CHAICHIM PAKHAT TIHLUM TURIN I IN HAL SUH

Chaichim chim­awm zet kawl tan chuan tihhlum a chakawm duh viau ang. Mahse in neitu kan nih chuan kan in tichhe lo thei ang bera chaichim kan tihbo a ngai. A in neitu ni lem lo chuan in pumpui a hal ang a, chaichim pawh a bo ngei ang le.

He thufing tawite hian kan inrelbawlna kawngah awmze thuk tak a nei a, i han sawi teh ang.

Motor tlan chak te hi chaichim an ni a, a tireh tura kawng awlsam chu speed breaker siam a ni. Chu speed breaker chuan mifel leh fel lo te pawh a hrut rual ta vek a, mi fel pangngai tan pawh a hnawksak em em ṭhin.

Covid darh zel chhuan­lamin zan curfew kan puang a, mahse a fawng vuantu lam aṭanga zan lama curfew puan chhan tak leh Covid darhna kawnga a ṭangkaina sawifiahna a awm lem lo a, zan lama bengchheng venna atan a nih te an ring a, engpawhnise, mipui sorkar chuan chiang taka mipuite hrilh­fiah hi a bat a ni. Misual tlemte venna atana mifel sang tam hrem­na a ni palh ang e.

State hrang hrang ramri kan kân ve tawh a, kan bungraw phurh zawng zawng kan lipse hmanna awm chhun chu kan state hi a ni deuh maiin ka hria. Hetianga check hman khawpa indaih kan sorkarin a nei hi a fakawm viau laiin mi tlemte manna atan a nawlpuiin kan tuar leh ta a, airport lama an check ve loh erawh sawi kher lo ang.

Mizote hi kan tam ve telh telh a, hmanlai anga khawtlang rorelna ang han hman reng pawh a rem lo tial tial bawk. Dan leh hraia innghat rorelna a pawimawh chho a, a nih loh chuan thil a chiri thuai tawh ṭhin. Chutiang karah chuan thil ṭha anga kan ngaih ṭhin - induhsakna, inngaihdamnate pawh rorelna ṭha kan neihna daltu a ni ta fo, hma kan sawn a ngai e.

Tin, sorkar hian dan lama fihlim ngawr ngawr a ngaihtuah tur a ni lo, thil ṭha a thlen leh thlen loh a ngaihtuah zawk tur a ni. Restricted tender an ti emaw ni, dan dik taka tender inpekna, mahse a hriaten an sawi anga hna ṭhat theih loh chhan ni bawk site hi a fawng chelhtu tan a mawi lo a, mikhual sorkar tih awm tawk lek a ni.

Bye election kan neih ṭuma minister pakhat, dan lamah chuan a fihlim mahna, mahse elec­tion fair tak kan neihna daltu ang ni thei bawk si pawh kan hriat kha.

Mipui rorelna hnuaia awm kan nih angin sorkar pawhin chaichim tihhlum a duh vanga in a hal fo hi a rem lo. A tisualtu a zawn chhuah a, a hrem zat zat a ngai a, mi nawlpui, thil tisual ve lem lote khuahkhirhna tel zel hi titlem tura a ṭan a ngai a, a fin a ngai bawk.

Chutiang tih tum lova kawng awlsam ber zawn ringawt zel mai hi sorkar rintlak zia a ni thei lo. Mipui hmakhaw ngaihna aia mahni hna tih awlsamna kawng zawnna te pawh a ang.

- Chhana Ralte