nia. 

Tichuan kan thupuiah han lut nghal chat ila. CAB hi kan duh lova, an sawi dan takah UNO lam meuh pawhin an ngaimawh thute an rawn sawi khan CAB hian UNO a huam dawn a ni lova, UNO lam khan thil ṭha lo chu an lo do ve mai zawk a ni. Min huam dawn chuan ṭha lo, min huam loh chuan ṭha ta ang maia Party politics vel mai mai avanga kan Mizote kan inthurual thei ta lo hian ka rilru a ti na ve ngawih ngawih ṭhin a ni. 

CAB/ CAA-ah hian Kristian te kan him kan han ti ve ringawt a, mah se National Council of Churches in India (NCCI) meuhvin thuchhuah thui tak an siam tawh a, CAB/ CAA hi a ṭha lo an tih thu te, minority tana thil pawi a nihte kha an ziak a, ka rilru pawh a kaihruai hle a ni kei chu. 

Vanglaini lama kan lo chhiar, December 19, 2019-ah khan NCCI lam khan thil kha an chhut ril riau mai a, "Citizenship Amendment Act hi ṭhenawm ram pathuma an sakhaw zui avanga tihduhdah tuarte venhimna tur anga sawi a ni zet a; nimahsela sakhua vanga an tawrhna chu behchhana hmang loin, he dan thar (CAA) hian sakhaw behchhanin duhsakna a lantir ta zawk," a rawn ti ta then mai a. CAA hian a huam loh lam hi BJP leh a thlawptute hian sawi sawi mah se kan Kristian pawl lian NCCI chuan CAA hrim hrim hian sakhaw behchhanin duhsakna a lantir an ti a, chu chu an do ta a ni. Kan man thiam em aw? BJP hi Hindutva titu an nih vangin CAA hian Hindu a duhsak tihna a nih chu, chu chu kan lo vote pui a nih chuan ka hrethiam ve ta reng reng lo, MP inthlan dawna thusawite kha. 

Tunah chuan CAB/CAA hi han sawi chhe hlek ila. Whatsapp lamah pawh thin­rimin min chhang tur hi party pakhat hi an awm ziah ta a nih hi mawle, kan mi thiam ṭhenkhat tlema party awn lam nei ṭhinte thu ziak tlem tlem la chhuakin CAA hlauhawm lohna lam han sawi ṭhin mah se India rama BJP leh a lam ṭang lo zawngin an duh lo rawn danah hian he CAB/ CAA hian Hindu leh BJP a vulh lian dawn tih hi kan chiang tlang a ni. Chu chu kan lo support avangin ka rilru a nâ a, chu bakah chuan CAB/ CAA lo chhan tum ṭalh Mizo Kristian zinga party ṭan lam neih vanga an awm hi a pawi khawp mai. Hei hi Mizoram ka mitthla dan nen a inpersan khawp mai. 

- C.Lalfamkima (FKA Chhangte)