Nuna rochun thil

“Leia sûlrûl leh tuiêkin a ei chhiatnaah, rûkruten an reh pawha an rûknaah hian in tan ro te khâwl khawm suh u” Matt 6:19.

Lal Isua Krista thusawi hi han ngaih­tuah vang vang ila a sawi tum awmzia tak hi ‘khawvel hi hmangaih suh u’ ti te pawhin kan dah thei tho mai thei. A thil sawi hi a ril lutuk a kan chhiar zawh rual rualin kan theihnghilh leh nghal ṭhin, duhamnaa khat khawvela cheng kan nih miau avangin.

Amah Lal Isua ngei kha a thihin thil hlu engmah a hnutchhiah lova. A kawr haklai neih ang chhun chhun kha kraws bula sipai ṭhu te khan an insem vel a! Isua’n engnge rochun thil min hnutchhiah?

Thurochhiah, bank account, in leh ram, engmah! Mahse thil ropui ber zawk ‘nunna’ sawi hleih theih loh khawpa nun thianghlim, mahni inphatna leh hmasial lo nun, Pa duhzawng tipuitling tura thuawihna nun min hnuchhiah a. Chhandam kan nih ve theihna tura kan ai min thihsakna, chu aia ropui chu engnge awm chuang le! Chu ngei chu min hnuchhiah a tum, a tih puitlin tak chu a ni.

Mahatma Gandhi pawh khan thil hlu hnutchhiah a nei lo. Vawthlep (Sandal), a chaw eina thlêng leh a tarmit; chu bak engmah thil (material) a hnutchhiah an hre lo. England a Dân zir, Sap ho incheia nalh taka inchei ve, court a roreltu ropui, Prime Minister, Lal te hmaa rorel a ding ve si chu pawisa nei miah lo leh ama tahchawp puan (khadi) nen chauh he khawvel a chhuahsan ta a nih kha! Nimahsela, Gandhi-a hian rochun thil a thihsan ve thung erawh chu ‘hnam zalenna’ (free nation), India ram zalenna a ni.

Tharum thawhna tel lovin, loneitu rethei tè tè te nen in­suihkhawmin ram ni tla seng lova roreltu British sawrkar an hneh thei tlat mai. He thu a chhar chhuahna pawh hi Tlanga Isuan thu a sawi hmanrua chiah kha a hmang ve a ni; chu ngei chu Gandhi-a zalenna sual chhuah dan chu a ni.

Vawiina thi tur ni ta ila, engnge ni nuna rochun thil (legacy) ka hnutchhiah ve tur chu ni ang le? Kan hmangaih te thil hnutchhiah chu a ṭha alawm, a bik takin keimahnia innghat ve ngawih ngawih te chu, a ṭhain a pawi­mawh hle mai. Ni­mahsela, chung thil te chu ka kalsana ka hnuchhawn mai tur thil te an ni si!

Khawvel, ka ram, ka khua leh tui, ka chhungkua te’n a min hriat ve rengna tur eng thil nge ka hnutchhiah ve tak ang le? Chatuan a ro chhe thei tawh lo awmnaa ro khawl khawmtu nih chu a hlu viau dawn lo’m ni!

He khawvelah ngei pawh hian chhuan dang lo awm zel­te’na an neih tur ro khawlkhawmtu nih chu a hlu hle zawk ang. Kan thih veleha mi anchhia leh kamchhe tleuhna, a tawpa nun tam tak chântu ni bawk Juda Iskariota chan ang changtu nih chu vanduaina tawpkhawk a ni mai lo maw? I in ngaihtuah chiang teh ang u.

- Vanhmingliana (Taua), Dawrpui